ເສດຖະກິດຈີນຍັງເຕີບໃຫຍ່ສວນກະແສໂລກ GDP ໄຕມາດ 3 ຂະຫຍາຍຕົວ 4,9%
ລວມຍອດຜະລິດຕະພັນພາຍໃນຂອງຈີນເພີ່ມຂຶ້ນ 2 ໄຕມາດຕິດຕໍ່ກັນ ຫລັງຄວບຄຸມການລະບາດຂອງໂຄວິດ-19 ໄດ້ດີ ແລະ ການໃຊ້ຈ່າຍໃນປະເທດກັບສູ່ສະພາບປົກກະຕິ.
ວັນທີ 19 ຕຸລານີ້, ຂໍ້ມູນຈາກທາງການລະບຸວ່າ: ລວມຍອດຜະລິດຕະພັນພາຍໃນ ຫລື GDP ປະຈຳໄຕມາດທີ 3 ຂອງຈີນ ມີອັດຕາການເຕີບໃຫຍ່ໃນລະດັບ 4,9% ຖືເປັນສັນຍານວ່າເສດຖະກິດຍັງຟື້ນຕົວຢ່າງຕໍ່ເນື່ອງ ຫລັງໄດ້ຮັບຜົນກະທົບຈາກການລະບາດຂອງໂຄວິດ-19 ຢ່າງໜັກໃນຊ່ວງຕົ້ນປີ.
ຕົວເລກ GDP ຂອງເດືອນກໍລະກົດ-ກັນຍາ ເປັນການເຕີບໃຫຍ່ຕໍ່ເນື່ອງຈາກໄຕມາດ 2 ທີ່ຂະຫຍາຍຕົວ 3,2% ໂດຍນັກວິເຄາະເຊື່ອວ່າເປັນຜົນມາຈາກການລົງທຶນໃນສາທາລະນູປະໂພກ ແລະ ອະສັງຫາລິມະຊັບ ລວມທັງການສົ່ງອອກອຸປະກອນເອເລັກໂຕຣນິກ ແລະ ອຸປະກອນປ້ອງກັນຕົວຈາກເຊື້ອໄວຣັສ ທີ່ມີຄວາມຕ້ອງການສູງໃນໄລຍະຜ່ານມາ.
ເຖິງວ່າການເພີ່ມຂຶ້ນ 4,9% ຂອງ GDP ຈະໜ້ອຍກວ່າຕົວເລກທີ່ສຳນັກຕ່າງໆຄາດການໄວ້ກ່ອນໜ້ານີ້ໃນລະດັບ 5,2-5,3% ແຕ່ບໍ່ໄດ້ສົ່ງຜົນຕໍ່ຄວາມເຊື່ອໝັ້ນ ເນື່ອງຈາກມີປັດໄຈຫລາຍດ້ານທີ່ຍາກຕໍ່ການຄາດຄະເນ.
ຂະນະທີ່ຫລາຍປະເທດທົ່ວໂລກກຳລັງຜະເຊີນກັບບັນຫາໃນການຄວບຄຸມການລະບາດຂອງເຊື້ອໄວຣັສ, ຈີນທີ່ມີລາຍງານການຕິດເຊື້ອຄົນທຳອິດສາມາດຄວບຄຸມການລະບາດໄດ້ດີໃນໄລຍະຫລາຍເດືອນຜ່ານມາ ເຮັດໃຫ້ການບໍລິໂພກພາຍໃນປະເທດກັບສູ່ສະພາບປົກກະຕິອີກ ໂດຍສຳນັກງານສະຖິຕິແຫ່ງຊາດຂອງຈີນເປີດເຜີຍວ່າ: ທຸລະກິດຂາຍຍ່ອຍຂອງຈີນມີຍອດຂາຍເພີ່ມຂຶ້ນ 3,3% ໃນເດືອນກັນຍາຜ່ານມາ ເມື່ອທຽບໃສ່ໄລຍະດຽວກັນຂອງປີຜ່ານມາ.
ໃນໄລຍະເດືອນຕຸລາ ມີລາຍງານວ່າປະຊາຊົນຈີນ 425 ລ້ານກວ່າຄົນ ໄດ້ເດີນທາງອອກໄປທ່ອງທ່ຽວໃນມື້ພັກຍາວ ຫລັງຈາກຜ່ານມາ 2 ອາທິດ ຍັງບໍ່ມີລາຍງານການຕິດເຊື້ອຈາກກິດຈະກຳດັ່ງກ່າວ.
