ເຝົ້າລະວັງພາຍຸມາອາລະວາດຊ້ຳບາດຫລ້າ
ໂດຍ: ທິດກໍ່າ
ຕາມປົກກະຕິແລ້ວ, ເວົ້າເຖິງສະພາບດິນຟ້າອາກາດຢູ່ປະເທດເຮົາໃນສະໄໝກ່ອນ ເປັນຕົ້ນສະໄໝພໍ່ແມ່ປູ່ຍ່າຕານາຍເຮົາ ເມື່ອຮອດຍາມອອກພັນສາໄປແລ້ວ ຟ້າຝົນມັນກໍຄ່ອຍເບົາບາງ ແລະ ໝົດໄປຕາມລະດູການ. ຈາກນັ້ນ ກໍກ້າວເຂົ້າສູ່ຍາມໜາວນ້ຳໝອກກໍເລີ່ມຕົກ, ເວົ້າແຈ້ງໃນສະໄໝກ່ອນ ສະພາບດິນຟ້າອາກາດມັນປ່ຽນໄປຕາມລະດູການຢ່າງເປັນປົກກະຕິ ແລະ ແນ່ນອນ, ແຕ່ກົງກັນຂ້າມ ພໍຕົກມາເຖິງສະໄໝນີ້ ທຸກສິ່ງທຸກຢ່າງມັນບໍ່ເປັນຄືດັ່ງວ່າ ຍ້ອນມັນມີການປ່ຽນແປງໄປຕາມຂະບວນວິວັດຂອງໂລກ ບໍ່ວ່າທາງທຳມະຊາດ ແລະ ສັງຄົມ. ຕົວຢ່າງໃຫ້ເຫັນຢ່າງຈະແຈ້ງກໍຄື ໃນວັນທີ 7-9 ຕຸລາຜ່ານມານີ້ ພາຍຸໄຕ້ຝຸ່ນລະດູຮ້ອນໄດ້ກໍ່ໃຫ້ເກີດມີຝົນຕົກໜັກ, ມີນໍ້າຖ້ວມຢູ່ຫລາຍບ້ານ, ຫລາຍທ້ອງຖິ່ນເຂດເມືອງນອງ, ເມືອງເຊໂປນ, ເມືອງວິລະບູລີ ແລະ ເມືອງໃກ້ຄຽງອື່ນໆທີ່ຂຶ້ນກັບແຂວງສະຫວັນນະເຂດ ແລະ ສາລະວັນ. ຕໍ່ຜົນກະທົບຄັ້ງນີ້ ສະເພາະເມືອງເຊໂປນມີນ້ຳຖ້ວມຫລາຍກວ່າ 30 ບ້ານ, ຖ້ວມເນື້ອທີ່ການຜະລິດເກືອບ 2 ພັນເຮັກຕາ. ນອກນັ້ນ ກໍຍັງໄດ້ຖ້ວມພື້ນຖານເສດຖະກິດ, ຖະໜົນຫົນທາງເສຍຫາຍຢ່າງຫລວງຫລາຍ. ເຂດທີ່ຖືກຜົນກະທົບໜັກກວ່າໝູ່ກໍແມ່ນບ້ານແດນສະຫວັນຕິດກັບຊາຍແດນລາວບາວປະເທດຫວຽດນາມ. ຈາກນັ້ນກໍຖ້ວມເລາະລົງມາຫ້ວຍສາມບ້ານເຟືອງຕາມລຳນ້ຳເຊໂປນທັ່ງໃສ່ເຊບັ້ງຫຽງຕອນເໜືອກະໂຕເທສະບານເມືອງເຊໂປນກໍມີຫລາຍຈຸດ, ຫລາຍຫລັງຄາເຮືອນ ຕະຫລອດຮອດໄຮ່ນາຮົ້ວສວນ, ໜອງປາ, ແຫລ່ງຜະລິດກະສິກຳ, ຖະໜົນຫົນທາງບາງຍ່ານກາຍເປັນອຳມະພາດໄປຫລາຍວັນ. ມາຮອດປັດຈຸບັນນີ້ ເຫັນວ່າສະພາບນ້ຳຖ້ວມກໍໄດ້ເບົາບາງບົກແຫ້ງລົງ ແລະ ກ້າວເຂົ້າສູ່ສະພາບປົກກະຕິເປັນທີ່ຮຽບຮ້ອຍແລ້ວ, ແຕ່ວ່າໃນຂັ້ນຕໍ່ໄປ ພັດຍັງສຸດສ້ຽງບໍ່ພຽງແຕ່ເທົ່ານີ້ ຍັງມີແຫລ່ງຂ່າວຈາກອຸຕຸນິຍົມ ແລະ ອຸທົກກະສາດ ໄດ້ແຈ້ງຕື່ມວ່າ: ຈະມີພາຍຸຫົວໃໝ່ ຄືພາຍຸລິນຟາ (Linfa) ແລະ ພາຍຸນັງກາ (Nangka) ຈະເຂົ້າມາຊ້ຳຕື່ມອີກ. ສະແດງວ່າສຳລັບປີນີ້ ຝົນອາດແກ່ຍາວໄປຮອດບຸນພະທາດຫລວງ ຫລືວ່າ ອາດໝົດເດືອນຕຸລານີ້ຈຶ່ງຈະຄ່ອຍມະຫັບມະຫາຍໄປຕາມລະດູການ.
