ສປປ ລາວ ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ອາຊຽນ ແລະ ສະຫະປະຊາຊາດ ແບບທາງໄກ
ແລງວັນທີ 21 ຕຸລານີ້ ທີ່ກະຊວງການຕ່າງປະເທດ, ທ່ານ ສະເຫລີມໄຊ ກົມມະສິດ ລັດຖະມົນຕີຕ່າງປະເທດ ແຫ່ງ ສປປ ລາວ ໄດ້ນຳພາຄະນະເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນ ແລະ ສະຫະປະຊາຊາດ (ສປຊ) ປະຈໍາປີ ແບບທາງໄກ (ASEAN-United Nations Ministerial Meeting) ພາຍໃຕ້ການເປັນປະທານຂອງທ່ານ ຟາມ ບິງ ມິງ ຮອງນາຍົກລັດຖະມົນຕີ, ລັດຖະມົນຕີຕ່າງປະເທດ ແຫ່ງ ສສ. ຫວຽດນາມ ໃນນາມປະທານອາຊຽນ.
ກອງປະຊຸມໄດ້ຕີລາຄາສູງຕໍ່ຜົນການຈັດຕັ້ງປະຕິບັດການຮ່ວມມື ອາຊຽນ-ສປຊ ໃນໄລຍະ 1 ປີຜ່ານມາ ໂດຍສະເພາະການຜັນຂະຫຍາຍແຜນປະຕິບັດງານການຮ່ວມມື ອາຊຽນ-ສປຊ ໄລຍະ 2016-2020 ເຊິ່ງກວມເອົາ 3 ເສົາຄໍ້າປະຊາຄົມອາຊຽນ (ການເມືຶອງ-ຄວາມໝັ້ນຄົງ, ເສດຖະກິດ ແລະ ວັດທະນະທໍາ-ສັງຄົມ) ແລະ ການຈັດຕັ້ງປະຕິບັດບັນດາແຜນງານ/ໂຄງການຮ່ວມມືພາຍໃຕ້ຂອບການເຊື່ອມສານວິໃສທັດປະຊາຄົມອາຊຽນຮອດປີ 2025 ແລະ ບັນດາເປົ້າໝາຍພັດທະນາແບບຍືນຍົງ ສປຊ ຮອດປີ 2030 ເຊິ່ງໄດ້ປະກອບສ່ວນເຂົ້າໃນການສ້າງສັນຕິພາບ, ຄວາມໝັ້ນຄົງ ແລະ ການຊ່ວຍເຫລືອພັດທະນາຢູ່ພາກພື້ນ ກໍຄືໃນໂລກ. ເພື່ອເປັນພື້ນຖານໃຫ້ແກ່ການຈັດຕັ້ງປະຕິບັດການຮ່ວມມື ອາຊຽນ-ສປຊ ໃນໄລຍະຕໍ່ໜ້າ, ກອງປະຊຸມໄດ້ຮັບຮອງເອົາແຜນປະຕິບັດງານການຮ່ວມມື ອາຊຽນ-ສປຊ ສະບັບໃໝ່ ໄລຍະປີ 2021-2025 ແລະ ໄດ້ຢໍ້າຄືນເຖິງບົດບາດອັນສໍາຄັນຂອງ ສປຊ ໃນຖານະເປັນອົງການຈັດຕັ້ງຫລາຍຝ່າຍ ເພື່ອສືບຕໍ່ຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ຄວາມໝັ້ນຄົງຢູ່ພາກພື້ນ ແລະ ສາກົນຕາມກົດບັດ ສປຊ ທີ່ວາງໄວ້.
ສຳລັບທິດທາງໃນຕໍ່ໜ້າ, ທ່ານລັດຖະມົນຕີ ສະເຫລີມໄຊ ກົມມະສິດ ໄດ້ສະເໜີຕໍ່ກອງປະຊຸມພິຈາລະນາສືບຕໍ່ຮ່ວມມືກັນໃນຂະແໜງສາທາລະນະສຸກ ໂດຍສະເພາະການແລກປ່ຽນຂໍ້ມູນຂ່າວສານ ແລະ ບົດຮຽນທີ່ດີ ລວມທັງການຮ່ວມມືກັນໃນການຄົ້ນຄວ້າ-ພັດທະນາ ແລະ ຜະລິດຢາປົວພະຍາດ ກໍຄືຢາວັກແຊັງຕ້ານໂຄວິດ-19 ແລະ ການຮັບປະກັນການເຂົ້າເຖິງ ແລະ ສາມາດຮັບຢາປົວພະຍາດ ແລະ ຢາວັກແຊັງໃນເວລາທີ່ມີຢາດັ່ງກ່າວແລ້ວ; ຮັດແໜ້ນການຮ່ວມມືລະຫວ່າງສະຖາບັນສັນຕິພາບ ແລະ ຄວາມປອງດອງອາຊຽນ (AIPR) ແລະ ສປຊ ໃນການສ້າງຂີດຄວາມສາມາດ ແລະ ພັດທະນາບຸກຄະລາກອນດ້ານການໄກ່ເກຍ, ການເຈລະຈາ ແລະ ການຮັດແໜ້ນບົດບາດຂອງແມ່ຍິງ ກໍຄືຊາວໜຸ່ມ ແລະ ການສືບຕໍ່ຈັດຕັ້ງປະຕິບັດບັນດາເປົ້າໝາຍການພັດທະນາແບບຍືນຍົງ ສປຊ ຮອດປີ 2030 ລວມທັງການປ້ອງກັນ, ຮັບມື ແລະ ແກ້ໄຂຜົນກະທົບຈາກໄພພິບັດທາງທໍາມະຊາດ, ການປ່ຽນແປງຂອງດິນຟ້າອາກາດ ແລະ ການພັດທະນາຕົວເມືອງອັດສະລິຍະ.
ພ້ອມນີ້, ກອງປະຊຸມຍັງໄດ້ແລກປ່ຽນຄໍາຄິດຄໍາເຫັນນໍາກັນຕໍ່ບາງບັນຫາທີ່ພົ້ນເດັ່ນຢູ່ພາກພື້ນ ແລະ ສາກົນທີ່ມີຄວາມສົນໃຈຮ່ວມກັນ ເປັນຕົ້ນບັນຫາການແຜ່ລະບາດຂອງພະຍາດໂຄວິດ-19, ສັນຕິພາບ ແລະ ຄວາມໝັ້ນຄົງ ແລະ ອື່ນໆ.
