ສະພາບປະລະການຮຽນຊັ້ນສາມັນສຶກສາ ຢູ່ນະຄອນຫລວງວຽງຈັນຍັງສູງ

ຫົວໜ້າ​ພະ​ແນ​ກສຶກສາ​ທິການ ​ແລະ ກິລາ ນະຄອນຫລວງ ​ໄດ້​ລາຍ​ງານ​ໃນ​ພິທີ​ສະ​ເຫລີ​ມສະຫລອງ​ວັນ​ຄູ​ແຫ່ງ​ຊາດ ຄົບຮອບ 26 ປີ ​ໃນ​ວັນ​ທີ 6 ຕຸລາ​ນີ້​ວ່າ: ​ໄປ​ຄຽງ​ຄູ່​ກັບຜົນສຳເລັດຫລາຍດ້ານທີ່​ຂະ​ແໜງ​ການ​ຂອງ​ຕົນ​ຍາດ​ມາ​ໄດ້​ໃນ​ສົກຮຽນ​ປີຜ່ານມາ, ແຕ່ກໍຍັງມີບາງບັນຫາ ແລະ ສິ່ງທ້າທາຍ ໂດຍສະເພາະອັດຕາປະລະການຮຽນຂອງນັກຮຽນແຕ່ຊັ້ນປະຖົມຮອດຊັ້ນມັດທະຍົມຕອນປາຍ ເຫັນວ່າຍັງສູງ ພຽງ​ສົກຮຽນ 2019-2020 ນີ້​ມີເຖິງ 4.811 ຄົນ ​ເທົ່າ​ກັບ 2,97% ອັດຕາຄ້າງຫ້ອງ ຊັ້ນ ປ.1 ຍັງສູງ ບໍ່ທັນບັນລຸໄດ້ຕາມຄາດໝາຍຂອງນະຄອນຫລວງ, ຈໍານວນນັກຮຽນ ມ.4 ທີ່ເຂົ້າຮຽນສາຍອາຊີວະຍັງບໍ່ທັນບັນລຸໄດ້ເຖິງ 5% ​ເຊິ່ງຍັງ​ເປັນ​ບັນຫາ​ໜັກ​ທີ່​ສຶກສາ​ນະຄອນຫລວງ​ຈະ​ຕ້ອງ​ໄດ້​ສຸມ​ໃສ່​ແກ້​ໄຂ​ຄື: ໃນສົກຮຽນ 2020-2021 ພະແນກໄດ້ວາງຄາດໝາຍຫລັກໄວ້ດັ່ງນີ້: ອັດຕາເຂົ້າຮຽນຂອງເດັກ 5 ປີ ໃຫ້ເພີ່ມຈາກ 97,6% ມາເປັນ 97,8%, ສູ້ຊົນໃຫ້ມີຈໍານວນເມືອງທີ່ບັນລຸອັດຕາເຂົ້າຮຽນຂອງເດັກ 5 ປີ ສູງກວ່າ 92% ໃຫ້ໄດ້ 8 ເມືອງ, ຫລຸດຜ່ອນອັດຕາປະລະການຮຽນຂອງນັກຮຽນ ປ.1 ຈາກ 3,57% ໃຫ້ຍັງເຫລືອ 3,55%, ຫລຸດຜ່ອນອັດຕາຄ້າງຫ້ອງຂອງນັກຮຽນ ປ.1 ຈາກ 3,70% ໃຫ້ຍັງເຫລືອ 3,50%, ຫລຸດຜ່ອນການປະລະຂອງນັກຮຽນຊັ້ນປະຖົມ ຈາກ 1,50% ໃຫ້ຍັງເຫລືອ 1,45%, ຫລຸດຜ່ອນການຄ້າງຫ້ອງຂອງນັກຮຽນຊັ້ນປະຖົມ ຈາກ 2,14% ໃຫ້ຍັງເຫລືອ 2%, ອັດຕາລອດເຫລືອຮອດ ປ.5 ໃຫ້ບັນລຸໄດ້ 93,70%, ອັດຕາເຂົ້າຮຽນຊັ້ນ ມ.ຕ ໃຫ້ບັນລຸໄດ້ 100%, ອັດຕາເຂົ້າຮຽນລວມຊັ້ນ ມ.ປ ໃຫ້ບັນລຸໄດ້ 86,50%, ສູ້ຊົນໃຫ້ຈໍານວນເມືອງບັນລຸອັດຕາເຂົ້າຮຽນຊັ້ນ ປ.5 ໄດ້ 100% ໃຫ້ໄດ້ 9 ເມືອງ, ຈໍານວນເມືອງທີ່ບັນລຸອັດຕາເຂົ້າຮຽນລວມໃໝ່ຊັ້ນ ມ.4 ຂອງນັກຮຽນຍິງສູງກວ່າ 92% ໃຫ້ໄດ້ 9 ເມືອງ, ສົ່ງເສີມໃຫ້ນັກຮຽນຈົບຊັ້ນ ມ.4 ຜູ້ທີ່ບໍ່ມີເງື່ອນໄຂຮຽນຕໍ່ ມ.ປ ໃຫ້ໄປຮຽນສາຍອາຊີວະວິຊາຊີບໃຫ້ໄດ້ 5% ແລະ ໃຫ້ນັກຮຽນຈົບ ມ.7 ໄປຮຽນຕໍ່ໃນລະດັບຕ່າງໆໃຫ້ໄດ້ 80%. ພ້ອມນີ້ ສົ່ງເສີມມວນຊົນທຸກເພດໄວໄດ້ເຂົ້າຮ່ວມອອກກໍາລັງກາຍ ແລະ ຫລິ້ນກິລາກາຍະກໍາໃຫ້ໄດ້ 38,50%.