ເລັ່ງສ້າງຂະບວນການຕ້ອນຮັບວັນຊາດຄົບຮອບ 45 ປີ
ໂດຍ: ທິດກໍ່າ
ຍັງອີກພຽງເດືອນກວ່າໆ ວັນຊາດທີ 2 ທັນວາ ຄົບຮອບ 45 ປີ (2/12/1975 – 2/12/2020) ກໍຈະໝູນວຽນມາບັນຈົບຄົບຮອບອີກວາລະໜຶ່ງ. ຕາມທິດກໍ່າວ່າ, ວັນຊາດປີນີ້ຍິ່ງມີຄວາມໝາຍສຳຄັນທາງດ້ານປະຫວັດສາດຂອງຊາດລາວ, ຄົນລາວເຮົາ ຍ້ອນວ່າປີນີ້ເປັນປີຄົບຮອບ 45 ປີ ແຫ່ງການສ້າງຕັ້ງລະບອບໃໝ່, ປະເທດໃໝ່ຄື: ສາທາລະນະລັດ ປະຊາທິປະໄຕ ປະຊາຊົນລາວ. ເມື່ອຫວນຄືນເບິ່ງປະຫວັດສາດໃນຫລາຍຍຸກຫລາຍສະໄໝຜ່ານມາ, ກວ່າປະເທດຊາດບ້ານເມືອງຈະກ້າວເດີນມາໄດ້ເຖິງຈຸດນີ້ ພວກເຮົາໄດ້ຜ່ານພົ້ນ ແລະ ຜ່ານຜ່າບັນດາກະແສຟອງປະຕິວັດແຫ່ງການຕໍ່ສູ້ທີ່ລະອິດລະອ້ຽວມາຫລາຍເຊັ່ນຄົນ ນັບແຕ່ຂະບວນຕໍ່ສູ້ເພື່ອເອກະລາດ, ອິດສະຫລະພາບ ມາຮອດການປະຕິວັດຊາດປະຊາທິປະໄຕ ເພື່ອປົດປ່ອຍປະເທດຊາດ, ກ້າວສູ່ໄລຍະປົກປັກຮັກສາ ແລະ ສ້າງສາປະເທດຊາດມາຢ່າງໂຊກໂຊນ, ທໍລະຫົດອົດທົນ ທັງເສຍສະຫລະເລືອດເນື້ອຈາກບັນພະບູລຸດ, ນັກຕໍ່ສູ້, ນັກປະຕິວັດ ແລະ ປະຊາຊົນບັນດາເຜົ່າຜູ້ຮັກຊາດທີ່ກ້າແກ່ນມາຢ່າງນັບບໍ່ຖ້ວນ.
ໃນຕະຫລອດໄລຍະ 45 ປີແຫ່ງການສ້າງສາ ແລະ ພັດທະນາປະເທດຊາດ ພາຍໃຕ້ການນຳພາຂອງພັກປະຊາຊົນປະຕິວັດລາວ ແລະ ລັດຖະບານ ສາທາລະນະລັດ ປະຊາທິປະໄຕ ປະຊາຊົນລາວມານີ້ ແມ່ນໄດ້ເຮັດໃຫ້ປະເທດຊາດບ້ານເມືອງຂອງພວກເຮົາມີຄວາມສະຫງົບສຸກຮົ່ມເຢັນ, ລະບົບການເມືອງນັບມື້ມີສະຖຽນລະພາບໝັ້ນຄົງ. ເສດຖະກິດກໍມີການຂະຫຍາຍຕົວຢ່າງຕໍ່ເນື່ອງ, ສັງຄົມນັບມື້ມີຄວາມຈະເລີນຮຸ່ງເຮືອງ, ສີວິໄລ, ຊີວິດການເປັນຢູ່ຂອງປະຊາຊົນບັນດາເຜົ່າກໍນັບມື້ດີຂຶ້ນເທື່ອລະກ້າວ ອັນເຮັດໃຫ້ສີສັນຂອງລະບອບໃໝ່ ກໍຄື ສາທາລະນະລັດ ປະຊາທິປະໄຕ ປະຊາຊົນລາວ ໂດດເດັ່ນ ແລະ ກ້າວເດີນໄປບົນເສັ້ນທາງອັນສະຫງ່າງາມຂອງຍຸກສະໄໝນັ້ນກໍຄື ປະເທດຊາດໄດ້ມີເອກະລາດ ແລະ ມີອະທິປະໄຕຢ່າງສົມບູນແບບ.