ແນວໃດກໍຕາມ, ພວກເຮົາຕ້ອງເຂົ້າໃຈນຳກັນຕື່ມວ່າ ສະພາບດິນຟ້າອາກາດ ແລະ ຟ້າຝົນສະໄໝນີ້ມັນບໍ່ປົກກະຕິ ແລະ ຖືກຕ້ອງຕາມລະດູການຄືເກົ່າອີກແລ້ວ ຫລື ເຜີໆມາອາດມີຮອດຝົນຕົກຍາມແລ້ງ ເຊິ່ງເຂົາເອີ້ນວ່າ: ຝົນຫລົງລະດູກໍເປັນໄດ້. ເມື່ອຕັ້ງໂຈດກັນວ່າ ມັນເປັນຍ້ອນຫຍັງສະພາບດິນຟ້າອາກາດຈຶ່ງເປັນແບບນີ້ ? ຄຳຕອບທີ່ຊັດເຈນມັນກໍມີຫລາຍປັດໄຈ ເປັນຕົ້ນຍ້ອນມະນຸດເຮົາມີການສ້າງສາພັດທະນາຢ່າງຫລວງຫລາຍ. ໄປຄຽງຄູ່ກັບການພັດທະນາດັ່ງກ່າວ ມັນກໍມີທັງອັນດີ ແລະ ອັນຮ້າຍຕາມມາທຳລາຍມວນມະນຸດໃນໂລກ. ຕົວຢ່າງອັນດີ ກໍຄືບ້ານເມືອງມີຄວາມຈະເລີນຮຸ່ງເຮືອງ, ອັນບໍ່ດີນັ້ນຢາກບໍ່ຢາກມັນກໍໄດ້ທຳລາຍທຳມະຊາດ ແລະ ສິ່ງແວດລ້ອມໄປໃນຕົວ. ສ່ວນປັດໄຈອັນທີສອງນັ້ນ ກໍແມ່ນຍ້ອນຂະບວນວິວັດການຂະຫຍາຍຕົວຂອງໜ່ວຍໂລກເອງ ເຊິ່ງສະແດງອອກໃນການປ່ຽນແປງຂອງດິນຟ້າອາກາດໃນແຕ່ລະໄລຍະ ຮ້ອນຫລາຍໜາວຫລາຍ, ມີລົມພາຍຸນັບມື້ຮຸນແຮງ, ມີບ່ອນຕົກຫລາຍຕົກໜ້ອຍ, ມີບ່ອນແລ້ງ, ບ່ອນຖ້ວມຄືດັ່ງເຮົາເຫັນທຸກວັນນີ້. ຈາກສອງປັດໄຈໃຫຍ່ໆທີ່ກ່າວມານີ້ ຕົ້ນເຫດທັງໝົດກໍແມ່ນມາຈາກຂະບວນວິວັດການຂະຫຍາຍຕົວຂອງສັງຄົມມະນຸດເຮົາ ມັນມີການພັດທະນາ ແລະ ເພີ່ມຂຶ້ນຕິກໆ ອັນເປັນເຫດໃຫ້ເກີດມີຄວາມຂັດແຍ່ງທາງດ້ານເສດຖະກິດ-ສັງຄົມ, ຄວາມຍິ່ງໃຫຍ່ ແລະ ຄວາມຍືນຍົງຄົງຕົວຂອງແຕ່ລະຂົ້ວ, ແຕ່ລະມະຫາອຳນາດ ແລະ ຄວາມໝັ້ນຄົງຂອງແຕ່ລະປະເທດ. ໃນເງື່ອນໄຂທີ່ໂລກຂອງພວກເຮົາພວມມີການເຊື່ອມໂຍງຄືດັ່ງທຸກວັນນີ້ ຍິ່ງເປັນກາລະໂອກາດໃຫ້ມວນມະນຸດໃນໂລກ ກໍຄືຢູ່ແຕ່ລະປະເທດມີການຮ່ວມມືກັນ, ຊ່ວຍເຫລືອກັນ ທັງມີການແກ້ງແຍ່ງແຂ່ງຂັນກັນຊອກຫາຜົນປະໂຫຍດມາໃຫ້ຕົນເອງ ແລະ ພວກພ້ອງ. ສະຫລຸບແລ້ວ, ຖ້າປະເທດໃດມີຄວາມເຂັ້ມແຂງກວ່າໝູ່ກໍຈະໄດ້ປຽບທາງການເມືອງ, ເສດຖະກິດ ແລະ ສັງຄົມ ນັບທັງວຽກງານປ້ອງກັນຊາດ-ປ້ອງກັນຄວາມສະຫງົບ.
ເຖິງຢ່າງໃດກໍດີ, ຕະຫລອດໄລຍະ 45 ປີແຫ່ງການປົກປັກຮັກສາ ແລະ ພັດທະນາປະເທດຊາດ ສາທາລະນະລັດ ປະຊາທິປະໄຕ ປະຊາຊົນລາວ ຂອງພວກເຮົາກໍນັບມື້ມີການພັດທະນາໄປຕິກໆ. ໃນການພັດທະນາດັ່ງກ່າວນັ້ນ ພວກເຮົາກໍບໍ່ປະຕິເສດຕໍ່ສິ່ງຫຍໍ້ທໍ້ ແລະ ຜົນກະທົບຕາມມາ. ແຕ່ອັນສຳຄັນ ພວກເຮົາຕ້ອງຊອກຫາວິທີແກ້ໄຂໃຫ້ສອດຄ່ອງ ແລະ ທັນເວລາ ເພາະການສ້າງສາພັດທະນາປະເທດຊາດເປັນສິ່ງຈຳເປັນ ແລະ ເຮັດໃຫ້ປະເທດຊາດບ້ານເມືອງມີຄວາມຈະເລີນຮຸ່ງເຮືອງຕໍ່ໄປພາຍໜ້າ. ໃນໄລຍະຜ່ານມາ ພວກເຮົາກໍໄດ້ຮັບຜົນກະທົບຫລາຍດ້ານຕໍ່ການປ່ຽນແປງຂອງດິນຟ້າອາກາດ. ແຕ່ພາຍໃຕ້ການນຳພາຂອງພັກ ແລະ ລັດຖະບານກໍສາມາດຜ່ານຜ່າທຸກຄວາມຫຍຸ້ງຍາກ ຍ້ອນປະຊາຊົນບັນດາເຜົ່າພວກເຮົາມີຄວາມສາມັກຄີຮ່ວມແຮງຮ່ວມໃຈກັນເປັນເຈົ້າຂອງປະເທດຊາດ ແລະ ສາມາດຕ້ານກັບໄພທຳມະຊາດທີ່ມາອາລະວາດຂົ່ມຂູ່ໄດ້ເປັນຢ່າງດີ. ໃນຂັ້ນຕໍ່ໄປນີ້ ພວກເຮົາຕ້ອງພາກັນຖືເອົາການເຝົ້າລະວັງພາຍຸ ຫລື ໄພຕ່າງໆຈາກທຳມະຊາດກາຍເປັນວິຖີຊີວິດແບບໃໝ່ໃນສັງຄົມ ເພາະສະພາບດິນຟ້າອາກາດມັນບໍ່ເປັນໃຈພວກເຮົາແລ້ວ.
