ອຸຕຸເຕືອນໃຫ້ລະວັງພາຍຸໂຊເດວ

ກົມ​ອຸຕຸນິຍົມ ​ແລະ ອຸ​ທົກ​ກະສາ​ດ ​ໄດ້​ອອກ​ແຈ້ງ​ເຕືອນ​ປະຊາຊົນ​ໃນ​ຂອບ​ເຂດ​ທົ່ວ​ປະ​ເທດ ​​ໃຫ້​ລະວັງ ​ແລະ ກຽມ​ຄວາມ​ພ້ອມ​ຮັບ​ມື​ກັບ​ສະພາບ​ນ້ຳປ່າ​ໄຫລຊຸ, ນ້ຳຖ້ວມ​ຢູ່​ຫລາຍ​ທ້ອງ​ຖິ່ນ ​ເນື່ອງ​ຈາກ​ວ່າ​ພາຍຸ​ໄຕ້​ຝຸ່ນ​ໂຊ​ເດ​ວ (TY Saudel) ຫົວທີ 17 ປະຈໍາປີ 2020 ປັດຈຸບັນ​ກຳລັງ​ເຄື່ອນ​ທີ່ຢູ່​ເຂດ​ທະ​ເລ​ຈີນ​ໃຕ້​ຕອນ​ກາງ ​ເຊິ່ງ​ໃນ​ວັນ​ທີ 23 ຕຸລາ​ນີ້ ມີ​ຈຸດ​ສູນ​ກາງ​ຢູ່​ເສັ້ນຂະໜານ​ທີ 17,5 ອົງສາ​ເໜືອ ​ແລະ ​ເສັ້ນ​ແວງ​ທີ 115,3 ອົງສາ​ຕາ​ເວັນ​ອອກ ພວມ​ເຄື່ອນ​ທີ່​ມາ​ທາງ​ທິດຕາ​ເວັນ​ຕົກ-ຕາ​ເວັນ​ຕົກ​ສຽງ​ເໜືອ​ຢ່າງ​ຊ້າໆ. ຄາດ​ຄະ​ເນ​ວ່າ​ຈະ​ເຄື່ອນ​ຂຶ້ນຝັ່ງ​ທາງ​ພາກ​ກາງຂອງ ສສ ຫວຽດນາມ ​ແລະ ສືບ​ຕໍ່​ຜ່ານ​ເຂົ້າ​ແຂວງ​ພາກ​ໃຕ້​ຫາ​ພາ​ກກາງຂອງ​ລາວ​ໃນ​ວັນ​ທີ 25-26 ຕຸລາ​ນີ້ ​ເຊິ່ງຈະ​ເຮັດ​ໃຫ້​​ເກີດ​ຝົນຕົກ​ໃນ​ລະດັບ​ປານ​ກາງ​ຫາຕົກ​ໜັກ ພ້ອມ​ມີ​ລົມ​ພັດ​ແຮງ​ຢູ່​ບັນດາ​ແຂວງ​ພາກ​ກາງ ​ແລະ ພາກ​ໃຕ້​ໃນ​ວັນ​ທີ 25-27 ຕຸລາ​ນີ້.

ດັ່ງນັ້ນ ຈຶ່ງ​ແຈ້ງ​ເຕືອນ​ໃຫ້​ປະຊາຊົນ​ໃນ​ເຂດ​ດັ່ງກ່າວ​ມີ​ສະຕິ​ຕໍ່​ສະພາບ​ຝົນຕົກ​ໜັກ, ນ້ຳຖ້ວມ ​ແລະ ​ໃຫ້​ຕິດຕາມ​ຂ່າວ​ພະຍາກອນ​ອາກາດ​ຈາກ​ກົມ​ອຸຕຸນິຍົມ ​ແລະ ອຸ​ທົກ​ກະສາ​ດ​ເປັນ​ປະຈຳ.