ອາເມລິກາກ່າວຫາລັດຖະບານຊີຣີ ກຽມໃຊ້ອາວຸດເຄມີໂຈມຕີອີກ
ສຳນັກຂ່າວຕ່າງປະເທດລາຍງານຈາກນະຄອນຫລວງວໍຊິງຕັນ ປະເທດອາເມລິກາ ໃນວັນທີ 26 ມິຖຸນານີ້ວ່າ: ລັດຖະບານອາເມລິກາພົບຫລັກຖານທີ່ເຮັດໃຫ້ເຊື່ອວ່າ: ກອງທັບຊີຣີຂອງປະທານາທິບໍດີ ບາຊາ ອານ ອັດຊັດ ກຳລັງກຽມປະຕິບັດການໂຈມຕີດ້ວຍອາວຸດເຄມີເທື່ອໃໝ່, ພາຍຫລັງການໂຈມຕີເທື່ອກ່ອນໜ້າສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 70 ຄົນ.
ທຳນຽບຂາວອອກຖະແຫລງການລະບຸວ່າ: ອາເມລິກາພົບວ່າລັດຖະບານຊີຣີຂອງປະທານາທິບໍດີ ອັດຊັດ ກຳລັງກຽມຄວາມພ້ອມສັ່ງໂຈມຕີດ້ວຍອາວຸດເຄມີ ທີ່ຈະເຮັດໃຫ້ມີພົນລະເມືອງ ແລະ ເດັກຜູ້ບໍລິສຸດເສຍຊີວິດເປັນຈຳນວນຫລາຍ ໂດຍກອງທັບຊີຣີມີການເຄື່ອນໄຫວຄືກັບກ່ອນເກີດເຫດໂຈມຕີຖານທີ່ໝັ້ນຂອງກຸ່ມກະບົດດ້ວຍອາວຸດເຄມີໃນວັນທີ 4 ເມສາ, ການໂຈມຕີເທື່ອນັ້ນ ທີ່ກອງທັບຊີຣີປະຕິເສດວ່າເປັນຜູ້ລົງມືກໍ່ເຫດ ເຮັດໃຫ້ມີຜູ້ເສຍຊີວິດຢ່າງໜ້ອຍ 70 ຄົນ, ອາເມລິກາໂດຍລັດຖະບານປະທານາທິບໍດີ ໂດນັນ ທຣຳ ຕອບໂຕ້ດ້ວຍການສັ່ງຍິງລູກສອນໄຟໂທມາຮວກຈາກເຮືອຮົບຖະຫລົ່ມຖານທັບອາກາດຂອງຊີຣີ.
ທ່ານ ໝອນ ສໄປເຊີ ໂຄສົກທຳນຽບຂາວເຕືອນວ່າ: ປະທານາທິບໍດີ ອັດຊັດ ແລະ ກອງທັບຊີຣີຈະໄດ້ຮັບຜົນຢ່າງສາສົມ ຖ້າຍັງຈະເດີນໜ້າໃຊ້ອາວຸດເຄມີໃນການໂຈມຕີກຸ່ມກະບົດ.
