ການຊໍາລະຄ່າບໍລິການຜ່ານ u-money ແລະ ທະນາຄານ ຊາຄອມແບັງ ລາວ ຈະເປີດໃຫ້ບໍລິການໃນໄວໆນີ້
ໃນວັນທີ 9 ຕຸລານີ້, ບໍລິສັດ ສະຕາຟິນເທັກ ຈໍາກັດຜູ້ດຽວ (Star Fintech Sole Co., Ltd) ແລະ ທະນາຄານ ໄຊງ່ອນເທືອງຕິ່ນລາວ ຈຳກັດ (Sacombank Lao) ໄດ້ຮ່ວມລົງນາມບົດບັນທຶກຄວາມເຂົ້າໃຈ ວ່າດ້ວຍ “ການເຊື່ອມຕໍ່ຊໍາລະຄ່າບໍລິການຮ່ວມກັນຜ່ານ u-money”, ພິທີດັ່ງກ່າວໄດ້ຈັດຂຶ້ນຢູ່ສໍານັກງານໃຫຍ່ ບໍລິສັດ ສະຕາ ໂທລະຄົມ ທີ່ນະຄອນຫລວງວຽງຈັນ. ລະຫວ່າງ ທ່ານ ຟານ ແທັງ ຕວນ (Phan Thanh Tuan) ຮອງອຳນວຍການ ທະນາຄານ ໄຊງ່ອນເທືອງຕິ່ນລາວ ຈຳກັດ ແລະ ທ່ານ ເຈິນ ມິງ ດຶກ ຮອງອໍານວຍການ ບໍລິສັດ ສະຕາ ຟິນເທັກ ຈໍາກັດຜູ້ດຽວ.
ການຮ່ວມມືດັ່ງກ່າວ, ເພື່ອຄົ້ນຄວ້າເຊື່ອມຕໍ່ການຊຳລະ ແລະ ເປີດກວ້າງໃຫ້ປະຊາຊົນເຂົ້າເຖິງບໍລິການ ການເງິນການທະນາຄານໃຫ້ສະດວກ, ປອດໄພ, ວ່ອງໄວຍິ່ງຂຶ້ນ ໂດຍສະເພາະລູກຄ້າທີ່ມີບັນຊີກະເປົາເງິນອີເລັກໂຕຣນິກ u-money ສາມາດໂອນເງິນຈາກບັນຊີໂດຍກົງ, ຖອນເງິນຢູ່ບັນດາຕູ້ເອທີເອັມ, ຊຳລະຄ່າບໍລິການຕ່າງໆໂດຍຜ່ານທະນາຄານ ໄຊງ່ອນເທືອງຕິ່ນລາວ ຈຳກັດ ໄດ້ ແລະ ພ້ອມນີ້ລູກຄ້າທີ່ມີບັນຊີທະນາຄານດັ່ງກ່າວກໍສາມາດໂອນເງິນເຂົ້າບັນຊີກະເປົາເງິນອີເລັກໂຕຣນິກ u-money ແລະ ຖອນ-ໂອນເງິນ ໄດ້ທຸກຕົວແທນບໍລິການ u-money ຫລາຍກວ່າ 10.000 ຮ້ານທົ່ວປະເທດໄດ້ຢ່າງງ່າຍດາຍ, ວ່ອງໄວ ແລະ ປອດໄພ, ເຊິ່ງຈະສະໜອງບໍລິການດັ່ງກ່າວໃນໄວໆນີ້.
ໃນໂອກາດນີ້, ທ່ານ ສຸລິສັກ ທຳນຸວົງ ຫົວໜ້າກົມຄຸ້ມຄອງລະບົບຊຳລະສະສາງ ທະນາຄານແຫ່ງ ສປປ ລາວ ໄດ້ຍ້ອງຍໍຊົມເຊີຍທັງສອງພາກສ່ວນທີ່ໄດ້ຮ່ວມກັນພັດທະນາຄົ້ນຄິດຜະລິດຕະພັນແບບດິຈິຕອລອອກມາໃໝ່ເລື້ອຍໆ ເພື່ອຮັບໃຊ້ສັງຄົມ.
