ເກີດລະເບີດຂ້ານາຍທະຫານອູແກຣນ ກາງນະຄອນຫລວງກຽບ
ນາຍທະຫານຍົດພັນເອກສັງກັດໜ່ວຍຂ່າວກອງທັບບົກອູແກຣນເສຍຊີວິດ ເມື່ອລົດຍົນທີ່ກຳລັງຂັບຂີ່ຢູ່ຖະໜົນໃນນະຄອນຫລວງກຽບເກີດການລະເບີດຂຶ້ນຈົນລົດພັງທັງໝົດ ໃນຕອນເຊົ້າວັນທີ 27 ມິຖຸນານີ້, ທາງທະຫານລະບຸເປັນການກໍ່ການຮ້າຍ.
ສຳນັກຂ່າວຕ່າງປະເທດລາຍງານຈາກນະຄອນຫລວງກຽບ ປະເທດອູແກຣນ ໃນວັນທີ 27 ມິຖຸນານີ້ວ່າ: ຜູ້ເສຍຊີວິດຄື ພັນເອກ ແມັກຊິມ ຊາໂປວັດ ຕຳແໜ່ງຫົວໜ້າໜ່ວຍປະຕິບັດການພິເສດ ໜ່ວຍຂ່າວກອງທັບບົກອູແກຣນ ແລະ ມີປະຊາຊົນທີ່ຍ່າງຢູ່ບໍລິເວນໃກ້ຄຽງຖືກລູກຫລົງໄດ້ຮັບບາດເຈັບ 1 ຄົນ. ທ່ານ ອາເຕມ ເຊບເຊນໂກ ໂຄສົກກະຊວງປ້ອງກັນປະເທດ ກ່າວວ່າ: ເຫດເກີດໃນຕອນເຊົ້າວັນທີ 27 ມິຖຸນາ ຂະນະທີ່ ພັນເອກ ຊາໂປວັດ ກຳລັງຂັບຂີ່ລົດສ່ວນຕົວ ຢູ່ຖະໜົນໃກ້ສີ່ແຍກໄຟແດງແຫ່ງໜຶ່ງໃນນະຄອນຫລວງກຽບ ເກີດການລະເບີດຂຶ້ນຢ່າງຮຸນແຮງ ຈົນລົດເປ່ເພເສຍຫາຍທັງໝົດ ແລະ ພັນເອກ ຊາໂປວັດ ເສຍຊີວິດຄາທີ່, ຕຳຫລວດກຳລັງສອບສວນໂດຍມຸ່ງບັນຫາກໍ່ການຮ້າຍ.
ຖືເປັນຄວາມຮຸນແຮງຫລ້າສຸດທີ່ເກີດຂຶ້ນຢູ່ເມືອງຫລວງຂອງປະເທດທີ່ກຳລັງຜະເຊີນວິກິດການຄວາມໝັ້ນຄົງ ເຊິ່ງກຳລັງສູ້ຮົບນອງເລືອດກັບກະບົດແບ່ງແຍກດິນແດນທາງຕາເວັນອອກທີ່ຣັດເຊຍສະໜັບສະໜູນ.
ໃນຕົ້ນເດືອນມິຖຸນາ, ຜູ້ບັນຊາການກອງກຳລັງອາສາສະໝັກຊາວອູແກຣນ ທີ່ມາຈາກພາກພື້ນເຊສເນຍຂອງຣັດເຊຍ ເຊິ່ງເຄີຍຖືກຈຳຄຸກຂໍ້ຫາຕ້ອງສົງໄສວາງແຜນສັງຫານປະທານາທິບໍດີ ວະລາດິເມຍ ປູຕິນ ຜູ້ນຳຣັດເຊຍ ຖືກມືປືນບຸກຍິງໄດ້ຮັບບາດເຈັບສາຫັດ ແລະ ໃນເດືອນມີນາ, ທ່ານ ເດນິສ ໂວໂຣເນນຄອບ ອະດີດ ສສ ຣັດເຊຍ ຕໍ່ມາກາຍເປັນປໍລະປັກກັບທຳນຽບແກມລິນ ຖືກມືປືນຍິງເສຍຊີວິດຄາທີ່ ກາງນະຄອນຫລວງກຽບ ແລະ ໃນປີຜ່ານມາ, ທ່ານ ພາເວວ ເຊເຣເມັດ ນັກຂ່າວໜັງສືພິມຊື່ດັງ ຖືກລອບລາງລະເບີດລົດຍົນ ເສຍຊີວິດກາງນະຄອນຫລວງກຽບ.
