ວຸດທິສະພາອາເມລິກາ ລົງຄະແນນຮັບຮອງ ນາງ ເອມີ ໂຄນີ ບາເຣດ ເປັນຜູ້ພິພາກສາສານສູງສຸດຄົນໃໝ່
ວັນທີ 27 ຕຸລານີ້, ສະມາຊິກວຸດທິສະພາອາເມລິກາ ລົງຄະແນນຮັບຮອງນາງ ເອມີ ໂຄນີ ບາເຣດ ອາຍຸ 48 ປີທີ່ໄດ້ຮັບການສະເໜີຊື່ໂດຍປະທານາທິບໍດີ ໂດນັລ ທຣຳ ນັ່ງຕັ່ງໜຶ່ງໃນຜູ້ພິພາກສາສານສູງສຸດໃໝ່ແທນນາງ ຣູ ເບເດີ ກິນສເບິກ ຜູ້ພິພາກສາຝ່າຍເສລີນິຍົມ ທີ່ເສຍຊີວິດໃນເດືອນກັນຍາຜ່ານມາ.
ໂດຍວຸດທິສະພາທີ່ມີສະມາຊິກພັກຣີພັບລິກັນຄອງສຽງສ່ວນຫລາຍລົງມະຕິຮັບຮອງນາງ ບາເຣດ ດ້ວຍຄະແນນ 52 ຕໍ່ 48 ສຽງ ໂດຍມີ ສ.ວ ຈາກຣີພັບລິກັນພຽງຄົນດຽວທີ່ລົງຄະແນນຄັດຄ້ານ ແລະ ເຫັນພ້ອມກັບ ສ.ວ ຈາກພັກເດໂມແຄຣດ ຄືທ່ານ ຊູຊານ ຄໍລິນ ສ.ວ ຈາກລັດເມນ.
ມະຕິດັ່ງກ່າວຖືເປັນໄຊຊະນະຄັ້ງສຳຄັນຂອງປະທານາທິບໍດີ ທຣຳ ແລະ ພັກຣີພັບລິກັນ ທີ່ຈະເຮັດໃຫ້ສານສູງສຸດ ເຊິ່ງເປັນອົງກອນທີ່ສຳຄັນຂອງສັງຄົມອາເມລິກາມີຄວາມເປັນອະນຸລັກນິຍົມຫລາຍຂຶ້ນ ສົ່ງຜົນໃຫ້ອັດຕາຈຳນວນຜູ້ພິພາກສາຫົວອະນຸລັກນິຍົມຕໍ່ຜູ້ພິພາກສາຫົວເສລີນິຍົມໃນສານສູງສຸດມີ 6 ຕໍ່ 3 ຄົນ.
ຜົນສໍາເລັດໃນການແຕ່ງຕັ້ງນາງ ບາເຣດ ໃນຄັ້ງນີ້ມີສ່ວນສຳຄັນໃນການກຳນົດທິດທາງການເມືອງອາເມລິກາຕໍ່ຈາກນີ້ ເພາະຜູ້ພິພາກສາສານສູງສຸດຈະດຳລົງຕຳແໜ່ງຕະຫລອດຊີວິດ ເຊິ່ງຄາດວ່ານາງ ບາເຣດ ຈະມີສ່ວນສຳຄັນໃນການພິຈາລະນາຍົກເລີກກົດໝາຍໂອບາມາແຄ (Affordable Care Act) ເຊິ່ງມີກຳນົດຕັດສິນໃນໄລຍະຫລັງການເລືອກຕັ້ງ ລວມທັງການພິຈາລະນາຜົນການເລືອກຕັ້ງປະທານາທິບໍດີອາເມລິກາໃນຄັ້ງນີ້ ຖ້າມີການປະກາດຜົນຊັກຊ້າ ເນື່ອງຈາກມີທ່າອ່ຽງຈະນັບຄະແນນ ແລະ ຕັດສິນຄະແນນໃໝ່ໃນຫລາຍໆລັດ ເຊິ່ງຖືວ່າທ່ານ ທຣຳ ແລະ ພັກຣີພັບລິກັນມີຄະແນນເປັນຕໍ່ໃນເກມນີ້ສູງ ເຖິງວ່າຈະໄດ້ຮັບສຽງຄັດຄ້ານຈາກພັກເດໂມແຄຣດ ແລະ ພົນລະເມືອງອາເມລິກາຈຳນວນບໍ່ໜ້ອຍວ່າການພິຈາລະນາ ແລະ ຮັບຮອງຜູ້ພິພາກສາສານສູງສຸດຄົນໃໝ່ໃນໄລຍະກ່ອນການເລືອກຕັ້ງພຽງ 1 ອາທິດອາດບໍ່ແມ່ນໄລຍະເວລາທີ່ເໝາະສົມກໍຕາມ.