ການເຊັນສັນຍາຮ່ວມກັນລະຫວ່າງ 2 ຝ່າຍຄັ້ງນີ້ ເພື່ອໃຫ້ທັງສອງຝ່າຍໃຊ້ເປັນບ່ອນອີງໃນການຈັດຕັ້ງປະຕິບັດຕາມຂອບເຂດການຮ່ວມມືທີ່ໄດ້ຕົກລົງກັນໄວ້ໃຫ້ຖືກຕ້ອງ, ສອດຄ່ອງກັບກົດໝາຍຂອງ ສປປ ລາວ, ຮັບປະກັນປະສິດທິພາບ ແລະ ປະສິດທິຜົນ ພ້ອມທັງສາມາດຮັບປະກັນສິດຜົນປະໂຫຍດຂອງທັງສອງຝ່າຍ ໃນການຮ່ວມມືໃຫ້ບໍລິການຊໍາລະທາງເອເລັກໂຕຣນິກ ໂດຍຜ່ານ ຜະລິດຕະພັນ u-money ແລະ ຜະລິດຕະພັນຂອງ ຊາຄອມແບັງ ເພື່ອເປັນການສ້າງຄວາມສະດວກສະບາຍໃຫ້ແກ່ຜູ້ໃຊ້ບໍລິການ ກໍຄື ລູກຄ້າທັງສອງຝ່າຍ, ທັງເປັນການສົ່ງເສີມການນໍາໃຊ້ຜະລິດຕະພັນຕ່າງໆຂອງທະນາຄານ, ການຮັກສາຖານລູກຄ້າ ແລະ ຂະຫຍາຍເຄືອຂ່າຍບໍລິການຂອງສະຕາຟິນເທັກ ແລະ ຊາຄອມແບັງລາວ ໃຫ້ກວ້າງຂວາງ ສາມາດເພີ່ມຂີດຄວາມສາມາດໃນການແຂ່ງຂັນທາງດ້ານທຸລະກິດໄດ້ຫລາຍຂຶ້ນ.
ໃນຜ່ານມາ ບໍລິສັດ ສະຕາ ຟິນເທັກ ກໍໄດ້ເຊັນສັນຍາຮ່ວມມືກັບທະນາຄານອື່ນໆມາແລ້ວຄື: ທະນາຄານຫຸ້ນສ່ວນການຄ້າທະຫານ-ສາຂາລາວ, ທະນາຄານຮ່ວມພັດທະນາລາວ-ຫວຽດ, ທະນາຄານ ມາຣູຮານ ເຈແປນ ລາວ, ທະນາຄານ ຮ່ວມພັດທະນາ ແລະ ທະນາຄານ ເອຊີລີດາ ລາວ ຈໍາກັດ, ພ້ອມນັ້ນບໍລິສັດ ກໍໄດ້ເຊັນສັນຍາຮ່ວມຊຳລະຄ່າປະກັນໄພ ລາວ-ຫວຽດ (LVI) ແລະ ເຊັນສັນຍາຮ່ວມມືມືກັບທະນາຄານ ຊາຄອມແບັງ ລາວ ເພື່ອເປັນຂີດໝາຍສຳຄັນທີ່ຊ່ວຍສ້າງລະບົບການເງິນດິຈິຕອລເທິງມືຖືໃນລາວ ໃຫ້ມີຄວາມສະດວກສະບາຍຫລາຍຍິ່ງຂຶ້ນ, ເຊິ່ງ u-money ຈະບໍ່ຢຸດຢັ້ງໃນການພັດທະນາການບໍລິການເພື່ອເພີ່ມຄວາມສະດວກສະບາຍໃຫ້ຜູ້ຊົມໃຊ້.
