ລາວ ແລະ ສະຫະພາບເອີຣົບສະຫລອງການຮ່ວມມືຄົບຮອບ 20 ປີ
ພິທີສະເຫລີມສະຫລອງການຮ່ວມມືລະຫວ່າງ ສປປ ລາວ ແລະ ສະຫະພາບເອີຣົບ (EU) ຄົບຮອບ 20 ປີ (1997-2017) ໄດ້ຈັດຂຶ້ນໃນຄໍ່ຄືນວັນທີ 26 ມີຖຸນານີ້ທີ່ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ, ທ່ານ ປີແອ ອາມິລຣາດ ຫົວໜ້າຜູ້ຮັບຜິດຊອບອາຊີ, ອາຊີກາງ, ອ່າວ/ອາຊີຕາເວັນອອກກາງ ແລະ ປາຊີຟິກຂອງຫ້ອງການຊ່ວຍເຫລືອເອີຣົບທີ່ບຣຸກແຊນ, ມີທ່ານ ເລໂອ ຟາບຽງ ເອກອັກຄະລັດຖະທູດສະຫະພາບເອີຣົບປະຈຳລາວ, ມີບັນດາທູຕານທູດ ແລະ ແຂກຖືກເຊີນເຂົ້າຮ່ວມເປັນຈຳນວນຫລາຍ.
ຜູ້ຕາງໜ້າສະຫະພາບເອີຣົບ ກ່າວວ່າ: ສະຫະພາບເອີຣົບແມ່ນຄູ່ຮ່ວມພັດທະນາທີ່ໃຫຍ່ຂອງລາວ, ແຜນງານການຊ່ວຍເຫລືອຂອງສະຫະພາບເອີຣົບແມ່ນສຸມໃສ່ວຽກງານດ້ານໂພສະນາການ, ການສຶກສາ ແລະ ດ້ານການປົກຄອງ, ພ້ອມທັງຊ່ວຍແກ້ໄຂບັນຫາການເກັບກູ້ລະເບີດທີ່ບໍ່ທັນແຕກ, ຄວາມສະເໝີພາບຍິງ-ຊາຍ ແລະ ການປ່ຽນແປງດິນຟ້າອາກາດ. ນອກຈາກນີ້ຍັງໃຫ້ການສະໜັບສະໜູນເພື່ອບັນລຸເປົ້າໝາຍສະຫັດສະຫວັດການພັດທະນາ ແລະ ຈະສືບຕໍ່ໃຫ້ການຊ່ວຍເຫລືອເພື່ອໃຫ້ບັນລຸເປົ້າໝາຍການພັດທະນາແບບຍືນຍົງ ແລະ ຫລຸດພົ້ນອອກຈາກສະຖານະພາບປະເທດດ້ອຍພັດທະນາໃນປີ 2020 ອີກດ້ວຍ.
ໃນເດືອນເມສາ 1997 ສະຫະພາບເອີຣົບໄດ້ລົງນາມໃນຂໍ້ຕົກລົງການຮ່ວມມືກັບ ສປປ ລາວ, ຊຶ່ງຂໍ້ຕົກລົງດັ່ງກ່າວໄດ້ຮັບຮູ້ເຖິງສາຍພົວພັນອັນດີ ແລະ ການຮ່ວມມືລະຫວ່າງສະຫະພາບເອີຣົບ ແລະ ສປປ ລາວ, ຊຶ່ງມັນກາຍເປັນພື້ນຖານຂອງການຮ່ວມມືລະຫວ່າງລາວ ແລະ ສະຫະພາບເອີຣົບເປັນຕົ້ນມາ ແລະ ໄດ້ມີການສະເຫລີມສະຫລອງຂຶ້ນໃນທຸກໆປີ.
