ອົງການອະນາໄມໂລກຄາດວ່າທ້າຍປີນີ້ຈະມີວັກຊີນໄດ້ນຳໃຊ້

ລາຍງານຂ່າວຕ່າງປະເທດ ວັນທີ 7 ຕຸລາໃຫ້ຮູ້ວ່າ: ທ່ານ ເທດຼອສ ແອດນາຮອມ ເກເບຼເຢຊູສ ຜູ້ອຳນວຍການອະນາໄມໂລກ ກ່າວໃນກອງປະຊຸມຄະນະກຳມະການບໍລິຫານອົງການອະນາໄມໂລກ ວ່າດ້ວຍມາດຕະການຮັບມືກັບການລະບາດຂອງໂຄວິດ-19  ເມື່ອວັນທີ 6 ຜ່ານມາວ່າ: ພວກເຮົາຍັງຕ້ອງການວັກຊີນ ແລະ ຫວັງວ່າໃນທ້າຍປີນີ້ຈະມີວັກຊີນອອກມາໄດ້ນຳໃຊ້, ພ້ອມດຽວກັນນັ້ນ ທ່ານຍັງໄດ້ຮຽກຮ້ອງໃຫ້ມີຄວາມສາມັກຄີກັນ ແລະ ຢຶດໝັ້ນພັນທະຂອງຕົນຈາກບັນດາຜູ້ນຳໃນທົ່ວໂລກ ເພື່ອເປັນສິ່ງຄໍ້າປະກັນວ່າ ວັກຊີນຈະໄດ້ຮັບການຈຳໜ່າຍຢ່າງທົ່ວເຖິງ ເມື່ອພ້ອມນຳໃຊ້.

ໃນຂະນະນີ້, ວັກຊີນກຳລັງຢູ່ໃນໄລຍະການວິໄຈ 9 ວັກຊີນ ຊຶ່ງຈະເປັນແກນຫຼັກຂອງໂຄງການວັກຊີນທົ່ວໂລກ ທີ່ມີອົງການອະນາໄມໂລກເປັນແກນນຳໃນຊື່ໂຄງການ ໂຄແວັກ ທີ່ມີເປົ້າໝາຍຈະແຈກຢາຍວັກຊີນໃຫ້ໄດ້ 2.000 ລ້ານໂດສພາຍໃນທ້າຍປີໜ້າ, ຊຶ່ງຂະນະນີ້ມີທັງໝົດ168 ປະເທດແລ້ວ ທີ່ເຂົ້າຮ່ວມໂຄງການ ຍົກເວັ້ນ ສປ ຈີນ, ອາເມລິກາ ແລະ ລັດເຊຍ.