ທ່ານ ທຣຳ ອອກມາທັກທາຍປະຊາຊົນນອກໂຮງໝໍ ຢືນຢັນຮຽນຮູ້ກ່ຽວກັບໂຄວິດ-19 ຫລາຍຂຶ້ນ
ປະທານາທິບໍດີ ໂດນັລ ທຣຳ ສ້າງຄວາມປະຫລາດໃຈ ດ້ວຍການນັ່ງລົດອອກຈາກໂຮງໝໍເພື່ອທັກທາຍກຸ່ມຜູ້ສະໜັບສະໜູນທີ່ມາໃຫ້ກຳລັງໃຈທ່ານນອກສູນການແພດທະຫານແຫ່ງຊາດວໍເຕີ ຣີດ ໃນວັນທີ 4 ຕຸລານີ້ ຫລັງທ່ານ ທຣຳ ເຂົ້າຮັບການປິ່ນປົວຈາກໂຄວິດ-19 ໃນທ້າຍອາທິດຜ່ານມາ.
ທ່ານ ທຣຳ ໃສ່ຜ້າປິດປາກ-ດັງນັ່ງຢູ່ໃນລົດ SUV ແລະ ຍົກມືໃຫ້ປະຊາຊົນໃນເວລາຂີ່ຜ່ານ ໂດຍກ່ອນໜ້ານັ້ນ ທ່ານໂພສຂໍ້ຄວາມໃນທະວິດເຕີວ່າ: ທ່ານຈະອອກມາຢ້ຽມຢາມປະຊາຊົນແບບເຊີໄພຣ.
ທີມແພດຢືນຢັນວ່າ: ທ່ານ ທຣຳ ມີອາການດີຂຶ້ນ ແລະ ອາດຈະອອກຈາກໂຮງໝໍມໍ່ໆນີ້ ໂດຍກ່ອນໜ້ານີ້, ທ່ານ ດຣ. ຊອນ ຄອນລີ ແພດປະຈຳທຳນຽບຂາວ ເປີດເຜີຍວ່າ: ລະດັບອົກຊີຂອງທ່ານ ທຣຳ ຫລຸດລົງ 2 ຄັ້ງນັບແຕ່ໄດ້ຮັບການບົ່ງມະຕິວ່າຕິດເຊື້ອໄວຣັສ ແລະ ເລີ່ມໃຊ້ສະເຕຍຣອຍຊື່ເດກຊາເມທາໂຊນຊ່ວຍປິ່ນປົວ.
ການອອກມາພົບປະກຸ່ມຜູ້ສະໜັບສະໜູນຄັ້ງນີ້ເປັນຄວາມພະຍາຍາມທີ່ຈະສະແດງຄວາມເຂັ້ມແຂງ ແລະ ສ້າງຄວາມເຊື່ອໝັ້ນ. ເຖິງຢ່າງໃດກໍຕາມ, ແພດບາງຄົນເບິ່ງໃນມຸມກົງກັນຂ້າມວ່າ: ການກະທຳດັ່ງກ່າວອາດເປັນອັນຕະລາຍຕໍ່ເຈົ້າໜ້າທີ່, ອີກທັງຍັງສະແດງໃຫ້ເຫັນວ່າ ທ່ານ ທຣຳ ຍັງບໍ່ເຂົ້າໃຈເຖິງຄວາມຮ້າຍແຮງຂອງພະຍາດຕິດເຊື້ອດັ່ງກ່າວ.
