ກອງປະຊຸມທາງໄກລະຫວ່າງ ສປປ ລາວ ແລະ ສິງກະໂປ ຫາລືດ້ານຄວາມປອດໄພທາງໄຊເບີ

ໃນວັນທີ 5 ຕຸລາ 2020 ທີ່ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ), ທ່ານ ບຸນສະເຫລີມໄຊ ເຄນນາວົງ ຮອງລັດຖະມົນຕີກະຊວງ ປທສ ໄດ້ຈັດກອງປະຊຸມທາງໄກ ພົບປະສອງຝ່າຍຮ່ວມກັບທ່ານ S.Iswaran ລັດຖະມົນຕີກະຊວງຂໍ້ມູນຂ່າວສານ ແລະ ການສື່ສານ ປະເທດສິງກະໂປ ເພື່ອແລກປ່ຽນກ່ຽວກັບບັນຫາຄວາມປອດໄພທາງໄຊເບີ (Cyber security) ໃນຂົງເຂດອາຊຽນ ແລະ ບັນດາຫົວຂໍ້ທີ່ຈະໄດ້ສົນທະນາໃນກອງປະຊຸມສັບປະດາສາກົນດ້ານໄຊເບີຂອງສິງກະໂປ (SICW), ກອງປະຊຸມລັດຖະມົນຕີອາຊຽນດ້ານຄວາມປອດໄພໄຊເບີ (AMCC) ທີ່ສິງກະໂປ ເປັນເຈົ້າພາບ ຊຶ່ງຈະໄດ້ຈັດຂຶ້ນໃນລະຫວ່າງວັນທີ 6-9 ຕຸລານີ້. ພ້ອມກັນນີ້, ຍັງມີການແລກປ່ຽນບົດຮຽນດ້ານຍຸດທະສາດ ແລະ ການພັດທະນາດ້ານຄວາມປອດໄພດ້ານໄຊເບີ ຢູ່ໃນ ສປປ ລາວ.

ກອງປະຊຸມ, ສອງຝ່າຍໄດ້ສົນທະນາແລກປ່ຽນບັນຫາສໍາຄັນ 2 ຫົວຂໍ້ຫລັກ ເປັນຕົ້ນການສ້າງກົດລະບຽບພື້ນຖານທາງດ້ານໄຊເບີ (ແຜນວຽກການຈັດຕັ້ງປະຕິບັດບັນຖັດຖານທາງໄຊເບີ) ແລະ ຍຸດທະສາດຄວາມປອດໄພ ແລະ ການພັດທະນາທາງໄຊເບີທີ່ເຫັນວ່າເປັນວຽກງານທີ່ມີຄວາມສຳຄັນໃນຍຸກປັດຈຸບັນ ແລະ ຕິດພັນກັບຫລາຍຂະແໜງການ. ພ້ອມນີ້, ສອງຝ່າຍຍັງໄດ້ເຫັນດີສືບຕໍ່ຮ່ວມມື ແລະ ແລກປ່ຽນບົດຮຽນຊຶ່ງກັນ ແລະ ກັນ ບົນພື້ນຖານຕ່າງຝ່າຍຕ່າງໄດ້ຮັບຜົນປະໂຫຍດ ແລະ ການເຄົາລົບຕໍ່ກົດໝາຍ ແລະ ລະບຽບການພາຍໃນຂອງແຕ່ລະປະເທດ ພ້ອມກັນຜ່ານຜ່າກັບສິ່ງທ້າທ້າຍໃນຕໍ່ໜ້າ ໂດຍສະເພາະໃນໄລຍະການລະບາດຂອງພະຍາດໂຄວິດ-19 ນີ້.