ເພາະສະນັ້ນ ການປະກາດລຶບລ້າງລະບອບເກົ່າ ອັນໄດ້ແກ່ ລະບອບສັກດີນາ ທີ່ປົກຄອງບ້ານເມືອງມາຫລາຍຮ້ອຍປີ ແລ້ວປະກາດສ້າງຕັ້ງລະບອບໃໝ່ໃນວັນທີ 2 ທັນວາ 1975 ຈຶ່ງເປັນຂີດໝາຍອັນສຳຄັນ ທັງເປັນບາດລ້ຽວປະຫວັດສາດຂອງຊາດ ແລະ ຂອງປະຊາຊົນບັນດາເຜົ່າເຮົາໃນຍຸກໃໝ່ສັງຄົມໃໝ່ທີ່ບໍ່ທັນເຄີຍມີມາໃນປະຫວັດສາດຂອງຊາດລາວຄົນລາວ. ເພື່ອເຮັດໃຫ້ວັນຊາດທີ 2 ທັນວາ ຄົບຮອບ 45 ປີ ເຕັມໄປດ້ວຍບັນຍາກາດອັນຟົດຟື້ນ ແລະ ມີຄວາມໝາຍທາງດ້ານປະຫວັດສາດ ພວກເຮົາຄວນພ້ອມກັນຍິນດີ, ປິຕິຊົມຊື່ນ ແລະ ທະນົງໃຈຍິ່ງກວ່າເວລາໃດໝົດ ເພື່ອພ້ອມໃຈກັນເລັ່ງສ້າງຂະບວນການຕ່າງໆເຊັ່ນ: ເຄື່ອນໄຫວສ້າງກິດຈະກຳເລົ່າມູນເຊື້ອວັນຊາດ 2 ທັນວາ ຄົບຮອບ 45 ປີ, ຈັດການສຳມະນາຖາມ-ຕອບວິທະຍາສາດໃນສະຖາບັນການສຶກສາ, ອອກແຮງນຳເອົາຜົນສຳເລັດໃນພາລະກິດສ້າງສາພັດທະນາປະເທດຊາດໃນໄລຍະ 45 ປີ ເພື່ອໂຄສະນາຜ່ານສື່ຕ່າງໆຢ່າງເຖິງຖອງ, ປະດັບປະດາ, ອະນາໄມຕາມຄຸ້ມບ້ານ, ສຳນັກງານອົງການ, ຖະໜົນຫົນທາງ ແລະ ສະຖານທີ່ສາທາລະນະໃຫ້ມີຄວາມສະອາດສວຍງາມ.
ນອກຈາກນັ້ນ ກໍພ້ອມກັນອອກແຮງເຮັດວຽກງານຕາມການມອບໝາຍດ້ວຍຄວາມສັດຊື່ບໍລິສຸດ ແລະ ມີຄວາມຮັບຜິດຊອບສູງໃນໜ້າທີ່, ເພີ່ມທະວີຄວາມເອົາໃຈໃສ່ຕໍ່ວຽກງານວິຊາສະເພາະ, ພ້ອມກັນປົກປັກຮັກສາຄວາມສະຫງົບສຸກ, ຄວາມເປັນລະບຽບຮຽບຮ້ອຍຕາມເຮືອນຊານບ້ານຊ່ອງ, ຕາມຄຸ້ມບ້ານໃຫ້ມີຄວາມສະຫງົບປອດໄພ. ອັນພິເສດສຸດກໍແມ່ນການຫັນປ່ຽນຈາກແນວຄິດອັນເກົ່າຫລ້າຫລັງ ແລະ ຫຍໍ້ທໍ້ໄປສູ່ແນວຄິດອັນໃໝ່ທີ່ກ້າວໜ້າ, ມີວິໄສທັດອັນກວ້າງໄກ ເພື່ອພັດທະນາຕົນເອງ, ຄອບຄົວໃຫ້ຢູ່ເຢັນເປັນສຸກ, ພ້ອມກັນປະຕິບັດຄຳສັ່ງ ແລະ ມະຕິຕ່າງໆທີ່ທາງຂັ້ນເທິງ ກໍຄືພັກ ແລະ ລັດຖະບານວາງອອກ. ດັ່ງພວກເຮົາໄດ້ຮັບຮູ້ ແລະ ເຫັນນຳກັນມາແລ້ວວ່າ, ສະພາບຢູ່ປະເທດເຮົາໃນປັດຈຸບັນແມ່ນພວມຢູ່ໃນໄລຍະຕ້ານໂຣກລະບາດຂອງໂຄວິດ-19. ພ້ອມດຽວກັນນີ້ ບັນດາແຂວງພາກກາງ ເປັນຕົ້ນແຂວງສະຫວັນນະເຂດໄດ້ມີຫລາຍເມືອງພວມປະສົບບັນຫາໄພນ້ຳຖ້ວມຢ່າງໃຫຍ່ຫລວງ ແລະ ເປັນບໍລິເວນກວ້າງ, ຕ້ອງຮ່ວມແຮງຮ່ວມໃຈສາມັກຄີຊ່ວຍເຫລືອກັນ ເພື່ອກູ້ເອົາປະຊາຊົນຕາມບ້ານເຮືອນທີ່ຖືກຜົນກະທົບໃຫ້ຜ່ານພົ້ນຈາກວິກິດນີ້ໄປດ້ວຍດີ.
