ຖະແຫລ່ງຂ່າວໂຄງການບ້ານມົງຄຸນລາວ ສູນລວມສິນຄ້າຜະລິດຕະພັນລາວ

ພິທີຖະແຫລ່ງຂ່າວໂຄງການບ້ານມົງຄຸນລາວ ສູນລວມສິນຄ້າຜະລິດຕະພັນລາວໄດ້ມີຂຶ້ນໃນວັນທີ 14 ຕຸລານີ້ ຢູ່ບ້ານທົ່ງຂັນຄຳ ເມືອງຈັນທະບູລີ ນະຄອນຫລວງວຽງຈັນ, ໂດຍການເຂົ້າຮ່ວມຂອງນັກສົ່ງເສີ່ມວັດທະນະທຳລາວ ແລະ ມວນຊົນເປັນຈຳນວນຫລາຍ.

ໃນໂອກາດນີ້, ທ່ານ ນາງ ມຸກດາວັນ ແກ້ວວິໄລ ປະທານໂຄງການດັ່ງກ່າວ ໃຫ້ຮູ້ວ່າ: ໃນການສ້າງໂຄງການບ້ານມົງຄຸນລາວນີ້ ເພື່ອເປັນການສົ່ງເສີມສິນຄ້າຜະລິດຕະພັນລາວເຂົ້າສູ່ຕະຫລາດໂລກ, ສ້າງໃຫ້ເປັນຈຸດໃຈກາງໃນການຈຳໜ່າຍສິນຄ້າລາວສູ່ຕະຫລາດພູມີພາກ ແລະ ເປັນການສົ່ງເສີມວັດທະນະທຳອັນດີງາມຂອງຊາດລາວເຮົາໃຫ້ຍືນຍົງຄົງຕົວຢູ່ກັບຄົນລາວເຮົາຕະຫລອດໄປ ພ້ອມທັງເປັນການເຜີຍແຜ່ລົດຊາດອາຫານລາວອີກດ້ວຍ.

ນອກນີ້, ກໍເພື່ອໂຄສະນາ ແລະ ປະຊາສຳພັນເຜີຍແຜ່ໃຫ້ປະຊາຊົນລາວເຮົາ ລວມໄປເຖິງຊາວຕ່າງປະເທດຜູ້ທີ່ມີຄວາມສົນໃຈກ່ຽວກັບສີລະປະວັດທະນະທຳ, ວັນນະຄະດີລາວ, ຮີດຄອງປປະເພນີ ແລະ ມັກຮັກໃນຄວາມເປັນລາວ ລວມໄປເຖິງລົດຊາດອາຫານລາວ, ສີໄມ້ລາຍມື, ຄວາມຄິດພູມປັນຍາຂອງລາວ ໃຫ້ທຸກຄົນທຸກຊາດໃນທົ່ວສັງຄົມໄດ້ຮັບຮູ້ນຳອີກ.