ຫຼວງນໍ້າທາຈູດທຳລາຍຢາເສບຕິດຈຳນວນຫລາຍ
ເມື່ອທ້າຍອາທິດຜ່ານມານີ້, ແຂວງຫຼວງນໍ້າທາໄດ້ຈັດພິທີຈູດທຳລາຍຢາເສບຕິດຂຶ້ນທີ່ເດີ່ນກິລາໃໝ່ຂອງແຂວງ ເຊິ່ງມີຄະນະນຳຂອງແຂວງ, ເຈົ້າໜ້າທີ່ກ່ຽວຂ້ອງ ແລະ ມວນຊົນເຂົ້າຮ່ວມເປັນຈຳນວນຫລາຍ.
ຫົວໜ້າກອງບັນຊາການທະຫານແຂວງຫຼວງນໍ້າທາ ມີຄຳເຫັນໃນພິທີວ່າ: ໃນໄລຍະຜ່ານມາ ແຂວງຂອງຕົນໄດ້ເອົາໃຈໃສ່ປະຕິບັດວຽກງານຕ້ານ ແລະ ແກ້ໄຂບັນຫາຢາເສບຕິດ, ເຈົ້າໜ້າທີ່ກ່ຽວຂ້ອງກໍໄດ້ເອົາໃຈໃສ່ເຜີຍແຜ່ຜົນຮ້າຍຂອງຢາເສບຕິດຢູ່ບັນດາບ້ານເປົ້າໝາຍ ແລະ ທໍາລາຍສ່ວນຝິ່ນທີ່ປະຊາຊົນລັກລອບປູກໄດ້ 106 ແຮັກຕາ, ປະເມີນໂຮງຮຽນປອດຢາເສບຕິດໄດ້ 64 ແຫ່ງ ແລະ ປີ 2020 ນີ້ ສາມາດມ້າງຄະດີຢາເສບຕິດໄດ້ 70 ເລື່ອງ, ກັກຕົວຜູ້ຖືກຫາໄດ້ 95 ຄົນ, ຍິງ 7 ຄົນ, ໃນນັ້ນມີຄົນຕ່າງປະເທດ 2 ຄົນ, ຢຶດຂອງກາງປະເພດຢາບ້າໄດ້ຫລາຍກວ່າ 4 ໝື່ນເມັດ, ເຮໂຣອິນ 90 ກຣາມ, ຢາໄອສ໌ 38 ກຣາມ, ຢາຝິ່ນ 67,3 ກິໂລກຣາມ, ຢາທີ່ນໍາມາທໍາລາຍໃນຄັ້ງນີ້ປະກອບມີຢາບ້າ 57.600 ກວ່າເມັດ, ເຮໂຣອິນ 75 ກຣາມ, ຢາໄອສ໌ 23,57 ກຣາມ, ຢາຝິ່ນ 1,3 ກິໂລກຣາມ, ແປ້ງຝຸ່ນທີ່ບໍ່ມີເຊື້ອຢາເສບຕິດເຈື້ອປົນ 103,8 ກິໂລກຣາມ, ແປ້ງທີ່ມີເຊື້ອຢາເສບຕິດປົນ 7,5 ກຣາມ.
