ລັດຖະມົນຕີກະຊວງສຶກສາທິການ ແລະ ກິລາ ສົ່ງສານອວຍພອນວັນຄູແຫ່ງຊາດ 7 ຕຸລາ
ເນື່ອງໃນໂອກາດວັນຄູແຫ່ງຊາດ ວັນທີ 7 ຕຸລາ ຄົບຮອບ 26 ປີ (ວັນທີ 7 ຕຸລາ 1994 – ວັນທີ 7 ຕຸລາ 2020) ທ່ານລັດຖະມົນຕີກະຊວງສຶກສາທິການ ແລະ ກິລາ ໄດ້ຕາງໜ້າໃຫ້ຄະນະພັກ, ຄະນະນໍາກະຊວງ ສົ່ງສານອວຍພອນມາຍັງຄູ-ອາຈານ ເພື່ອຂໍສະແດງຄວາມຢື້ຢາມຖາມຂ່າວ, ຄວາມສາມັກຄີຮັກແພງອັນອົບອຸ່ນມາຍັງເພື່ອນໆຄູ-ອາຈານໃນຂອບເຂດທົ່ວປະເທດ ຕະຫລອດຮອດຜູ້ບໍລິຫານການສຶກສາ ແລະ ກິລາທຸກຂັ້ນ.
ໃນສານອວຍພອນດັ່ງກ່າວ ໄດ້ຍົກໃຫ້ເຫັນບົດບາດສໍາຄັນຂອງຄູໃນການສ້າງອະນາຄົດໃຫ້ຄົນແຕ່ລະຮຸ່ນ ແລະ ໃນພາລະກິດສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງ ຈົນໄດ້ຮັບຂະໜານນາມວ່າ: ຄູແມ່ນຄົນຂອງພັກ, ຄູແມ່ນວິສາວະກອນແຫ່ງດວງວິນຍານ, ຄູແມ່ນແມ່ພິມຂອງຊາດ, ຄູແມ່ນພໍ່ແມ່ຜູ້ທີ່ສອງຂອງເດັກ, ຄູແມ່ນຜູ້ທີ່ມີຄວາມຮູ້ ແລະ ປະສົບການທີ່ສາມາດຖ່າຍທອດໃຫ້ແກ່ຜູ້ອື່ນ, ຄູຄືຜູ້ນໍາພາການປ່ຽນແປງໃໝ່ ແລະ ອື່ນໆ.
ໃນໂອກາດອັນສຳຄັນນີ້, ທ່ານລັດຖະມົນຕີ ໄດ້ຕາງໜ້າໃຫ້ການນໍາຂອງພັກ ແລະ ລັດຖະບານ ຂໍສະແດງຄວາມກະຕັນຍູ, ຮູ້ບຸນຄຸນ ແລະ ຍ້ອງຍໍຊົມເຊີຍຕໍ່ຄຸນງາມຄວາມດີຂອງຄູ-ອາຈານ. ພ້ອມກັນນີ້, ກໍຂໍສະແດງຄວາມຂອບໃຈມາຍັງທຸກພາກສ່ວນໃນທົ່ວສັງຄົມທີ່ໄດ້ມີສ່ວນຮ່ວມ ແລະ ໃຫ້ການຊ່ວຍເຫລືອຄູ-ອາຈານ ແລະ ຜູ້ບໍລິຫານການສຶກສາລາວເຮົາຕະຫລອດມາ ເປັນການປະກອບສ່ວນຍົກສູງຄຸນນະພາບການສຶກສາຂອງປະເທດດີຂຶ້ນເປັນກ້າວໆ.
ທ່ານລັດຖະມົນຕີ ເນັ້ນວ່າ: ນອກຈາກຈະມີວິຊາສະເພາະແລ້ວ ຕ້ອງຮຽນຮູ້ບັນດາທັກສະ ສັດຕະວັດທີ 21 ເຊັ່ນ: ການນຳໃຊ້ເຕັກໂນໂລຊີຂໍ້ມູນຂ່າວສານ (ICT Literacy), ທັກສະການຮຽນດ້ວຍຕົນເອງ, ທັກສະທາງດ້ານສັງຄົມ (Soft Skills), ຮູ້ນຳໃຊ້ພາສາຕ່າງປະເທດ ແລະ ອື່ນໆ.
ທາງດ້ານຄວາມສາມາດ: ຕ້ອງເປັນຜູ້ນຳພາເຮັດຕົວຈິງໃນທຸກພາລະກິດທີ່ພັກ-ລັດມອບໝາຍໃຫ້ສຳເລັດ, ມີຄຸນນະພາບ ແລະ ດ້ວຍຄວາມຮັບຜິດຊອບສູງເຊັ່ນ: ຜັນຂະຫຍາຍຈິດໃຈ 3 ລັກສະ ນະ ແລະ 5 ຫລັກມູນຂອງຂະແໜງສຶກສາ ແລະ ກິລາ ຕິດພັນກັບຂໍ້ແຂ່ງຂັນຮັກຊາດ ແລະ ພັດ ທະນາ ແລະ 3 ຂໍ້ແຂ່ງຂັນຂອງຂະແໜງການຄື: ສອນດີ-ຮຽນເກັ່ງ, ຕ້ານປະກົດການຫຍໍ້ທໍ້ ແລະ ສ້າງສະພາບແວດລ້ອມທີ່ດີໃນສະຖານການສຶກສາໃຫ້ເປັນຮູບປະທຳ.
ທາງດ້ານຄຸນສົມບັດ: ຄູລາວໃນສັດຕະວັດທີ 21 ນີ້ ຈະຕ້ອງເປັນຜູ້ທີ່ມີຈັນຍາບັນອັນໜັກ ແໜ້ນ, ມີຈິດວິນຍານຂອງຄວາມເປັນຄູຢ່າງເລິກເຊິ່ງ, ບໍ່ສວຍໃຊ້ໜ້າທີ່ຕໍາແໜ່ງໄປໃນທາງທີ່ບໍ່ຖືກ ຕ້ອງ.
