ອາສາສະໝັກທົດລອງວັກຊີນ “ໂຄວິດ” ຂອງ ອ໊ອກຟອດ ເສຍຊີວິດ

ລັດຖະບານ ບຣາຊີລ ຖະແຫຼງເຖິງການເສຍຊີວິດໜຶ່ງໃນອາສາສະໝັກເຂົ້າຮ່ວມໂຄງການທົດລອງປະສິດທິພາບຂອງວັກຊີນປ້ອງກັນໂຄວິດ-19 ຊຶ່ງບໍລິສັດ ແອສຕຣາ ເຊເນກາ ພັດທະນາຮ່ວມກັບມະຫາວິທະຍາໄລ ອ໊ອກຟອດ ຖືເປັນກໍລະນີທຳອິດຂອງໂລກ.

ສຳນັກຂ່າວຕ່າງປະເທດ ລາຍງານຈາກ ກຸງບຣາຊິເລຍ ປະເທດ ບຣາຊີລ ເມື່ອວັນທີ 21 ຕຸລາ ວ່າ ກະຊວງສາທາລະນະສຸກຂອງ ບຣາຊີລ ອອກມາຖະແຫຼງການເມື່ອວັນພຸດກ່ຽວກັບເລື່ອງເສຍຊີວິດຂອງອາສາສະໝັກຄົນໜຶ່ງ ຊຶ່ງເຂົ້າຮ່ວມໂຄງການທົດສອບປະສິດທິພາບວັກຊີນປ້ອງກັນເຊຶື້ອໄວຣັສໂຄໂຣນາສາຍພັນໃໝ່ ທີ່ພັດທະນາໂດຍບໍລິສັດ  ແອສຕຣາເຊເນກາ ຮ່ວມກັບມະຫາວິທະຍາໄລ ອ໊ອກຟອດ ຂອງລາຊະອານາຈັກ ອັງກິດ ແລະ ມີຊື່ທີ່ບໍ່ເປັນທາງການວ່າ “ChAdOx1 nCoV-19” ຖືເປັນການສູນເສຍຄັ້ງທຳອິດຂອງໂລກຈາກໂຄງການທົດລອງວັກຊີນດັ່ງກ່າວ ຊຶ່ງຢູ່ໃນລະຫ່ວາງການທົດສອບທາງ ຄລິນິກ ໄລຍະທີ 3.

ແອສຕຣາເຊເນກາ ຍັງບໍ່ທັນມີປະຕິກິລິຍາຕໍ່ບັນຫາດັ່ງກ່າວ ແຕ່ມະຫາວິທະຍາໄລ ອ໊ອກສຟອດ  ຖະແຫຼງການສະແດງຄວາມເສຍໃຈ ໄປຍັງຄອບຄົວຂອງຜູ້ເສຍຊີວິດ ແລະ ຢືນຢັນວ່າ ການທົດສອບ ໃນ ບຣາຊີລ ຈະເດີນໜ້າຕໍ່ໄປ ຫຼັງມີການປຶກສາຫາລືຢ່າງລະອຽດກັບທຸກຝ່າຍທີ່ກ່ຽວຂ້ອງ ລວມທັງມະຫາວິທະຍາໄລ ຊາວເປົາໂລ ຊຶ່ງເຮັດໜ້າທີ່ຄະນະກວດສອບອິດສະຫຼະ ແຕ່ຍັງບໍ່ທັນມີການໃຫ້ຂໍ້ມູນຊັດເຈນວ່າ ຜູ້ເສຍຊີວິດຢູ່ໃນກຸ່ມໄດ້ຮັບຢາປອມ ຫຼື ຢາແທ້.