ສິງກະໂປໃຊ້ເຕັກໂນໂລຊີຢັ້ງຢືນໃບໜ້າລະບຸໂຕຕົນແທນບັດປະຈຳຕົວປະຊາຊົນເປັນຊາດທຳອິດຂອງໂລກ

ສິງກະໂປໃຊ້ເຕັກໂນໂລຊີໄບໂອເມທຣິກ ຫລື ການກວດສອບຂໍ້ມູນທາງຊີວະພາບ ທີ່ຈະເຮັດໃຫ້ຄົນສິງກະໂປສາມາດເຂົ້າເຖິງບໍລິການພາກເອກະຊົນ ແລະ ພາກລັດໄດ້ຢ່າງປອດໄພ ໂດຍໜ່ວຍງານດ້ານເຕັກໂນໂລຊີຂອງສິງກະໂປ ບອກວ່າ ສິ່ງນີ້ເປັນພື້ນຖານສຳຄັນຂອງເສດຖະກິດດິຈິຕັລຂອງປະເທດ.

ທັງນີ້ ໄດ້ມີການທົດລອງໃຊ້ງານກັບທະນາຄານແລ້ວ ແລະ ຕອນນີ້ກຳລັງເລີ່ມເອົາມາໃຊ້ທົ່ວປະເທດ. ເຕັກໂນໂລຊີດັ່ງກ່າວບໍ່ພຽງຊ່ວຍຢັ້ງຢືນໂຕບຸກຄົນ, ແຕ່ຍັງຊ່ວຍເຮັດໃຫ້ໝັ້ນໃຈວ່າບຸກຄົນນັ້ນມີຢູ່ຈິງ ແລະ ເຕັກໂນໂລຊີນີ້ຈະຖືກລວມເຂົ້າກັບ SingPass ເຊິ່ງເປັນລະບົບຢັ້ງຢືນໂຕຕົນດິຈິຕັລ ທີ່ໃຫ້ປະຊາຊົນເຂົ້າເຖິງບໍລິການຂອງລັດຖະບານໄດ້.

ທ່ານ ແອນດຣູ ບັດ ຜູ້ກໍ່ຕັ້ງ ແລະ ຜູ້ບໍລິຫານ ໄອພຣູບ ເຊິ່ງເປັນບໍລິສັດຂອງອັງກິດທີ່ຈັດຫາເຕັກໂນໂລຊີນີ້ ບອກວ່າ : “ນີ້ເປັນຄັ້ງທຳອິດທີ່ມີການໃຊ້ລະບົບຢັ້ງຢືນໃບໜ້າໂດຍການຈັດເກັບຂໍ້ມູນຜ່ານອິນເຕີເນັດແບບຄລາວ ເພື່ອໃຫ້ການຢັ້ງຢືນໂຕຕົນດິຈິຕັລຕາມແຜນງານແຫ່ງຊາດເປັນໄປຢ່າງປອດໄພ”  ທັງການຈື່ຈຳໃບໜ້າ ແລະ ການຢັ້ງຢືນໃບໜ້າ ລ້ວນແຕ່ຕ້ອງໃຊ້ວິທີສະແກນໃບໜ້າຂອງບຸກຄົນ ແລະ ຈັບຄູ່ກັບຮູບພາບທີ່ມີຢູ່ໃນຖານຂໍ້ມູນເພື່ອລະບຸໂຕຕົນ. ແຕ່ສິ່ງທີ່ແຕກຕ່າງກໍຄື ການຢັ້ງຢືນໃບໜ້າຕ້ອງໄດ້ຮັບການຍິນຍອມຈາກຜູ້ໃຊ້ ແລະ ຜູ້ໃຊ້ຈຶ່ງສາມາດເຮັດທຸລະກຳຕໍ່ໄປ ເຊັ່ນ : ປົດລັອກໂທລະສັບມືຖື ຫລື ເຂົ້າແອັບພລິເຄຊັນທະນາຄານເທິງສະມາດໂຟນ. ສ່ວນເຕັກໂນໂລຊີຈື່ຈຳໃບໜ້ານັ້ນ ອາດເປັນການສະແກນໃບໜ້າຜູ້ຄົນໃນສະຖານີລົດໄຟ ແລະ ຫາກກ້ອງກວດພົບໃບໜ້າຂອງອາດຊະຍາກອນທີ່ກຳລັງຖືກນຳໂຕກໍຈະແຈ້ງເຕືອນທາງການຕໍ່.

