ອິນໂດເນເຊຍເດີນໜ້າສ້າງໂຮງງານ ຜະລິດແບັດເຕີຣີລົດຍົນໄຟຟ້າ
ບໍລິສັດຂອງລັດຖະບານອິນໂດເນເຊຍຈັບມືຜະລິດແບັດເຕີຣີລົດຍົນໄຟຟ້າມຸ່ງຕໍ່ຍອດຜະລິດລົດຍົນໄຟຟ້າ.
ຣອຍເຕີລາຍງານວ່າ: ທ່ານ ໂອຣຽວ ເພທຣັດ ຜູ້ບໍລິຫານບໍລິສັດອຸດສາຫະກຳບໍ່ແຮ່ອິນໂດເນເຊຍ (MIND ID) ກ່າວວ່າ: ອິນໂດເນເຊຍໃນຖານະຜູ້ຜະລິດແຮ່ທາດນິກເກິລລາຍໃຫຍ່ທີ່ສຸດຂອງໂລກ ເຊິ່ງເປັນສ່ວນປະກອບສຳຄັນຂອງແບັດເຕີຣີລົດຍົນໄຟຟ້າ (EV) ຕ້ອງການສ້າງອຸດສາຫະກຳ EV ແບບບູລະນາການ ເຊິ່ງຈະລວມທັງການສ້າງລົດຍົນໃນທີ່ສຸດ.
ກຸ່ມບໍລິສັດຂອງລັດຖະບານອິນໂດເນເຊຍ ໄດ້ແກ່ ບໍລິສັດອຸດສາຫະກຳບໍ່ແຮ່ອິນໂດເນເຊຍ (MIND ID), ບໍລິສັດອາເນກາ ຕຳບັງ (ANTAM), ບໍລິສັດການໄຟຟ້າເປຣູຊາຮານ ລິສຕຣິກ ເນກາຣາ (PLN) ແລະ ບໍລິສັດນ້ຳມັນເພີຕາມິນາ ຈະຮ່ວມກັນຈັດຕັ້ງບໍລິສັດເພື່ອຜະລິດແບັດເຕີຣີສຳລັບຂັບເຄື່ອນລົດຍົນໄຟຟ້າທີ່ມີຊື່ວ່າ: ອິນໂດເນເຊຍ ແບັດເຕີຣີ ໂຮນດິ້ງ (Indonesia Battery Holding).
ປັດຈຸບັນ ກໍາລັງເຮັດແຜນການຮ່ວມມືທີ່ເປັນຮູບປະທຳ ເພື່ອໃຫ້ສາມາດດຳເນີນການໃຊ້ປະໂຫຍດຈາກນິກເກິລໃນການຜະລິດແບັດເຕີຣີໄດ້ໂດຍໄວ ແລະ ຈະສ້າງອຸດສາຫະກຳທີ່ຄວບຄຸມທຸກຂະບວນການ ນັບແຕ່ການຜະລິດສານເຄມີ ແລະ ແຮ່ທາດສຳລັບຜະລິດແບັດເຕີຣີໃໝ່ ໄປຈົນເຖິງການຣີໄຊເຄິລແບັດເຕີຣີເກົ່າ ລວມທັງຈະຮ່ວມມືກັບບໍລິສັດຈາກຈີນ ແລະ ເກົາຫລີນຳອີກ.
