ເຂື່ອນນ້ຳງື່ມແຈ້ງການ ລະບາຍນ້ໍາຜ່ານເຄື່ອງຈັກຂອງເຂື່ອນໄຟຟ້ານ້ໍາງື່ມ-1 ໃນຊ່ວງພາຍຸນັ່ງກາ (Nangk) 15-18/10 2020
ວັນທີ 15 ຕຸລານີ້ ເຂື່ອນໄຟຟ້ານໍ້າງື່ມ-1 ອອກແຈ້ງການເລກທີ 3288/ຜຟຟລ.ນງ
ໃຫ້ຮູ້ວ່າ: ປະຈຸບັນ ຈະມີພາຍຸພັດຜ່ານ ເຂດອ່າງໂຕ່ງນ້ໍາງື່ມ ຕາມກົມອຸຕຸນິຍົມ ແລະ ອຸທົກກະສາດ ແຈ້ງເຕືອນ ແລະ ລະດັບນ້ໍາໃນອ່າງ ຂອງເຂື່ອນຟຟ້ານ້ໍາງື່ມ-1 ເທົ່າກັບ 21.43 masl ເຊິ່ງເປັນລະດັບນ້ໍາທີ່ໃກ້ຈະເຕັມອ່າງ, ຍັງເຫຼືອຊ່ອງວ່າງທີ່ສາມາດຮັບນ້ໍາໄດ້ 283 ລ້ານ m ຫຼື ຍັງເຫຼືອ 0.87 m ຈະເຕັມອ່າງ ແລະ ເຂື່ອນໄຟຟ້ານ້ໍາງື່ມ-1 ມີຄວາມຈໍາເປັນຕ້ອງໄດ້ລະບາຍນ້ໍາເພີ່ມຂື້ນ ໂດຍຜ່ານເຄື່ອງຈັກເພື່ອຮອງຮັບນ້ໍາໃໝ່ທີ່ຈະເຂົ້າມາໃນອ່າງຂອງເຂື່ອນໃນຊ່ວງພາຍຸດັ່ງກ່າວ.
ສະນັ້ນ, ເຂື່ອນໄຟຟ້ານ້ໍາງື່ມ-1 ຂໍແຈ້ງມາຍັງ ຫ້ອງວ່າການປົກຄອງ ແຂວງວຽງຈັນ, ຫ້ອງວ່າການປົກຄອງ ນະຄອນຫຼວງວຽງຈັນ ແລະ ຫ້ອງວ່າການປົກຄອງເມືອງວຽງຄໍາ, ເມືອງແກ້ວອຸດົມ, ເມືອງທຸລະຄົມ, ເມືອງນາຊາຍທອງ, ເມືອງ ໄຊທານີ ແລະ ເມືອງປາກງື່ມ ຕະຫຼອດຮອດຜູ້ປະກອບການທຸລະກິດຮ້ານອາຫານເຮືອແພ, ປາກະຊັງ ແລະ ປະຊາຊົນທ້ອງຖິ່ນທີ່ອາໄສຢູ່ຕາມສາຍນໍ້າງື່ມຕອນລຸ່ມ ໃຫ້ມີສ່ວນຮ່ວມມີການຕິດຕາມເຝົ້າລະວັງລະດັບນ້ໍາທີ່ຈະເພີ່ມຂຶ້ນຕາມສາຍນ້ໍາງື່ມ ແລະ ຕິດຕາມການແຈ້ງເຕືອນລະດັບນ້ໍາຢ່າງໄກ້ຊິດເພື່ອຫຼີກລຽງຜົນກະທົບທີ່ອາດຈະເກີດຂຶ້ນ.
