ຕິດຕັ້ງປ້າຍຟື້ນຟູປ່າ ແລະ ປູກປ່າທົດແທນ 140 ຮຕ ຈາກການເກີດໄຟໃຫມ້
ໃນວັນທີ 16 ຕຸລາ ຜ່ານມານີ້, ທ່ານ ຂັນມີໄຊ ມີພິມວົງ ຮອງຫົວໜ້າຂະແໜງປ່າໄມ້, ທ່ານ ດຳ ເພີນຈິດ ຫົວໜ້າຫ້ອງການກະສິກຳ ແລະ ປ່າໄມ້ ເມືອງປາກກະດິງ ແຂວງບໍລິຄຳໄຊ ໄດ້ນຳພາອ້າຍນ້ອງວິຊາການຈາກແຂວງ ແລະ ເມືອງ ລົງສົມທົບກັບອຳນາດການປົກຄອງ ແລະ ປະຊາຊົນ ບ້ານນາບອນ ແລະ ບ້ານ ບໍ່ທຶນ ເມືອງປາກກະດິງ ເພື່ອຕິດຕັ້ງປ້າຍເຂດຟື້ນຟູປ່າໄມ້ ແລະ ປູກປ່າທົດແທນ ຂອງໂຄງການກໍ່ສ້າງແລວສາຍສົ່ງໄຟຟ້າ 500 ກິໂລໂວນ ແລະ ເນື້ອທີ່ຂະຫຍາຍຂຸດຄົ້ນແຮ່ຫີນຂອງໂຄງການກໍ່ສ້າງເຂື່ອນໄຟຟ້ານ້ຳເທີນ 1 ປີ 2020-2022 ຈຳນວນ 23 ປ້າຍ ບໍລິເວນສາຍພູງູ.
ເຂດດັ່ງກ່າວ ໄດ້ເກີດໄຟໄໝ້ໃນໄລຍະຍາມແລ້ງທີ່ຜ່ານມາ ຈຶ່ງໄດ້ມີແຜນປູກເສີມໃນເນື້ອທີ່ 140 ເຮັກຕາ ເບ້ຍໄມ້ທີ່ນຳມາປູກເສີມໃນຊ່ວງເດືອນ ມິຖຸນາ ທີ່ຜ່ານມາ ປະກອບມີ ເບ້ຍໄມ້ແຕ້ຂ່າ, ໄມ້ຂະຍຸງ, ໄມ້ດູ່, ໄມ້ດູ່ລາຍ, ໄມ້ແຄນ ແລະ ໄມ້ເກດສະນາຈຳນວນໜຶ່ງ ລວມເບ້ຍໄມ້ທີ່ໄດ້ປູກທັງໝົດ 112.000 ເບ້ຍ. ພ້ອມນີ້ທ່ານ ຄຳພັນ ສີໃສອ່ອນ ນາຍບ້ານນາບອນ ຕາງໜ້າໃຫ້ແກ່ອຳນາດການປົກຄອງ ແລະ ພໍ່ແມ່ປະຊາຊົນທັງ 2 ບ້ານ ໄດ້ໃຫ້ຄຳໜັ້ນສັນຍາວ່າ: ຈະຕັ້ງໜ້າປົກປັກຮັກສາປ່າໄມ້ ບໍ່ໃຫ້ມີການຕັດໄມ້ທຳລາຍປ່າ ຮັບປະກັນຈະບໍ່ໃຫ້ເກີດມີເຫດການໄຟໄໝ້ລາມປ່າ ພ້ອມກັນເປັນຫູເປັນຕາເພື່ອໃຫ້ເຂດດັ່ງ ກ່າວກັບມາອຸດົມສົມບູນ ເພື່ອອະນາຄົດຂອງລູກຫລານໃນພາຍພາກໜ້າ.
