ພຽງມື້ດຽວມີຜູ້ເດີນທາງເຂົ້າມາລາວ 1.745 ຄົນ
ໃນວັນທີ 8 ຕຸລານີ້, ທ່ານ ນາງ ລັດສະໝີ ວົງຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ, ຕາງໜ້າໃຫ້ກອງເລຂາຄະນະ ສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂ ພະຍາດ COVID-19 ໄດ້ແຈ້ງໃຫ້ຮູ້ວ່າ: ພຽງວັນທີ 7 ຕຸລານີ້ ມີຜູ້ເດີນທາງເຂົ້າມາປະເທດເຮົາທັງໝົດ 1.745 ຄົນ. ໃນນັ້ນ, ຜ່ານດ່ານ ລາວ-ໄທ 722 ຄົນ (ແຮງງານລາວກັບມາແຕ່ໄທ 110 ຄົນ); ຜ່ານດ່ານ ລາວ-ຈີນ 186 ຄົນ, (ແຮງງານຈີນ 3 ຄົນ, ເຫລືອນັ້ນ ແມ່ນຄົນຂັບລົດສົ່ງສິນຄ້າ); ແລະ ຜ່ານດ່ານ ລາວ-ຫວຽດນາມມີ 693 ຄົນ ເຊິ່ງເຂົ້າມາໂດຍຖືກອະນຸຍາດຈາກຄະນະສະເພາະກິດ (ມີນັກສຶກສາ 3 ຄົນ, ລັດຖະການ 1 ຄົນ, ແຮງງານຫວຽດນາມ 71 ຄົນ, ເຫລືອນັ້ນ ແມ່ນຄົນຂັບລົດສົ່ງສິນຄ້າ ແລະ ຜູ້ຕິດຕາມ ເຊິ່ງສ່ວນຫລາຍ ແມ່ນເຂົ້າມາປ່ຽນຖ່າຍສິນຄ້າ ແລະ ປ່ຽນຜູ້ຂັບລົດຢູ່ດ່ານ); ສ່ວນຜູ້ເດີນທາງຜ່ານ ສະໜາມບິນສາກົນວັດໄຕມີ 144 ຄົນ, ທັງໝົດ ແມ່ນຄົນຈີນ; ເຊິ່ງທຸກຄົນແມ່ນໄດ້ແທກອຸນຫະພູມຮ່າງກາຍ, ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດ (ຍົກເວັ້ນແຕ່ຜູ້ຂັບລົດຂົນສົ່ງ ແລະ ຜູ້ຕິດຕາມ) ແລ້ວຈຶ່ງນຳສົ່ງໄປຫາສະຖານທີ່ ຈຳກັດບໍລິເວນ ທີ່ກຳນົດໄວ້ຈົນກວ່າຈະຄົບກຳນົດ 14 ວັນ.
ທ່ານ ນາງ ລັດສະໝີ ວົງຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ
ປັດຈຸບັນທົ່ວປະເທດມີສູນຈໍາກັດບໍລິເວນທີ່ຍັງເປີດຢູ່ 42 ສູນ, ມີຜູ້ຖືກຈຳກັດບໍລິເວນຢູ່ຈຳນວນສູນດັ່ງກ່າວ 3,224 ຄົນ, ໄດ້ເກັບຕົວຢ່າງມາກວດວິເຄາະ ທັງໝົດ ແລະ ບໍ່ພົບຜູ້ຕິດເຊື້ອໃດໆ.
