ເສດຖະກິດຈີນ ສືບຕໍ່ຟື້ນຕົວຢ່າງໄວວາ

ແຫຼ່ງຂ່າວຕ່າງປະເທດລາຍງານເມື່ອວັນທີ 1 ຕຸລານີ້ ໃຫ້ຮູ້ວ່າ: ເສດຖະກິດຂອງຈີນກຳລັງເຕີບໂຕແຮງໃນລະຫວ່າງເດືອນກັນຍາ ໃນຂະນະທີ່ຄວາມຕ້ອງການຂອງທົ່ວໂລກກໍກຳລັງຟື້ນຕົວແຮງເຊັ່ນດຽວກັນ, ພ້ອມດຽວກັນນັ້ນ ມາດຕະການຊຸກຍູ້ຂອງລັດຖະບານກຳລັງເກີດດອກອອກຜົນເປັນຢ່າງດີ.

ອີງຕາມຂໍ້ມູນສູນສະຖິຕິແຫ່ງຊາດຈີນປະກາດເມື່ອວັນທີ 30 ກັນຍາ ໃຫ້ຮູ້ວ່າ: ຂະແໜງການຊື້-ຂາຍ ແລະ ຜະລິດສິນຄ້າຂອງຈີນເພີ່ມຂຶ້ນ 51,5 ຄະແນນໃນເດືອນກັນຍາ, ຊຶ່ງເປັນຕົວເລກສູງກວ່າການຄາດຄະເນໄວ້ທີ່ 51,2 ຄະແນນຂອງບັນດາຂະເສດຖະກິດຂະແໜງການຕ່າງໆ ແລະ 51 ຄະແນນ ໃນເດືອນສິງຫາ. ຕົວຊີ້ວັດ PMI ສູງກວ່າ 50 ໝາຍຄວາມວ່າຂະແໜງການຜະລິດມີການຂະຫຍາຍຕົວ.

ຂະແໜງການບໍລິການ ເຊິ່ງເປັນຕ່ອງໂສ້ທີ່ສຳຄັນຂອງເສດຖະກິດ, ກໍໄດ້ມີການເພີ່ມຂຶ້ນຢ່າງແຂງແຮງໃນລະຫວ່າງເດືອນກັນຍາທີ່ຜ່ານມາ. ຕົວຊີ້ວັດ PMI ທີ່ບໍ່ແມ່ນການຜະລິດໂດຍກົງຂອງຈີນນັ້ນລວມມີ ຂະແໜງການບໍລິການ ແລະ ກໍ່ສ້າງ, ເຕີບໂຕຢູ່ທີ່ 55,9 ໃນເດືອນຜ່ານມາ, ເຊິ່ງເປັນຕົວເລກສູງສຸດນັບແຕ່ເດືອນພະຈິກ 2013 ເປັນຕົ້ນມາ ແລະ ດີລື່ນ 55,2 ຖ້າທຽບໃສ່ເດືອນສິງຫາ ປີ 2020.

Goldman Sachs, ຕີລາຄາວ່າ: ການປັບປຸງໃນຂະແໜງການບໍລິການ ກວມປະມານ 80%ໃນມູນຄ່າຂອງ PMI ທີ່ບໍ່ແມ່ນການຜະລິດໂດຍກົງ ຊຶ່ງໄດ້ຮັບການຜັກດັນຈາກຂະແໜງການຂົນສົ່ງ, ໂຮງແຮມ, ຮ້ານອາຫານ ໃນຂະນະທີ່ຊາວຈີນໃຫ້ຄວາມຕອບຮັບເປັນຢ່າງດີຕໍ່ຂະແໜງການທ່ອງທ່ຽວ.

ເຈົ້າໜ້າທີ່ຂອງຈີນຕັ້ງຄວາມຫວັງວ່າ ໃນໂອກາດພັກຍາວວັນບຸນ 8 ວັນທີ່ຈະມາເຖິງນີ້, ນັບແຕ່ວັນທີ 1 ຕຸລາ ຈະຊ່ວຍໃຫ້ການຈັບຈ່າຍໃຊ້ສອຍຂອງປະຊາຊົນພາຍໃນປະເທດຈະເພີ່ມຂຶ້ນສູງ, ໃນຂະນະທີ່ແຕ່ລະທ້ອງຖິ່ນມີຄວາມພ້ອມທີ່ຈະຈັດຕັ້ງຜັນຂະຫຍາຍໃນການໂຄສະນາ.

ພາກການສົ່ງອອກຂອງຈີນໄດ້ທັບມ້າງການພະຍາກອນຂອງຫຼາຍນັກຊ່ຽວຊານທີ່ໄດ້ພະຍາກອນໄວ້ກ່ອນໜ້ານີ້ຕໍ່ກັບເສດຖະກິດຂອງຈີນໃນປີນີ້. ຊຶ່ງຈີນສາມາດຟື້ນຟູໃຫ້ບັນດາໂຮງຈັກໂຮງງານກັບຄືນມານັ້ນໄດ້ຊ່ວຍໃຫ້ການຜະລິດອຸປະກອນການແພດ ແລະ ເຄື່ອງໄຟຟ້າຢ່າງໄວວາ ໃນຂະນະທີ່ໂລກກຳລັງວຸ່ນວາຍກັບການລະບາດຂອງພະຍາດຢູ່.