ລາວສູ້ຊົນລຶບລ້າງຄວາມທຸກຍາກໃກ້ກັບຄວາມເປັນຈິງ
ໂດຍ: ລູກເມືອງພວນ
ກອງປະຊຸມໃຫ່ຍຄັ້ງທີ 9 ຂອງພັກປະຊາຊົນປະຕິວັດລາວໄດ້ວາງເປົ້າສູ້ຊົນ ລຶບລ້າງສະຖານະພາບ ດ້ອຍພັດທະນາຂອງປະເທດຊາດໃຫ້ໝົດໄປໃນປີ 2020 ແຕ່ໃນທີ່ສຸດ ໂດຍການປະເມີນຂອງອົງການສະຫະປະຊາຊາດ ເຫັນວ່າລາວຍັງບໍ່ສາມາດປະຕິບັດໄດ້ຕາມມາດຖານເງື່ອນໄຂຂອງສາກົນວາງອອກຄື:
- ມາດຖານດ້ານ ດັດສະນີ ລາຍໄດ້ແຫ່ງຊາດ ຢູ່ທີ່ 1.996 ໂດລາ/ຄົນ(ມາດຖານຕໍ່າສຸດ 1.230 ໂດລາ)
- ມາດຖານດ້ານ ດັດສະນີ ຊັບສິນມະນຸດ(HAI) ຢູ່ທີ່ 77.2 ຄະແນນ ມາດຖານຕໍ່າສຸດ 66 ຄະແນນ
- ມາດຖານດ້ານ ດັດສະນີຄວາມບອບບາງທາງເສດຖະກິດ(EVI) ຢູ່ທີ່ 33.7, ຊຶ່ງມາດຕະຖານຂອງສະຫະປະຊາຊາດແມ່ນ 32 ຫຼື ຕໍ່າກ່ວາ.
ໝາຍຄວາມວ່າ ຍັງແຕ່ມາດຖານດຽວຄື “ຄວາມບອບບາງທາງດ້ານເສດຖະກິດ” (ມາດຖານທີ 3) ເທົ່ານັ້ນທີ່ຍັງບໍ່ທັນໄດ້ມາດຖານຕາມສາກົນວາງອອກ.
ຈາກນັ້ນລັດຖະບານກໍໄດ້ມີການປັບປຸງ ແກ້ໄຂ ໂຄງສ້າງທາງດ້ານເສດຖະກິດຄືນໃໝ່ ແລະ ເລັ່ງຮັດແໜ້ນບັນກາມາດຕະການພັດທະນາເສດຖະກິດຄືນໃໝ່ ເພື່ອໃຫ້ມີບາດກ້າວໜັກແໜ້ນ ແລະ ແນ່ນອນກ່ວາເກົ່າ ເພື່ອຮຽກຄວາມເຊື່ອໝັ້ນ ທາງດ້ານຄວາມບອບບາງທາງດ້ານເສດຖະກິດຄືນມາ ຢ່າງຕັ້ງໜ້າໃນໄລຍະທີ່ຜ່ານມາ.
ໂດຍຫຼ້າສຸດ, ອົງການທະນາຄານໂລກ ລາຍງານໃຫ້ຮູ້ວ່າ ອັດຕາຄວາມທຸກຍາກຂອງ ສປປ ລາວ ໄດ້ຫຼຸດລົງຢ່າງຕໍ່ເນື່ອງຄືຈາກ 24.6% ໃນປີ 2012/13 ມາເປັນ 18.3% ໃນປີ 2018/19.
ຈາກຕົວເລກດັ່ງກ່າວ, ລາວເຮົາມີຄວາມຫວັງຈະຫຼຸດພົ້ນອອກຈາກສະພາວະປະເທດດ້ອຍພັດທະນາໃນ 4-5 ປີຂ້າງໜ້ນີ້ຢ່າງແນ່ນອນ.
ໂດຍເລີ່ມຕົ້ນຈາກພື້ນຖານເສດຖະກິດທີ່ວ່າເກືອບບໍ່ມີຫຍັງເລີຍໃນຊ່ວງປົດປ່ອຍໃໝ່ໆ ອາດເວົ້າໄດ້ວ່າ ສ້າງສາປະເທດຊາດເລີ່ມຈາກ ສອງຝາມືເປົ່າ. ຕະຫຼອດໄລຍະເວລາ 40 ປາຍປີທີ່ຜ່ານມາ ປະເທດຊາດພັດທະນາມາເຖິງຂັ້ນນີ້ຖືວ່າດີທີ່ສຸດແລ້ວ ຖ້າທຽບວ່າເລີ່ມຈາກສອງຝາມືເປົ່າ, ເລີ່ມຈາກເສດຖະກິດທີ່ດ້ອຍພັດທະນາທີ່ສຸດໃນໂລກ.
