ບຣູໄນປະກາດຍົກເລີກອອກທະນະບັດ ລາຄາສູງສຸດ 1 ໝື່ນໂດລາບຣູໄນ
ວັນທີ 1 ຕຸລານີ້, ທະນາຄານກາງບຣູໄນເປີດເຜີຍແຜນຢຸດການຜະລິດ ແລະ ການໝູນວຽນໃນຕະຫລາດຂອງທະນະບັດ ລາຄາ 10.000 ໂດລາບຣູໄນ ເຊິ່ງເປັນທະນະບັດລາຄາສູງສຸດຂອງປະເທດ.
ໜັງສືພິມບໍນຽວບູລເລຕິນ ລາຍງານໃນວັນທີ 29 ກັນຍາຜ່ານມາວ່າ: ສະຖາບັນການເງິນບຣູໄນດາລູຊາລາມ ຫລື AMBD ກ່າວວ່າ: ຈະບໍ່ມີການອອກທະນະບັດ 10.000 ໂດລາບຣູໄນ ໃຫ້ທະນາຄານທຸກແຫ່ງໃນປະເທດອີກຕໍ່ໄປ ແລະ ຈະທະຍອຍຖອນຄືນຈາກການໝູນວຽນໃນຕະຫລາດຕາມລຳດັບ ມີຜົນບັງຄັບໃຊ້ນັບແຕ່ວັນທີ 2 ພະຈິກນີ້.
AMBD ກ່າວວ່າ: ການຕັດສິນໃຈຖອນທະນະບັດລາຄາດັ່ງກ່າວເປັນໜຶ່ງໃນຂັ້ນຕອນທີ່ AMBD ຫລຸດຄວາມສ່ຽງກ່ຽວກັບອາດຊະຍາກຳທາງການເງິນເຊັ່ນ: ການຟອກເງິນ, ການຈັດຫາເງິນເພື່ອການກໍ່ການຮ້າຍ ແລະ ການປອມແປງທະນະບັດທີ່ມີລາຄາສູງ.
AMBD ຍັງສະໜັບສະໜູນປະຊາຊົນໃຊ້ວິທີຈ່າຍເງິນທາງເລືອກຕ່າງໆ ທີ່ເຂົ້າເຖິງໄດ້ໃນບຣູໄນເຊັ່ນ: ບັດເດບິດ ຫລື ບັດເຄຣດິດ ແລະ ການຊຳລະເງິນອອນລາຍສຳລັບທຸລະກຳທີ່ມີມູນຄ່າສູງ.