ທ່ານ ແອນດຣູ ບັດ ກ່າວຕື່ມວ່າ : ເຕັກໂນໂລຊີຈື່ຈຳໃບໜ້ານັ້ນຍັງສົ່ງຜົນກະທົບໃນດ້ານສັງຄົມຢູ່. ໃນຂະນະທີ່ການຢັ້ງຢືໃບໜ້ານັ້ນບໍ່ສົ່ງຜົນເສຍຫຍັງ, ແຕ່ຜູ້ທີ່ກັງວົນເລື່ອງຄວາມເປັນສ່ວນໂຕບໍ່ຄິດແບບນັ້ນ ພວກເຂົາຂັດແຍ່ງວ່າການໃຫ້ຄວາມຍິນຍອມຍັງຢູ່ໃນລະດັບຕໍ່າເມື່ອມີການເອົາຂໍ້ມູນທາງຊີວະພາບໄປໃຊ້.

“ການໃຫ້ຄວາມຍິນຍອມບໍ່ສົ່ງຜົນໃດໆຫາກມີຄວາມບໍ່ເທົ່າທຽມຂອງອຳນາດລະຫ່ວາງຜູ້ຄວບຄຸມກັບຜູ້ເປັນເຈົ້າຂອງຂໍ້ມູນ ດັ່ງທີ່ເຮົາໄດ້ເຫັນຈາກຄວາມສຳພັນລະຫ່ວາງປະຊາຊົນ ແລະ ລັດຖະບານ”- ທ່ານ ອິວານິສ ຄູວາຄັສ ເຈົ້າໜ້າທີ່ກົດໝາຍຂອງບໍລິສັດໄພຣເວຊີ ອິນເຕີເນຊັນແນລ ໃນລອນດອນ ບອກ.

ໃນສະຫະລັດອາເມລິກາ ແລະ ການາດາ ບໍລິສັດດ້ານເຕັກໂນໂລຊີຫລາຍແຫ່ງຫັນມາໃຊ້ເຕັກໂນໂລຊີຢັ້ງຢືນໃບໜ້າກັນແລ້ວ ດັ່ງ  ແອັບເປິ້ນ ແລະ ກູເກິ້ນ ທີ່ຮອງຮັບລະບົບການຢັ້ງຢືນໃບໜ້າເພື່ອເຮັດທຸລະກຳເທິງສະມາດໂຟນ. ສ່ວນ ອາລີບາບາຂອງຈີນກໍມີແອັບພລິເຄຊັນ ສະໄມທູເພ.

ລັດຖະບານໃນຫລາຍປະເທດກໍເລີ່ມໃຊ້ເຕັກໂນໂລຊີຢັ້ງຢືນໃບໜ້າເຊັ່ນກັນ,​ ແຕ່ມີພຽງບໍ່ເທົ່າໃດແຫ່ງທີ່ຜູກເຕັກໂນໂລຊີນີ້ເຂົາກັບລະບົບບັດປະຈຳຕົວປະຊາຊົນ ເຊິ່ງໃນບາງກໍລະນີກໍເປັນຍ້ອນບໍ່ມີການໃຊ້ບັດປະຈຳຕົວປະຊາຊົນ. ດັ່ງໃນສະຫະລັດອາເມລິກາ ປະຊາຊົນສ່ວນຫລາຍໃຊ້ໃບຂັບຂີ່ທີ່ອອກໃຫ້ໂດຍລັດຖະບານໃນການຢັ້ງຢືນໂຕບຸກຄົນ.

ເຖິງວ່າຈີນຈະຍັງບໍ່ພະຍາຍາມນຳເອົາເຕັກໂນໂລຊີນີ້ຢັ້ງຢືນໃບໜ້າມາລວມເຂົ້າກັບບັດປະຈຳຕົວປະຊາຊົນ,​ ແຕ່ປີກາຍນີ້ກໍອອກກົດໃຫ້ສະແກນໃບໜ້າຜູ້ທີ່ຊື້ໂທລະສັບມືຖືໜ່ວຍໃໝ່ ເພື່ອກວດສອບຄວາມຖືກຕ້ອງຄູ່ກັບບັດປະຈຳຕົວປະຊາຊົນ.

