ກະຊວງກະສິກຳ ປ່າໄມ້ ແລະ ບໍລິສັດ ສະຕາ ໂທລະຄົມ ຕົກລົງຮ່ວມມຶສຶກສາຄວາມເປັນໄປໄດ້ໂຄງການຫັນເປັນດິຈິຕ໋ອນ
ພິທີເຊັນບົດບັນທຶກຄວາມເຂົ້າໃຈ (MOU) ລະຫວ່າງ ກົມຊົນລະປະທານ, ກະຊວງກະສິກຳ. ປ່າໄມ້ ແລະ ບໍລິສັດ ສະຕາ ໂທລະຄົມ ຈຳກັດ (ຢູນິເທວ). ເພື່ອຮ່ວມມຶສຶກສາຄວາມເປັນໄປໄດ້ໂຄງການຫັນເປັນດິຈິຕ໋ອນ ໃນຍຸກອຸດສາຫາກຳ 4.0 ຢູ່ ສປປ ລາວ. ໄດ້ມີຂຶ້ນໃນວັນທີ 20 ຕຸລານີ້ທີ່ສຳນັກງານ ບໍລິສັດ ສະຕາ ໂທລະຄົມ. ໂດຍການເຂົ້າຮ່ວມຂອງ ທ່ານ ທອງເພັດ ວົງມະນີ ຮອງລັດຖະມົນຕີ ກະຊວງກະສິກຳ ແລະ ປ່າໄມ້ ແລະ ທ່ານ ລີວ ແມ໋ງ ຮ່າ ຜູ້ອຳນວຍການໃຫຍ່ ບໍລິສັດ ສະຕາ ໂທລະຄົມ
ເພື່ອແນ່ໃສ່ການພັດທະນາ Platform ໃຫ້ແກ່ ກິດຈະການຊົນລະປະທານ, ການປູກຝັງ, ລ້ຽງສັດ ແລະການປະມົງ, ແນ່ໃສ່ສົ່ງເສີມວຽກງານການນຳໃຊ້ເຕັກໂນໂລຊິເຂົ້າໃນວຽກງານການຄຸ້ມຄອງ ແລະ ບໍລິຫານ ຕອບສະໜອງໄດ້ກັບຄວາມຕ້ອງການ ຫັນເປັນດິຈິຕ໋ອນ ດ້ວຍລະບົບເຕັກໂນໂລຊິ ທີ່ທັນສະໄໝ ຕາມນະໂຍບາຍ ແລະ ແຜນພັດທະນາ ຂອງລັດຖະບານ. ສ້າງເງື່ອນໄຂໃຫ້ສອງຝ່າຍ ສຶກສາຄວາມເປັນໄປໄດ້ໂຄງການຫັນເປັນດິຈິຕ໋ອນ. ໃນການຄຸ້ມຄອງລະບົບຊົນລະປະທານຫັນເປັນທັນສະໄໝ ເພື່ອການຄຸ້ມຄອງນຳໃຊ້ນ້ຳຊົນລະປະທານ. ໃຫ້ມີປະສິດທິພາບຫຼຸດຜ່ອນຊັບພະຍາກອນນ້ຳ, ແຮງງານ ແລະຕົ້ນທຶນການຜະລິດກະສິກຳ ດ້ວຍລະບົບເທັກໂນໂລຊິ ທີ່ທັນສະໄໝ ປະກອບສ່ວນເຂົ້າໃນ ການຈັດຕັ້ງຜັນຂະຫຍາຍ ຍຸດທະສາດພັດທະນາກະສິກຳ ຮອດປີ 2025 ແລະ ວິໃສທັດຮອດປີ 2030.ໃຫ້ປະສົບຜົນສຳເລັດ.
