ທະນາຄານໂລກອະນຸມັດຊ່ວຍປະເທດກຳລັງພັດທະນາ ຊື້ວັກຊີນໂຄວິດ
ທະນາຄານໂລກອະນຸມັດງົບປະມານ 12.000 ລ້ານໂດລາສະຫະລັດ ຊ່ວຍປະເທດກຳລັງພັດທະນາຈັດຊື້ ແລະ ຈັດສັນວັກຊີນປ້ອງກັນພະຍາດຕິດເຊື້ອໄວຣັສໂຄໂຣນາ 2019 ຫລື ໂຄວິດ-19 ຕັ້ງເປົ້າຊ່ວຍໃຫ້ຄົນໄດ້ຮັບວັກຊີນສູງເຖິງ 1.000 ລ້ານຄົນ.
ຖະແຫລງການຂອງທະນາຄານໂລກ ລະບຸວ່າ: ງົບປະມານນີ້ເປັນສ່ວນໜຶ່ງຂອງງົບລວມ 160.000 ລ້ານໂດລາ ທີ່ຈະໃຊ້ຈົນຮອດເດືອນມິຖຸນາປີໜ້າ ສຳລັບຊ່ວຍປະເທດກຳລັງພັດທະນາຮັບມືການແຜ່ລະບາດຂອງໂຄວິດ-19 ເປັນການສົ່ງສັນຍານເຖິງວົງການວິໄຈ ແລະ ອຸປະກອນການແພດວ່າ: ປະຊາຊົນໃນປະເທດກຳລັງພັດທະນາຕ້ອງການເຂົ້າເຖິງວັກຊີນທີ່ປອດໄພ ແລະ ມີປະສິດທິພາບເຊັ່ນດຽວກັນ. ອີກທັງຍັງເປັນການສະໜັບສະໜູນທາງການເງິນ ແລະ ເຕັກນິກ ເພື່ອໃຫ້ປະເທດກຳລັງພັດທະນາໃຊ້ວັກຊີນໃນອັດຕາທີ່ສອດຄ່ອງກັບຫຸ້ນສ່ວນສາກົນ.
ທ່ານ ເດວິດ ມັລພາສ ປະທານທະນາຄານໂລກ ລະບຸໃນຖະແຫລງການວ່າ: ການເຂົ້າເຖິງວັກຊີນທີ່ປອດໄພ ແລະ ມີປະສິດທິພາບ ຄຽງຄູ່ກັບການເສີມສ້າງຄວາມເຂັ້ມແຂງໃຫ້ແກ່ລະບົບການຈັດສົ່ງຄືສິ່ງທີ່ຈະປ່ຽນແປງແນວທາງການແຜ່ລະບາດ ແລະ ຊ່ວຍໃຫ້ປະເທດທີ່ກຳລັງຜະເຊີນຫາຍະນະທາງເສດຖະກິດ ແລະ ການເງິນສາມາດເດີນໜ້າຟື້ນຕົວໄດ້ຢ່າງຍືດຍຸ່ນ. ການໃຫ້ເງິນສະໜັບສະໜູນຈະຊ່ວຍໃຫ້ປະເທດຕ່າງໆ ເຂົ້າເຖິງການກວດ ແລະ ປິ່ນປົວ, ຂະຫຍາຍປະສິດທິພາບໃຫ້ວັກຊີນ ເພື່ອຊ່ວຍໃຫ້ລະບົບສາທາລະນະສຸກໃຊ້ວັກຊີນຢ່າງມີປະສິດທິພາບ. ປະທານທະນາຄານໂລກເຄີຍລະບຸໃນການໃຫ້ສຳພາດໜັງສືພິມຝຣັ່ງວ່າ: ເຖິງວ່າຍັງບໍ່ມີວັກຊີນອອກສູ່ຕະຫລາດ, ແຕ່ຈຳເປັນຕ້ອງກຽມຕົວໄວ້ກ່ອນ ເພາະຂະບວນການຈັດສັນວັກຊີນມີຄວາມຫຍຸ້ງຍາກສັບຊ້ອນ.
