ຂົນສົ່ງທາງອາກາດເລີ່ມກຽມການກະຈາຍວັກຊີນ COVID-19 ສູ່ທົ່ວໂລກ
ໜ່ວຍງານດ້ານການຂົນສົ່ງທາງອາກາດ ເລີ່ມເດີນໜ້າປະສານກັບໜ່ວຍງານທີ່ກ່ຽວຂ້ອງໃນລະດັບໂລກ ກຽມການກະຈາຍວັກຊີນປ້ອງກັນ COVID-19 ເຊິ່ງຄາດວ່າຕ້ອງໃຊ້ເຮືອບິນຂະໜາດໃຫຍ່ຫລາຍເຖິງ 8.000 ລຳ.
ເມື່ອບໍ່ດົນຜ່ານມາ ສະມາຄົມຂົນສົ່ງທາງອາກາດລະຫ່ວາງປະເທດ (IATA) ລະບຸວ່າ ການຂົນສົ່ງວັກຊີນ COVID-19 ໄປທົ່ວໂລກ ເປັນຄວາມທ້າທາຍຄັ້ງໃຫຍ່ທີ່ສຸດໃນວົງການຂົນສົ່ງ ແລະ ປະເມີນວ່າຈະຕ້ອງໃຊ້ເຮືອບິນຈຳໂບ້ ເຈັດ ທຽບເທົ່າໂບອິ້ງ 747 ຫລາຍເຖິງ 8.000 ລຳ.
ນອກຈາກນີ້, ເຮືອບິນທີ່ໃຊ້ຂົນສົ່ງວັກຊີນຍັງຕ້ອງຮັກສາອຸນຫະພູມໃຫ້ຢູ່ໃນໄລຍະລະຫ່ວາງ 2 – 8 ອົງສາ ຂະນະທີ່ວັກຊີນບາງຊະນິດອາດຕ້ອງເກັບຮັກສາດ້ວຍການແຊ່ແຂງເທົ່ານັ້ນ ເຊິ່ງຈະເຮັດໃຫ້ມີຈຳນວນຂອງເຮືອບິນທີ່ພ້ອມໃຊ້ຂົນສົ່ງວັກຊີນໄດ້ໜ້ອຍລົງຕື່ມອີກ. ທັງນີ້ ການຂົນສົ່ງວັກຊີນຍັງຕ້ອງການສະຖານທີ່ປາຍທາງທີ່ເປັນເຄືອຂ່າຍໃນການຈັດເກັບວັກຊີນແບບຮັກສາອຸນຫະພູມໄດ້ ເຊິ່ງສົ່ງຜົນໃຫ້ການກະຈາຍວັກຊີນໃນທະວີບອາຟຣິກາໃນຂະນະນີ້ຍັງບໍ່ສາມາດເຮັດໄດ້ ເນື່ອງຈາກຂາດແຄນສະຖານທີ່ຈັດເກັບ ແລະ ການເດີນທາງຂ້າມຊາຍແດນທີ່ຍັງເປັນບັນຫາສັບຊ້ອນ.
ເຖິງວ່າຂະນະນີ້ວັກຊີນ COVID-19 ຍັງຄົງຢູ່ໃນລະຫ່ວາງການພັດທະນາ, ແຕ່ລ້າສຸດທາງ IATA ໄດ້ປະສານງານກັບສາຍການບິນ, ສະໜາມບິນ, ບໍລິສັດຢາ ແລະ ໜ່ວຍງານດ້ານສາທາລະນະສຸກລະດັບໂລກ ເພື່ອກຽມການຂົນສົ່ງວັກຊີນ ໂດຍສະເພາະຢ່າງຍິ່ງການຂົນສົ່ງວັກຊີນໄປບາງປະເທດທີ່ບໍ່ສາມາດຜະລິດວັກຊີນໄດ້ເອງ.
