3 ສະພາບແວດລ້ອມຂອງການສຶກສາ

3 ສະພາບແວດລ້ອມທີ່ວ່ານີ້ ແມ່ນລະບົບການສຶກສາທີ່ບໍ່ສາມາດຕັດແຍກອອກຈາກກັນໄດ້, ມັນມີສາຍກ່ຽວພັນຊຶ່ງກັນ ແລະ ກັນຢ່າງຊັດຈະວິພາກ, ຊຶ່ງຂາດຂາດສະພາບໃດສະພາບໜຶ່ງບໍ່ໄດ້. 3 ສະພາບທີ່ວ່ານີ້ລວມມີ: ໂຮງຮຽນ, ສັງຄົມ ແລະ ຄອບຄົວ.

1/. ໂຮງຮຽນ: ແມ່ນຫົວໜ່ວຍການຈັດຕັ້ງທີ່ມີລະບົບຄົບຊຸດ, ມີພາລະບົດບາດ, ໜ້າທີ່ຢ່າງຈະແຈ້ງ, ດຳເນີນການສຶກສາ ແລະ ສິດສອນໄປພ້ອມໆກັນ. ສຶກສາ: ທາງດ້ານແນວຄວາມຄິດ, ຈີນຕະນາການ, ສະຕິປັນຍາ, ຄົນສົມບັດ ສິນທຳປະຕິວັດ, ນໍ້າໃຈຮັກຊາດ ຮັກບ້ານເກີດເມືອງນອນ, ຮູ້ບາບ, ບຸນ, ຄູນ, ໂທດ…ຊຶ່ງໃນລະບົບນີ້ປະກອບດ້ວຍ 5 ຫຼັກມູນຂອງການສຶກສາ: ຄູນສົມບັດສຶກສາ, ແຮງງານສຶກສາ, ປັນຍາສຶກສາ, ສິລະປະສຶກສາ ແລະ ພະລະສຶກສາ. ການສິດສອນ: ແມ່ນລະບົບແຫ່ງການສົ່ງຄວາມຮູ້ທາງດ້ານວິທະຍາສາດ, ວິທະຍາການ, ວິຊາສະເພາະ ດ້ານຕ່າງໆ ໃຫ້ພວກນ້ອງນັກຮຽນ.

2/. ສັງຄົມ: ສັງຄົມກໍແມ່ນພາກສ່ວນໜຶ່ງທີ່ສຳຄັນຂອງວຽກງານການສຶກສາ. ນອກຈາກໂຮງຮຽນແລ້ວ, ເດັກນັກຮຽນຍັງມີການພົວພັນ ແລະ ເຄື່ອນໄຫວຢູ່ນຳສັງຄົມຕື່ມອີກ, ໂດຍສະເພາະແມ່ນການຄົບຄ້າສັງຄົມ, ໄປຫຼີ້ນໄປທ່ຽວກັບໝູ່ຄູ່ເຊັ່ນ: ໄປທ່ອງທ່ຽວກັບໝູ່, ໄປຫຼິີ້ນກີລາ, ສິລະປະ-ວັນນະຄະດີ, ໄປຊຸມແຊວກັບໝູ່, ໄປເຮືອນດອງ, ງານບຸນ…ຊຶ່ງສັງຄົມຈະມີຫຼາຍສີສັນການເຄື່ອນໄຫວ ແລະ ຮູບການທີ່ອຸດົມສົມບູນກ່ວາຢູ່ໂຮງຮຽນ ແລະ ຄອບຄົວ, ຜູ້ຄົນທີ່ພົບປະ, ຄົບຄ້າ, ພົວພັນກໍມີຫຼາຍປະເພດທີ່ແຕກຕ່າງກັນ, ເວົ້າລວມແລ້ວ ແມ່ນມີການເຄື່ອນໄຫວທີ່ກ້ວາງຂວາງ ແລະ ອຸດົມສົມບູນກ່ວາຢູ່ໃນໂຮງຮຽນ ແລະ ຄອບຄົວ. ຈຶ່ງມີຫຼາຍປັດໄຈກະທົບໃສ່ນັກຮຽນຫຼາຍກ່ວາ.

2/. ຄອບຄົວ: ຄອບຄົວແມ່ນຫົວໜ່ວຍຈຸລັງຂອງສັງຄົມ, ເປັນບ່ອນກຳເນີດເກີດໃຫ່ຍຂອງເດັກ, ເປັນສະຖາບັນຕິດພັນກັບເດັກແຕ່ມື້ເກີດຈົນເຖິງມື້ໃຫ່ຍ, ເປັນບ່ອນໃຫ້ຄວາມອົບອຸ່ນທາງດ້ານຈິດໃຈ ແລະ ຮ່າງກາຍຂອງເດັກ. ຄອບຄົວອາດຈະສຶກສາອົບຮົມ, ສັ່ງສອນທາງດ້ານຄຸນສົມບັດສິນທຳປະຕິວັດ, ຈັນຍາບັນ, ຈັນຍາທຳໃຫ້ແກ່ເດັກໄດ້ ແຕ່ບໍ່ສາມາດທີ່ຈະສົ່ງຄວາມຮູ້ທາງດ້ານວິທະຍາສາດ, ວິທະຍາການໃກ້ເດັກຢ່າງເປັນພະເອກຄືຜູ້ເປັນຄູ.

ໃນເມື່ອນັກຮຽນ ນອນຢູ່ໃນ 3 ສະພາບແວດລ້ອມດັ່ງກ່າວ, ຈຶ່ງມີຄວາມຈຳເປັນທີ່ 3 ສະພາບແວດລ້ອມດັ່ງກ່າວຕ້ອງມີຄວາມເປັນເອກກະພາບກັນ ແລະ ມີເປົ້າໝາຍ, ຈຸດປະສົງອັນດຽວກັນ. ຄວນມີໂຄງການຮ່ວມມືຊຶ່ງກັນ ແລະ ກັນໄປລວງດຽວກັນ ເພື່ອພ້ອມກັນຊຸກຍູ້ສົ່ງເສີມ ພັດທະນາເດັກໃຫ້ມີຄູນນະພາບທາງດ້ານຈັນຍາບັນ ຈັນຍາທຳ, ຄູນສົມບັດ ສິນທຳປະຕິວັດ ພຽບພ້ອມໄປດ້ວຍ ຄວາມຮູ້ຄວາມສາມາດທາງດ້ານວິທະຍາສາດ ວິທະຍາການ ເພື່ອນຳພາປະເທດຊາດພົ້ນອອກຈາກສະພາວະປະເທດດ້ອຍພັດທະນາ ກ້າວຂຶ້ນສູ່ຄວາມອຸດົມສົມບູນ ຮຸ່ງເຮືອງຈະເລີນກ້າວໜ້າ.