ແນວໃດກໍຕາມ, ເຕັກໂນໂລຊີຢັ້ງຢືນໃບໜ້າບໍ່ແມ່ນເລື່ອງໃໝ່ ເພາະມີການໃຊ້ງານຢ່າງແຜ່ຫລາຍຢູ່ແລ້ວ ທັງໃນສະໜາມບິນ ແລະ ໜ່ວນງານລັດຖະບານຫລາຍແຫ່ງ ດັ່ງກະຊວງປ້ອງກັນຄວາມສະຫງົບ ແລະ ບໍລິການສຸຂະພາບສາທາລະນະສຸກຂອງອັງກິດ ຫລື ກະຊວງຄວາມໝັ້ນຄົງແຫ່ງມາຕຸພູມຂອງສະຫະລັດອາເມລິກາ.

ສິງກະໂປເລີ່ມໃຊ້ເຕັກໂນໂລຊີນີ້ແລ້ວໃນບາງສາຂາຂອງສຳນັກງານພາກລັດ, ຢູ່ທະນາຄານ DBS ໃນສິງກະໂປ ກໍໃຫ້ລູກຄ້າເປີດບັນຊີທະນາຄານອອນລາຍໂດຍການຢັ້ງຢືນໃບໜ້າ ແລະ ມີຄວາມເປັນໄປໄດ້ວ່າຈະມີການໃຊ້ເຕັກໂນໂລຊີນີ້ຕາມພື້ນທີ່ໆຕ້ອງຮັກສາຄວາມປອດໄພ ຫລື ແມ່ນແຕ່ໃຊ້ໃນຫ້ອງສອບເສັງເພື່ອລະບຸໂຕຕົນນັກຮຽນ. ນອກຈາກນີ້, ພາກທຸລະກິດອື່ນໆສາມາດໃຊ້ເຕັກໂນໂລຊີນີ້ໄດ້ນຳ ຫາກມີຄຸນສົມບັດຄົບຕາມຂໍ້ກຳນົດຂອງລັດຖະບານ.

“ເຮົາບໍ່ໄດ້ຈຳກັດວ່າຈະໃຊ້ການຢັ້ງຢືນໃບໜ້າດິຈິຕັລແນວໃດ ຕາບໃດທີ່ມັນເປັນໄປຕາມກົດຂໍ້ບັງຄັບຂອງລັດຖະບານ” – ທ່ານ ກ໊ອກ ເຄວັກຊິນ ຜູ້ອຳນວຍການອາວຸໂສດ້ານກາລະບຸໂຕຕົນດິຈິຕັລແຫ່ງຊາດຂອງ ກອຟເທັກສິງກະໂປ ບອກ ແລະ ກ່າວຕື່ມວ່າ ຂໍ້ກຳນົດເບື້ອງຕົ້ນເລີຍກໍຄື ການໃຊ້ເຕັກໂນໂລຊີນີ້ຕ້ອງໄດ້ຮັບຄວາມຍິນຍອມ ແລະ ການຮັບຮູ້ຈາກບຸກຄົນນັ້ນ.

ກອຟເທັກສິງກະໂປ ຄິດວ່າເຕັກໂນໂລຊີນີ້ຈະສົ່ງຜົນດີຕໍ່ທຸລະກິດ ເພາະສາມາດນຳມາໃຊ້ງານໄດ້ໂດຍບໍ່ຕ້ອງລົງທຶນສ້າງໂຄງສ້າງພື້ນຖານເອງ ແລະ ທ່ານ ກ໊ອກ ກໍບອກວ່າມັນຊ່ວຍຮັກສາຄວາມເປັນສ່ວນໂຕຫລາຍຂຶ້ນນຳ ເນື່ອງຈາກບໍລິສັດຕ່າງໆບໍ່ຕ້ອງຈັດເກັບຂໍ້ມູນຊີວະພາບເຫລົ່ານີ້ ເພາະໃນການໃຊ້ງານຈິງ ຈະເຫັນພຽງໂຕເລກບອກຄະແນນບຸກຄົນທີ່ຖືກສະແກນວ່າມີຄວາມໃກ້ຄຽງກັບຮູບພາບໃນແຟ້ມຖານຂໍ້ມູນຂອງລັດຖະບານຫລາຍໜ້ອຍປານໃດ.