ລັດຖະບານ ຫວຽດນາມ ເນັ້ນໜັກບໍ່ປະໃຫ້ຜູ້ໃດຖືກຕົກຢູ່ໃນສະພາບອຶດຫິວ, ເຈັບເປັນ ຍ້ອນໄພທຳມະຊາດ
ທ່ານຮອງນາຍົກລັດຖະມົນຕີ ຫວຽດນາມ ຈິ້ງດິ່ງຢຸງ ເນັ້ນໜັກວ່າ, ພັກ, ລັດຖະບານ ຫວຽດນາມ ແລະ ອຳນາດການປົກຄອງທ້ອງຖິ່ນຕ່າງໆ ຕັດສິນໃຈບໍ່ປະໃຫ້ຜູ້ໃດຖືກຕົກຢູ່ໃນສະພາບອຶດຫິວ ແລະ ເຈັບເປັນ ຍ້ອນໄພທຳມະຊາດ
ໃນຊຸມວັນຜ່ານມາ, ຢູ່ຫຼາຍແຂວງພາກກາງຂອງ ຫວຽດນາມ ຖືກຜົນເສຍຫາຍຢ່າງໜັກໜ່ວງ ທັງຊີວິດອິນຊີ ແລະ ຊັບສິນ ຍ້ອນຝົນຕົກ, ນ້ຳຖ້ວມ. ໄລ່ຮອດເວລາ 17 ໂມງຂອງວັນທີ 20 ຕຸລາ, ຝົນຕົກ, ນໍ້າຖ້ວມ ໄດ້ເຮັດໃຫ້ມີຜູ້ເສຍຊີວິດ ແລະ ຫາຍສາບສູນ 133 ຄົນ, ພືດພັນທັນຍາຫານນັບພັນເຮັກຕາຖືກນ້ຳຖ້ວມ, ສັດລ້ຽງຖືກນ້ຳໄຫຼຊຸໄປໝົດ. ເສັ້ນທາງຫຼວງ, ເສັ້ນທາງແຂວງຕໍ່ແຂວງ ເງະອານ, ຮ່າຕີ໊ງ, ກວ໋າງບິ່ງ, ກວ໋າງຈິ ຖືກນ້ຳຖ້ວມ, ເປ່ເພ. ໃນການຢ້ຽມຢາມແຂວງ ກວ໋າງບິ່ງ ໃນຕອນບ່າຍວັນທີ 20 ຕຸລາ, ທ່ານຮອງນາຍົກລັດຖະມົນຕີ ຫວຽດນາມ ຈິ້ງດິ່ງຢຸງ ເນັ້ນໜັກວ່າ, ພັກ, ລັດຖະບານ ຫວຽດນາມ ແລະ ອຳນາດການປົກຄອງທ້ອງຖິ່ນຕ່າງໆ ຕັດສິນໃຈບໍ່ປະໃຫ້ຜູ້ໃດຖືກຕົກຢູ່ໃນສະພາບອຶດຫິວ ແລະ ເຈັບເປັນ ຍ້ອນໄພທຳມະຊາດ; ພ້ອມທັງ ຮຽກຮ້ອງໃຫ້ແຂວງ ກວ໋າງບິ່ງ ສືບຕໍ່ເອົາໃຈໃສ່ເຖິງຊີວິດການເປັນຢູ່ຂອງປະຊາຊົນ, ສະໜອງເຄື່ອງບັນເທົາທຸກທີ່ຈຳເປັນ, ນ້ຳສະອາດ ເພື່ອໃຫ້ພໍ່ແມ່ປະຊາຊົນມີຄວາມອຸ່ນອ່ຽນໃຈສ້າງຊີວິດການເປັນຢູ່ໃຫ້ເປັນປົກກະຕິພາຍຫຼັງຝົນຕົກ, ນ້ຳຖ້ວມ.
ທ່ານຮອງນາຍົກລັດຖະມົນຕີ ກໍຕັກເຕືອນວ່າ ໃນໄລຍະຈະມາເຖິງ, ສະພາບຝົນຕົກ, ນ້ຳຖ້ວມສືບຕໍ່ແກ່ຍາວ, ດັ່ງນັ້ນ, ແຂວງ ກວ໋າງບິ່ງ ຈົ່ງສືບຕໍ່ລະດົມແຫຼ່ງກຳລັງ ເພື່ອຮັບມືກັບສະພາບການ, ກອບກູ້ເອົາຊີວິດພໍ່ແມ່ປະຊາຊົນຢູ່ບັນດາເຂດຖືກນ້ຳຖ້ວມ, ບໍ່ປະໃຫ້ຜູ້ໃດຖືກເສຍຊີວິດຍ້ອນນ້ຳຖ້ວມ; ສຸມທຸກແຫຼ່ງກຳລັງເພື່ອຊ່ວຍເຫຼືອປະຊາຊົນ. ທາງແຂວງຈົ່ງສືບຕໍ່ລະດົມແຫຼ່ງກຳລັງຢ່າງສຸດຂີດ ເພື່ອຜັນຂະຫຍາຍວຽກງານຮັບມືກັບໄພທຳມະຊາດ; ປົກປັກຮັກສາບັນດາກິດຈະກຳທີ່ສຳຄັນ, ໂຄງການຊົນລະປະທານທີ່ຖືກເປ່ເພ, ຮັບປະກັນໃຫ້ບັນດາອ່າງເກັບນ້ຳໃນບໍລິເວນໄດ້ເຄື່ອນໄຫວຢ່າງປອດໄພ; ຮັບປະກັນໃຫ້ການສັນຈອນໄປມາກັບຄືນສູ່ສະພາບປົກກະຕິ.
