ກະຊວງ ຖວທ ແລະ ກາແດງລາວ ໄດ້ຮ່ວມຈັດກິດຈະກຳຮັບບໍລິຈາກວັດຖຸປັດໃຈ ຊ່ວຍເຫຼືອຜູ້ປະສົບໄພນ້ຳຖ້ວມຢູ່ແຂວງພາກກາງແລະພາກໃຕ້

ສາມອົງການຈັດຕັ້ງມະຫາຊົນ ກະຊວງຖະແຫຼງຂ່າວ, ວັດທະນາທຳ ແລະ ທ່ອງທ່ຽວ ຮ່ວມກັບອົງການກາແດງລາວ ​ໄດ້ຈັດກິດຈະກໍາຮັບບໍລິຈາກວັດຖຸ​ປັດ​ໄຈ​ຕ່າງໆ ເພື່ອຊ່ວຍເຫຼືອຜູ້ປະສົບ​ໄພນ້ຳຖ້ວມຢູ່ແຂວງພາກກາງ ແລະ ພາກ​ໃຕ້ຂຶ້ນ ໃນຕອນເຊົ້າວັນທີ 23 ຕຸລານີ້ ທີ່​ຫໍ​ວັດທະນະທຳ​ແຫ່ງ​ຊາດ ​ໂດຍມີທ່ານ ວັນສີ ກົວມົວ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ​ແລະ ທ່ານ ທອງພະຈັນ ສອນນະສິນ ຮອງປະທານອົງການກາແດງລາວ ເຂົ້າຮ່ວມ.

ເລຂາຄະນະບໍລິຫານງານຊາວໜຸ່ມກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໃຫ້ຮູ້ວ່າ: ການຈັດກິດຈະກຳຮັບບໍລິຈາກວັດຖຸປັດໃຈເພື່ອຊ່ວຍເຫຼືອຜູ້ປະສົບໄພນ້ຳຖ້ວມຄັ້ງນີ້ ໂດຍໄດ້ຮັບການຊີ້ນຳຈາກສູນກາງຊາວໝຸ່ມປະຊາຊົນປະຕິວັດລາວ, ປຸກລະດົມຊຸກຍູ້ກະຊວງ, ອົງການຈັດຕັ້ງທັງພາກລັດ ແລະ ເອກະຊົນ, ນັກທຸລະກິດ, ພໍ່ຄ້າຊາວຂາຍ ແລະ ປະຊາຊົນລາວບັນດາເຜົ່າຮ່ວມຈິດຮ່ວມໃຈກັນ ເພື່ອຊ່ວຍເຫຼືອຜູ້ປະສົບໄພທຳ​ມະ​ຊາດ​ດັ່ງກ່າວ​ໃຫ້​ມີ​ເງື່ອນ​ໄຂ​ຟື້ນຟູ​ຊີວິດ​ການ​ເປັນ​ຢູ່​ກັບ​ສູ່​ສະພາບ​ປົກກະຕິ​ໂດຍ​ໄວ.