ລາວທົບທວນການຈັດຕັ້ງປະຕິບັດວຽກງານໂຕ້ຕອບພະຍາດໂຄວິດ-19
ໃນວັນທີ 21 ຕຸລານີ້, ກະຊວງສາທາລະນະສຸກ ໄດ້ຈັດກອງປະຊຸມທົບທວນຄືນການຈັດຕັ້ງປະຕິບັດໄລຍະຂ້າມຜ່ານໃນການໂຕ້ຕອບພະຍາດໂຄວິດ-19 ຂັ້ນສູນກາງ ເພື່ອກະກຽມຄວາມພ້ອມຮັບມືກັບການລະບາດທີ່ອາດຈະເກີດຂຶ້ນ ໂດຍສະເພາະເອົາໃຈໃສ່ຜູ້ທີ່ເດີນທາງມາຈາກປະເທດທີ່ມີການລະບາດ.
ກອງປະຊຸມໄດ້ທົບທວນຄືນການຈັດຕັ້ງປະຕິບັດໄລຍະຂ້າມຜ່ານໃນການໂຕ້ຕອບ ເພື່ອເປັນການຮຽນຮູ້ ແລະ ແລກປ່ຽນປະສົບການເຊິ່ງກັນ ແລະ ກັນ ແລະ ເພື່ອແນໃສ່ເສີມຂະຫຍາຍຈຸດດີ ແລະ ແກ້ໄຂຂໍ້ຄົງຄ້າງ ເພື່ອນຳໄປຜັນຂະຫຍາຍເຂົ້າໃນການໂຕ້ຕອບຕໍ່ການລະບາດຂອງພະຍາດໂຄວິດ-19 ໃນຕໍ່ໜ້າ ເນື່ອງຈາກວ່າພະຍາດໂຄວິດ-19 ນີ້ບໍ່ແມ່ນກະທົບແຕ່ສະເພາະສຸຂະພາບຂອງຄົນ, ແຕ່ຍັງມີຜົນກະທົບໃນທຸກຂະແໜງການ ນັບແຕ່ສູນກາງຮອດທ້ອງຖີ່ນ ໂດຍສະເພາະຊີວິດການເປັນຢູ່ຂອງປະຊາຊົນ. ດ້ວຍເຫດນັ້ນ ທຸກພາກສ່ວນທີ່ກ່ຽວຂ້ອງຈະຍັງຄົງສືບຕໍ່ຮ່ວມແຮງຮ່ວມໃຈກັນໃນການເອົາໃຈໃສ່ປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດຮ້າຍແຮງດັ່ງກ່າວ.
