ກະຊວງວິທະຍາສາດ ແລະ ເຕັກໂນໂລຊີ ຈັດກິດຈະກຳຍ່າງເພື່ອສຸຂະພາບສະຫລອງວັນວິທະຍາສາດແຫ່ງຊາດ

ໃນວັນທີ 10 ຕຸລານີ້, ກະຊວງວິທະຍາສາດ ແລະ ເຕັກໂນໂລຊີ ໄດ້ຈັດກິດຈະກຳຍ່າງເພື່ອສຸຂະພາບເພື່ອສະເຫລີມສະຫລອງວັນສຳຄັນຂອງພັກຂອງຊາດຄື ວັນວິທະຍາສາດ ແຫ່ງຊາດ (12 ຕຸລາ) ທັງເປັນວັນປະກາດເອກະລາດ ແລະ ວັນມາດຕະຖານໂລກ (14 ຕຸລາ) ເຊິ່ງເລີ່ມແຕ່ສວນປະຕູໄຊ ໄປຫາຫໍຄຳ ແລ້ວຍ່າງກັບຄືນມາສູ່ສວນປະຕູໄຊ, ໂດຍການເຂົ້າຮ່ວມຂອງທ່ານ ບໍ່ວຽງຄຳ ວົງດາລາ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ, ທ່ານ ອາລຸນໄຊ ສູນນະລາດ ເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ, ແລະ ມວນຊົນເຂົ້າຮ່ວມຫລາຍກວ່າ 500 ຄົນ.

ພິທີເປີດກິດຈະກຳຍ່າງເພື່ອສຸຂະພາບ

ກິດຈະກຳດັ່ງກ່າວແມ່ນເພື່ອເປັນການສ້າງຈິດສຳນຶກ ແລະ ຄວາມຮັບຮູ້ໃຫ້ແກ່ປະຊາຊົນ ກ່ຽວກັບບົດບາດ ແລະ ຄວາມສຳຄັນຂອງວິທະຍາສາດ ແລະ ເຕັກໂນໂລຊີ ຕໍ່ກັບການພັດທະນາເສດຖະກິດ-ສັງຄົມແຫ່ງຊາດ ແລະ ທັງເປັນການສ້າງຂະບວນການສະເຫຼີມສະຫຼອງສັບປະດາວິທະຍາສາດ ໃຫ້ມີຂະບວນການຟົດຟື້ນ.

ຄະນະປະທານເຂົ້າຮ່ວມ

ໂອກາດນີ້, ທ່ານ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີກ່າວວ່າ: ວັນວິທະຍາສາດ ແຫ່ງຊາດ 12 ຕຸລາ ແລະ ທັງເປັນວັນທີມີຄວາມຫມາຍສຳຄັນອິກວັນໜຶ່ງທາງດ້ານປະຫວັດສາດສຳຄັນຂອງຊາດເຮົາຄືວັນປະກາດເອກະລາດ. ພັກ ແລະ ລັດຖະບານ ແຫ່ງ ສປປ ລາວ ໄດ້ກຳນົດເອົາ ວັນທີ 12 ຕຸລາ ເປັນວັນວິທະຍາສາດແຫ່ງຊາດ ແລະ ໄດ້ພ້ອມກັນຈັດງານສະເຫລີມສະຫລອງໃນທຸກໆປີ ເພື່ອເປັນການສ້າງຈິດສຳນຶກ ແລະ ຄວາມຮັບຮູ້ໃຫ້ແກ່ປະຊາຊົນ ກ່ຽວກັບບົດບາດ ແລະ ຄວາມສຳຄັນຂອງວິທະຍາສາດຕໍ່ກັບການພັດທະນາເສດຖະກິດ-ສັງຄົມແຫ່ງຊາດ ແລະ ໃຫ້ເຫັນວ່າ ການຄົ້ນຄ້ວາ-ການພັດທະນາ ແລະ ການນຳໃຊ້ ວິທະຍາສາດ ແລະ ເຕັກໂນໂລຊີ ເປັນປັດໃຈພື້ນຖານ ເປັນກຳລັງແຮງ ແລະ ເປັນພາຫານະຊຸກຍູ້ສົ່ງເສີມການພັດທະນາເສດຖະກິດ-ສັງຄົມ, ນຳເອົາປະເທດເຮົາ ກ້າວໄປສູ່ອຸດສາຫະກຳທັນສະໄໝ ແລະ ສ້າງບາດກ້າວໃໝ່ໃຫ້ແກ່ການສ້າງສາເສດຖະກິດແຫ່ງພູມປັນຍາ.

ທ່ານ ບໍ່ວຽງຄຳ ວົງດາລາ ລັດຖະມົນຕີ ກະຊວງວິທະຍາສາດ ແລະ ເຕັກໂນໂລຊີ

ໃນໄລຍະຜ່ານມາ ພັກ-ລັດ ໄດ້ເອົາໃຈໃສ່ ຕໍ່ການພັດທະນາວຽກງານວິທະຍາສາດ ແລະ ເຕັກໂນໂລຊີ ຂອງປະເທດເຮົາ ເປັນຕົ້ນແມ່ນ: ການສົ່ງເສີມສະຕິປັນຍາ, ຫົວຄິດປະດິດສ້າງ ການຄົ້ນຄ້ວາ-ພັດທະນາ, ການຖ່າຍທອດເຕັກໂນໂລຊີ, ສ້າງເປັນນະວັດຕະກຳໃໝ່, ຊັບສິນທາງປັນຍາ, ມາດຕະຖານ ແລະ ວັດແທກ ໃນການດຶງດູດການລົງທຶນ ທັງພາຍໃນ ແລະ ຕ່າງປະເທດ. ດ້ວຍການສ້າງນິຕິກຳ ແລະ ການພັດທະນາຊັບພະຍາກອນມະນຸດ, ການປົກປ້ອງຊັບສິນທາງປັນຍາ ແລະ ການບໍລິການທາງດ້ານວິທະຍາສາດ ແລະ ເຕັກໂນໂລຊີ ທີ່ເປັນປັດໃຈໃຫ້ແກ່ການຫັນເປັນອຸດສາຫະກຳທັນສະໄໝເທື່ອລະກ້າວ.

ພ້ອມນີ້, ທ່ານລັດຖະມົນຕີໄດ້ຮຽກຮ້ອງມາຍັງນັກວິທະຍາສາດ, ນັກຄົ້ນຄວ້າ, ນັກຮຽນຮູ້, ປັນຍາຊົນ ຈົ່ງສືບຕໍ່ເສີມຂະຫຍາຍມູນເຊື້ອການຄົ້ນຄວ້າປະດິດສ້າງຂອງຕົນ ນຳໃຊ້ຢ່າງມີຫົວຄິດປະດິດສ້າງ ເຂົ້າໃສ່ການພັດທະນາຍົກລະດັບຄວາມຮູ້ຄວາມສາມາດ ແລະ ຊີວິດການເປັນຢູ່ ຂອງປະຊາຊົນບັນດາເຜົ່າ ໃຫ້ນັບມື້ນັບຈະເລີນຂື້ນເລື້ອຍໆ.

ມວນຊົນເຂົ້າຮ່ວມຍ່າງຈຳນວນຫລາຍ