ທ່ານນາຍົກລັດຖະມົນຕີໂອ້ລົມພະນັກງານການນໍາທີ່ສໍາເລັດການບໍາລຸງວຽກງານ ປກສ-ປກຊ ຊຸດທີ XIII

ການບໍາລຸງວຽກງານ ປກສ-ປກຊ ຊຸດທີ XIII ໃຫ້ແກ່ພະນັກງານການນໍາພັກ-ລັດຈໍານວນ 28 ທ່ານໄດ້ສໍາເລັດລົງໃນວັນທີ 27 ມິຖຸນານີ້, ພາຍຫລັງດໍາເນີນມາ 2 ເດືອນທີ່ວິທະຍາຄານປ້ອງກັນຊາດ ໄກສອນ ພົມວິຫານ ແລະ ໃນພິທີປິດຊຸດບໍາລຸງດັ່ງກ່າວ ກໍໄດ້ຮັບກຽດໂອ້ລົມຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ຊຶ່ງໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດຂອງຊຸດບໍາລຸງດັ່ງກ່າວ, ເຊິ່ງເປັນການປະກອບສ່ວນຍົກລະດັບຄວາມຮູ້ອັນໜຶ່ງໃຫ້ແກ່ການປະຕິບັດໜ້າທີ່ວຽກງານຂອງຕົນດ້ວຍຄວາມມີສະຕິ, ຄວາມຮັບພິຊອບ ແລະ ສິ່ງທີ່ຂາດບໍ່ໄດ້ກໍແມ່ນຄວາມຮັບຮູ້ທາງດ້ານແນວທາງນະໂຍບາຍຂອງພັກ, ແນວຄິດປະທານ ໄກສອນ ພົມວິຫານ ກ່ຽວກັບວຽກງານປ້ອງກັນຊາດ-ປ້ອງກັນຄວາມສະຫງົບ, ພ້ອມນີ້ທ່ານຍັງໄດ້ຍົກໃຫ້ເຫັນທິດທາງ ແລະ ຄວາມສໍາຄັນຂອງວຽກງານ ປກສ-ປກຊ ຕິດພັນກັບການພັດທະນາເສດຖະກິດ-ສັງຄົມ ແລະ ວຽກງານການຕ່າງປະເທດນັບຕັ້ງແຕ່ອະດີດຈົນເຖິງປັດຈຸບັນ ແລະ ແນ້ວໂນ້ມໃນອານາຄົດ ແລະ ໃນໂອກາດນີ້ທ່ານນາຍົກລັດຖະມົນຕີ ທອງລຸນ ສີສຸລິດ ຍັງໄດ້ເນັ້ນໃຫ້ພະນັກງານ ແລະ ກອງກໍາລັງ ປກສ-ປກຊ ທຸກຄົນ ຕ້ອງໄດ້ເຮັດວຽກຢ່າງມີສະຕິ, ມີຈິດໃຈບຸກບືນ ແລະ ມີມາດຕະການປະຢັດຊັດທ່ຽງ, ແຕ່ຈະເຮັດໄດ້ຄືແນວນັ້ນ, ພວກເຮົາຕ້ອງໄດ້ສ້າງຄວາມໂປ່ງໃສ, ຄວາມຊື່ສັດບໍລິສຸດຂອງພະນັກງານ-ນັກຮົບ ແລະ ຄວາມເປັນແບບຢ່າງນໍາໜ້າໃຫ້ແກ່ປະຊາຊົນບັນດາເຜົ່າ. ຊຸດອົບຮົມດັ່ງກ່າວຍັງໄດ້ຊ່ວຍປະກອບຄວາມຮັບຮູ້ໃໝ່ທາງດ້ານຫລັກມູນພື້ນຖານ, ທິດສະດີວິທະຍາສາດໃນການປ້ອງກັນຊາດ-ປ້ອງກັນຄວາມສະຫງົບໃນໄລຍະໃໝ່ຕື່ມອີກບາດກ້າວໜຶ່ງ ເປັນຕົ້ນ: ດ້ານູຄວາມຮູ້ພື້ນຖານຕໍ່ກັບວຽກງານ ປກຊ-ປກສ ໃນຂົງເຂດຍຸດທະສາດປ້ອງກັນຊາດ, ພ້ອມນັ້ນຍັງຊ່ວຍເສີມຂະຫຍາຍພາລະບົດບາດ, ໜ້າທີ່ເປັນເສນາທິການດ້ານວຽກງານ ປກຊ-ປກສ ໃຫ້ແກ່ພັກ-ລັດຖະບານ ແລະ ທ້ອງຖິ່ນໃນການຊີ້ນໍາບັນຊາກໍາລັງໃນຂົງເຂດຄວາມຮັບພິຊອບຂອງຕົນ.