ຊາວກຳປູເຈຍ 3 ແສນຄົນບໍ່ມີວຽກເຮັດ ຍ້ອນການລະບາດຂອງໂຄວິດ-19
ທ່ານ ຮຸນ ເຊນ ນາຍົກລັດຖະມົນຕີກໍາປູເຈຍ ກ່າວວ່າ: ຜົນກະທົບຈາກການແຜ່ລະບາດຂອງພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19) ເຮັດໃຫ້ຊາວກຳປູເຈຍປະມານ 300.000 ຄົນ ບໍ່ມີວຽກເຮັດງານທຳ ເຊິ່ງສ່ວນຫລາຍເກີດຂຶ້ນໃນອຸດສາຫະກຳການທ່ອງທ່ຽວ ແລະ ເຄື່ອງແຕ່ງກາຍ.
ໂດຍໃນລະຫວ່າງພິທີວາງສີລາລືກຂົ້ວຂ້າມແມ່ນ້ຳ 2 ແຫ່ງທາງຕາເວັນອອກຂອງນະຄອນຫລວງພະນົມເປັນ ໃນວັນທີ 26 ຕຸລາ, ທ່ານ ຮຸນເຊນ ກ່າວວ່າ: ແຮງງານບາງສ່ວນໃນອຸດສາຫະກຳດັ່ງກ່າວໄດ້ເລີ່ມກັບມາເຮັດວຽກຕາມປົກກະຕິ ຫລື ບໍ່ກໍໄດ້ວຽກໃໝ່ແລ້ວ ເນື່ອງຈາກສະຖານະການການແຜ່ລະບາດຂອງໂຄວິດ-19 ກັບມາຢູ່ພາຍໃຕ້ການຄວບຄຸມ.
ທ່ານ ຮຸນເຊນ ກ່າວວ່າ: ໂຄວິດ-19 ບໍ່ພຽງສ້າງຫາຍະນະຢູ່ກຳປູເຈຍເທົ່ານັ້ນ ແຕ່ຍັງສົ່ງຜົນກະທົບຕໍ່ປະເທດອື່ນທົ່ວໂລກ ໂດຍອຸດສາຫະກຳການທ່ອງທ່ຽວ ແລະ ເຄື່ອງແຕ່ງກາຍໄດ້ຮັບຜົນກະທົບໜັກທີ່ສຸດຈາກການແຜ່ລະບາດຄັ້ງນີ້. ໂຮງແຮມຫລາຍແຫ່ງຕ້ອງປິດກິດຈະການ ເນື່ອງຈາກບໍ່ມີນັກທ່ອງທ່ຽວຕ່າງປະເທດເດີນທາງເຂົ້າປະເທດ.
ທ່ານ ຮຸນເຊນ ກ່າວອີກວ່າ: ເສດຖະກິດຂອງກຳປູເຈຍປີນີ້ຄາດວ່າຈະຫລຸດລົງ 1,9% ກ່ອນຈະຟື້ນຕົວໃນປີໜ້າ ດ້ວຍແຮງໜູນຈາກການຟື້ນຕົວຂອງເສດຖະກິດໂລກ ແລະ ອຸປະສົງຈາກຕ່າງປະເທດ.
ກໍາປູເຈຍມີຜູ້ຕິດເຊື້ອໂຄວິດ-19 ທີ່ໄດ້ຮັບການຢືນຢັນແລ້ວ 287 ຄົນ, ປິ່ນປົວຫາຍແລ້ວ 283 ຄົນ ແລະ ບໍ່ມີຜູ້ເສຍຊີວິດ.
