ໂຮງໝໍອັງກິດຮັບບໍ່ໄຫວ ອັດປະຕູບໍ່ຮັບຄົນເຈັບ
ສຳນັກຂ່າວ The Independent ຂອງອັງກິດລາຍງານວ່າ: ບໍລິສັດໃນເຄືອມະຫາວິທະຍາໄລເບີມິງແຮມ ເຊິ່ງເປັນໂຮງໝໍໃຫຍ່ທີ່ສຸດແຫ່ງໜຶ່ງຂອງປະເທດຖືກບີບໃຫ້ຕ້ອງຍ້າຍຜູ້ຕິດເຊື້ອໂຄວິດໄປບ່ອນອື່ນ ແລະ ຈະເລີ່ມປະຕິເສດຄົນເຈັບຈາກພະແນກສຸກເສີນ ເນື່ອງຈາກການເພີ່ມຂຶ້ນຂອງຜູ້ຕິດເຊື້ອໂຄວິດ-19 ເຮັດໃຫ້ປະສິດທິພາບການຮັບຄົນເຈັບເຖິງຂີດຈຳກັດ.
ຜູ້ບໍລິຫານໂຮງໝໍບອກກັບ The Independent ວ່າ: ພວກເຂົາຈະ “ອັດປະຕູໜ້າ” ຂອງໂຮງໝໍຫລັກສາມແຫ່ງ ແລະ ບໍ່ຮັບຄົນເຈັບທີ່ບໍ່ແມ່ນກໍລະນີສຸກເສີນເປັນຄັ້ງທຳອິດ ໃຜກໍຕາມທີ່ບໍ່ໄດ້ປະສົບອຸປະຕິເຫດ ຫລື ບໍ່ມີເຫດສຸກເສີນຈະບໍ່ຮັບການປິ່ນປົວ.
ກ່ອນໜ້ານີ້, ໂຮງໝໍໃນລິເວີພູລ ແລະ ນ໊ອດຕິງແຮມເຕືອນວ່າ: ພວກເຂົາຈະຕ້ອງຍົກເລີກການບໍລິການບາງຢ່າງອີກ ເພາະໂຮງໝໍທາງຕາເວັນອອກສຽງເໜືອຂອງອັງກິດຕ້ອງຕໍ່ສູ້ກັບການແຜ່ລະບາດຂອງໂຄວິດ-19 ຫລາຍເທື່ອແລ້ວ.
ນອກຈາກນີ້, ມີລາຍງານວ່າໂຮງໝໍໄນຕິງເກລສາຂາຕ່າງໆໃນເມືອງແມນເຊັສເຕີ, ຊັນເດິແລນ ແລະ ແຮຮໍເກດຖືກຈັດໃຫ້ຢູ່ໃນສະຖານະກຽມພ້ອມ.
ສ່ວນສຳນັກຂ່າວ Reuters ລາຍງານວ່າ: ຜູ້ປະທ້ວງຕໍ່ຕ້ານການລັອກດາວລວມຕົວກັນໃນໃຈກາງນະຄອນຫລວງລອນດອນໃນວັນທີ 17 ຕຸລາ ຫລັງຈາກເມືອງຫລວງຂອງອັງກິດຍົກລະດັບການແຈ້ງເຕືອນໄພໂຄວິດ-19 ສູງສຸດເປັນອັນດັບສອງ.
ໃນເວລານີ້ ການລະບາດຮອບສອງກຳລັງເກີດຂຶ້ນ ລັດຖະບານຂອງນາຍົກລັດຖະມົນຕີ ບໍຣິສ ຈອນສັນ ໄດ້ເພີ່ມມາດຕະການລັອກດາວໃນທ້ອງຖິ່ນບາງສ່ວນຂອງອັງກິດ ເຊິ່ງມີການຕິດເຊື້ອເພີ່ມຂຶ້ນ ໂດຍຫວັງວ່າການລັອກດາວພື້ນທີ່ເຫລົ່ານີ້ຈະປ້ອງກັນເສດຖະກິດຂອງພາກພື້ນອື່ນໆທີ່ໄດ້ຮັບຜົນກະທົບໜ້ອຍກວ່າໃຫ້ດຳເນີນຕໍ່ໄປໄດ້.
ເມື່ອຮອດເວລາທ່ຽງຄືນ ລອນດອນໄດ້ເລື່ອນຂຶ້ນສູ່ລະດັບຄວາມສ່ຽງສູງ. ມາດຕະການນີ້ຫ້າມບໍ່ໃຫ້ຜູ້ຄົນພົບປະກັບໃຜກໍຕາມນອກເຮືອນ ລວມທັງໝູ່ ຫລື ຍາດພີ່ນ້ອງທີ່ຊ່ວຍເບິ່ງແຍງເດັກນ້ອຍ.
ກົດດັ່ງກ່າວຍັງຫ້າມບໍ່ໃຫ້ຜູ້ຄົນຫລາຍກວ່າ 6 ຄົນພົບປະກັນນອກເຮືອນ ເຖິງວ່າຕຳຫລວດຈະເລືອກບໍ່ບັງຄັບມາດຕະການນີ້ ເນື່ອງຈາກນັກປຸກລະດົມຕໍ່ຕ້ານການປິດກັ້ນຫລາຍພັນຄົນຍ່າງໄປຕາມຖະໜົນອ໊ອກຟອດ ເຊິ່ງເປັນຖະໜົນຊື້ເຄື່ອງທີ່ໜາແໜ້ນທີ່ສຸດແຫ່ງໜຶ່ງຂອງໂລກ ເພື່ອສະແດງຈຸດຢືນຕໍ່ຕ້ານມາດຕະການຂອງລັດ.