ແນ່ນອນວ່າ ການພັດທະນາປະເທດຊາດ ບໍ່ໄດ້ລາບລື່ນສະເໝີຕົ້ນສະເໝີປາຍ ຄືຫຼາຍຄົນເຂົ້າໃຈ ແຕ່ຫາກເຕັມໄປດ້ວຍອຸປະສັກຫຍຸ້ງຍາກຫຼາຍປະການ ເຊັ່ນ: ສັດຕູທີ່ຫວັງມ້າງເພທຳລາຍພວກເຮົາຍັງມີຫຼາຍ, ພາຍຫຼັງປະເທດຊາດໄດ້ຮັບການປົດປ່ອຍບໍ່ແມ່ນເລີ່ມລົງມືພັດທະນາເສດຖະກິດເລີຍ ແຕ່ຫາກຍັງເຮັດໜ້າທີ່ປັບປຸງລະບົບການເມືອງໃຫ້ໜັກແໜ້ນ ອຳນາດການປົກຄອງແຂງແກ່ນ ເພື່ອໃຫ້ປະເທດຊາດມີຄວາມສະຫງົບ, ປົວແປງ ຮຳບາດແຜສົງຄາມໃນໄລຍະຕົ້ນ, ດຳເນີນສົງຄາມກັບພວກຕ້ານ ສປປ ລາວໄລຍະປົດປ່ອຍໃໝ່ຢ່າງຕໍ່ເນື່ອງ…ຊຶ່ງຂີດໝາຍແຫ່ງການພັດທະນາຢ່າງແທ້ຈິງແມ່ນເລີ່ມຕົ້ນຈາກມະຕິກອງປະຊຸມໃຫ່ຍຄັ້ງທີ 4 ຂອງພັກໃນປີ 1986 ເປັນຕົ້ນມາ ແຕ່ກໍເຕັມໄປດ້ວຍອຸປະສັກຄວາມຫຍຸ້ງຍາກຫຼາຍປະການຂວາງໜ້າເຊັ່ນ: ຂາດທຶນຮອນ, ຫຼາຍປະເທດເວລານັ້ນຍັງບໍ່ທັນກ້າເຂົ້າມາລົງທຶນໃນລາວ, ສັງຄົມບໍ່ທັນມີຄວາມສະຫງົບຢ່າງແທ້ຈິງ, ພວກບໍ່ຫວັງດີຕໍ່ ສປປ ລາວ ຫາທຸກວິທີທາງສ້າງຄວາມບໍ່ສະຫງົບ, ເສດຖະກິດຖືວ່າເລີ່ມຕົ້ນໃໝ່ຈາກສອງຝາມືເປົ່າ..
ແຕ່ໂດຍພາຍໃຕ້ການນຳພາອັນສະຫຼາດສ່ອງໃສຂອງພັກປະຊາຊົນປະຕິວັດລາວ, ສປປ ລາວໄດ້ເດີນໜ້າຢ່າງແຂງແຮງ ແລະ ເປົ້າໝາຍສຸດທ້າຍຂອງພັກກໍແມ່ນເພື່ອຄວາມຢູ່ດີກິນດີຂອງປະຊາຊົນລາວທັງຊາດ, ໃນກອງປະຊຸມໃຫ່ຍຄັ້ງທີ 9 ຂອງພັກຈິ່ງໄດ້ວາງເປົ້າສູ້ຊົນເພື່ອລຶບລ້າງຄວາມທຸກຍາກຂອງປະຊາຊົນ ແລະ ນຳເອົາປະເທດຊາດພົ້ນອອກຈາກຄວາມດ້ອຍພັດທະນາໃນປີ 2020 ແຕ່ເນື່ອງຈາກວ່າຍັງມີຫຼາຍເງື່ອນໄຂທີ່ຫຍຸ້ງຍາກ ຈຶ່ງບໍ່ທັນສາມາດບັນລຸຈຸດປະສົງຄາດໝາຍໄດ້ ແຕ່ເຖິງຢ່າງໃດກໍດີ ພວກເຮົາມີຄວາມຫວັງອັນແຮງກ້າວ່າ ພາຍໃຕ້ການນຳພາຂອງພັກປະຊາຊົນປະຕິວັດລາວ ດ້ວຍຈຸດໝາຍສູ້ຊົນດັ່ງກ່າວ ຄົງຈະຫຼຸດພົ້ນອອກຈາກຄວາມດ້ອຍພັດທະນາໄດ້ຢ່າງມີໄຊໃນອະນາຄົດຂ້າງໜ້າມໍ່ໆນີ້ ຢ່າງບໍ່ຕ້ອງສົງໄສ.
ພວກເຮົາປະຊາຊົນລາວ ຈົ່ງເຊື່ອໝັ້ນການນຳພາຂອງພັກ ແລະ ຈົ່ງພ້ອງກັນຢູ້ອ້ອມຂ້າພັກ ສະໜັບສະໜູນພັກ ຮັດແໜ້ນຄວາມສາມັກຄີເປັນອັນໜຶ່ງອັນດຽວ, ເພີ່ມທະວີປະກອບສ່ວນເຮັດໃຫ້ເສດຖະກິດຂອງຊາດນັບມື້ຂະຫຍາຍຕົວຢ່າງແຂງແຮງ ເພື່ອຄວາມຢູ່ດີກິນດີຂອງປະຊາຊົນລາວ. ເພື່ອໃຫ້ປະຊາຊົນຮັ່ງມີ, ປະເທດຊາດເຂັ້ມແຂງ, ສັງຄົມມີຍຸຕິທຳ ແລະ ສີວິໄລ.