ສະເພາະຢູ່ນະຄອນຫລວງວຽງຈັນເຮົາປີນີ້ ຄາດວ່າຈະບໍ່ມີເຫດການນ້ຳຖ້ວມເໝືອນດັ່ງຫລາຍປີຜ່ານມາ ແລະ ໄລຍະນີ້ກໍພວມຢູ່ໃນການບູລະນະປະດັບປະດາດອກໄຟເຍືອງທາງໃຫ້ມີສີສັນສວຍງາມຂຶ້ນຕື່ມ ເຊິ່ງໂຄງການນີ້ໄດ້ຮັບການຊ່ວຍເຫລືອລ້າຈາກ ສປ ຈີນ. ຄາດວ່າເມື່ອຮອດວັນຊາດທີ 2 ທັນວາ 2020 ນະຄອນຫລວງວຽງຈັນ ອັນເປັນສູນກາງເສດຖະກິດ-ສັງຄົມຂອງປະເທດຈະມີຄວາມສວຍງາມຂຶ້ນກວ່າເກົ່າ. ສ່ວນບັນຫາອັນລວມຍອດໃນພາລະກິດຕ່າງໆຂອງປະເທດຊາດໃນໄລຍະ 45 ປີຜ່ານມາ ກໍຍິ່ງມີຜົນສຳເລັດໃນທຸກດ້ານ. ມາຮອດປັດຈຸບັນ ໂຄງການໃຫຍ່ໆເຊັ່ນ: ໂຄງການພັດທະນາເຂື່ອນໄຟຟ້າກໍສຳເລັດໄປແລ້ວ 70 ກວ່າໂຄງການ, ໂຄງການສ້າງທາງລົດໄຟຄວາມໄວສູງ ລາວ-ຈີນ ກໍຈະໄດ້ເປີດນຳໃຊ້ໃນປີ 2021, ໂຄງການສ້າງເສັ້ນທາງດ່ວນ ວຽງຈັນ-ວັງວຽງ ກໍຈະເປີດນຳໃຊ້ໃນເດືອນທັນວາປີ 2020 ນີ້ເອງ. ນອກນັ້ນ ໂຄງການກໍ່ສ້າງຖະໜົນຫົນທາງໃນທົ່ວປະເທດ, ໂຄງການກໍ່ສ້າງເຂດເສດຖະກິດສະເພາະ ແລະ ເຂດເສດຖະກິດພິເສດກໍໄດ້ສຳເລັດເປັນສ່ວນຫລາຍ. ບັນຫາການຄ້າການລົງທຶນກໍພວມຢູ່ໃນທ່າກ້າວໄປຢ່າງບໍ່ຢຸດຢັ້ງ. ໂຄງການກໍ່ສ້າງສຳນັກງານອົງການ, ໂຮງຈັກໂຮງງານ, ພື້ນຖານການຜະລິດ, ບ້ານເຮືອນຂອງປະຊາຊົນ ນັບແຕ່ຕົວເມືອງຫາຊົນນະບົດໃນທົ່ວປະເທດກໍພວມແຕກໜໍ່ຈໍ່ແນວ ແລະ ຂະຫຍາຍຕົວໄປຢ່າງກວ້າງຂວາງໄວວາທີ່ສຸດ.
ສະຫລຸບແລ້ວ, ທຸກສິ່ງທຸກຢ່າງໃນພາລະກິດສ້າງສາ ແລະ ພັດທະນາປະເທດຊາດແມ່ນມີຜົນສຳເລັດຕາມແຜນພັດທະນາເສດຖະກິດ-ສັງຄົມຂອງປະເທດ. ຄາດວ່າເພື່ອຂໍ່ານັບຮັບຕ້ອນວັນຊາດທີ 2 ທັນວາ ຄົບຮອບ 45 ປີ ພວກເຮົາໄດ້ມີຜົນສຳເລັດຢ່າງຍິ່ງໃຫຍ່ໃນພາລະກິດສ້າງສາ ແລະ ພັດທະນາປະເທດຊາດ.
