ເກີດເຫດປະທ້ວງໃນຫລາຍເມືອງໃຫຍ່ທົ່ວອິຕາລີ ຫລັງປະຊາຊົນບໍ່ພໍໃຈມາດຕະການເຂັ້ມງວດຮັບມືໂຄວິດ-19 ຮອບໃໝ່
ວັນທີ 27 ຕຸລານີ້, ເກີດເຫດປະທ້ວງໃນຫລາຍເມືອງໃຫຍ່ທົ່ວອິຕາລີ ຫລັງປະຊາຊົນ ແລະ ເຈົ້າຂອງກິດຈະການຈຳນວນຫລາຍ ຕ່າງບໍ່ພໍໃຈມາດຕະການເຂັ້ມງວດທາງສັງຄົມທີ່ລັດຖະບານປະກາດໃຊ້ເພື່ອຮັບມືການລະບາດຮອບໃໝ່ຂອງໂຄວິດ-19 ທີ່ທະວີຄວາມຮຸນແຮງຂຶ້ນ ຈົນລຸກລາມກາຍເປັນເຫດປະທະກັນກັບເຈົ້າໜ້າທີ່ຕຳຫລວດ ແລະ ນຳໄປສູ່ການສະຫລາຍການຊຸມນຸມດ້ວຍແກັສນ້ຳຕາໃນທ້າຍທີ່ສຸດ.
ໂດຍໜຶ່ງໃນເມືອງສຳຄັນຄືຕູຣິນ ມີປະຊາຊົນອອກມາຮ່ວມຊຸມນຸມປະທ້ວງລັດຖະບານ 2.500 ກວ່າຄົນ ມີທັງກຸ່ມທີ່ເປັນເຈົ້າຂອງກິດຈະການ, ພໍ່ຄ້າ, ແມ່ຄ້າ, ນັກທຸລະກິດຂະໜາດນ້ອຍທີ່ໄດ້ຮັບຜົນກະທົບ ແລະ ຍັງບໍ່ຟື້ນຕົວຈາກມາດຕະການເຂັ້ມງວດເທື່ອກ່ອນ ລວມທັງກຸ່ມປະຊາຊົນຫົວຮຸນແຮງ ໂດຍສະເພາະແຟນບານສະໂມສອນບານເຕະຊື່ດັງ ຄືຢູເວນຕຸສ ແລະ ໂຕຣິໂນ ເປັນເຫດໃຫ້ມີຜູ້ໄດ້ຮັບບາດເຈັບຈຳນວນໜຶ່ງ ໂດຍເຈົ້າໜ້າທີ່ຕຳຫລວດໄດ້ຈັບກຸມຜູ້ໃຊ້ຄວາມຮຸນແຮງໃນການປະທ້ວງ ແລະ ກໍ່ຈະລາຈົນປຸ້ນສິນຄ້າຍີ່ຫໍ້ດັງໄດ້ປະມານ 10 ຄົນ.
ທາງການອິຕາລີໄດ້ປະກາດເຄີຟິວໃຫ້ຮ້ານອາຫານ ແລະ ເທັກຕ້ອງປິດໃຫ້ບໍລິການພາຍໃນເວລາ 18:00 ໂມງ. ຂະນະທີ່ໂຮງໜັງ, ຮ້ານອອກກຳລັງກາຍ ແລະ ສະລອຍນ້ຳຈະຕ້ອງຢຸດການເປີດໃຫ້ບໍລິການໃນເວລານີ້ ໂດຍເມືອງມິລານໃນແຄວ້ນລອມບາເດຍ ແລະ ເມືອງຕູຣິນໃນແຄວ້ນປິເອດມອງ ກໍມີການກຳນົດມາດຕະການເຂັ້ມງວດເພີ່ມຕື່ມນອກເໜືອໄປຈາກນີ້ ເພື່ອຮັບມືໂຄວິດ-19 ທີ່ກຳລັງແຜ່ລະບາດຢ່າງໜັກ. ຫລ້າສຸດອິຕາລີມີຜູ້ຕິດເຊື້ອສະສົມແລ້ວ 564.778 ຄົນ, ເສຍຊີວິດແລ້ວ 37.700 ຄົນ ໂດຍແຄວ້ນລອມບາເດຍເປັນແຄວ້ນທີ່ມີຜູ້ຕິດເຊື້ອສະສົມຫລາຍທີ່ສຸດໃນປະເທດ (ປະມານ 1,6 ແສນຄົນ).
