ກຸ່ມ 20 ປະເທດຢ້ຳເພີ່ມທະວີການຮ່ວມມືເສດຖະກິດ ແລະ ການທະນາຄານສາກົນ
ກອງປະຊຸມລັດຖະມົນຕີການເງິນ ແລະ ຜູ້ວ່າການທະນາຄານກາງກຸ່ມ 20 ທີ່ຈັດຂຶ້ນຢູ່ເມືອງບາເດນ-ບາເດນ ປະເທດ ເຢຍລະມັນ ໄດ້ອັດລົງໃນວັນທີ 18 ມີນານີ້ ໂດຍຢ້ຳເພີ່ມທະວີການຮ່ວມມືເສດຖະກິດ ແລະ ການທະນາຄານສາກົນ, ຍຶດໝັ້ນໃຊ້ນະໂຍບາຍ ແລະ ເຄື່ອງມືທັງໝົດທີ່ລວມທັງນະໂຍບາຍເງິນຕາ, ນະໂຍບາຍການເງິນ ແລະ ການປະຕິຮູບ ໂຄງປະກອບເສດຖະກິດເປັນຕົ້ນ ເພື່ອບັນລຸເປົ້າໝາຍເຕີບໃຫຍ່ທີ່ເຂັ້ມແຂງ, ຕໍ່ເນື່ອງ, ດຸນດ່ຽງ ແລະ ມີລັກສະນະໂອບ ອ້ອມອາລີ, ເພີ່ມຄວາມໜັກແໜ້ນຂອງເສດຖະກິດ ແລະ ການທະນາຄານ.
ນີ້ເປັນກອງປະຊຸມລັດຖະມົນຕີການເງິນ ແລະ ຜູ້ວ່າການທະນາຄານກາງຄັ້ງທຳອິດຂອງກຸ່ມ 20 ປະເທດ ພາຍຫລັງ ເຢຍລະມັນເປັນປະເທດປະທານວຽນກຸ່ມ 20 ປະເທດ, ບັນດາຝ່າຍໄດ້ລົງເລິກປຶກສາຫາລືກັນ ໂດຍປິ່ນອ້ອມສະຖານະ ການເສດຖະກິດທົ່ວໂລກ, ຂອບການເຕີບໃຫຍ່ທີ່ເຂັ້ມແຂງ, ຕໍ່ເນື່ອງ, ດຸນດ່ຽງ ແລະ ມີລັກສະນະໂອບອ້ອມອາລີ, ຊຸກຍູ້ ການລົງທຶນຕໍ່ອາຟຣິກາ, ໂຄງສ້າງການທະນາຄານສາກົນ, ພາສີສາກົນ, ການພັດທະນາ ແລະ ຕິດຕາມຄຸ້ມຄອງພາກ ສ່ວນການທະນາຄານ ແລະ ຫົວຂໍ້ປົກຄອງໂລກອື່ນໆ.
ກອງປະຊຸມເຫັນວ່າ: ເສດຖະກິດທົ່ວໂລກໄດ້ຟື້ນຕົວຕື່ມອີກ, ແຕ່ຈັງຫວະເຕີບໃຫຍ່ຍັງບໍ່ສູງ ແລະ ຍັງມີຄວາມສ່ຽງທີ່ ອາດຈະຊຸດໂຊມລົງອີກ.
