WHO ກຽມຈັດຫາຊຸດກວດໂຄວິດ-19 ຮີບດ່ວນ ຊ່ວຍກຸ່ມປະເທດລາຍໄດ້ໜ້ອຍ
ວັນທີ 29 ກັນຍາ, ອົງການອະນາໄມໂລກ (WHO) ຂຶ້ນແຜນກຽມຈັດຫາຊຸດກວດໂຄວິດ-19 ແບບຮີບດ່ວນ ຮູ້ຜົນໄວໃຫ້ແກ່ກຸ່ມປະເທດລາຍໄດ້ໜ້ອຍ ຫລື ປະເທດກຳລັງພັດທະນາປະມານ 20 ປະເທດ ໂດຍສະເພາະປະເທດຢູ່ທະວີບອາຟຣິກາ ເຊິ່ງເຄື່ອງກວດໂຄວິດ-19 ຈະກວດຫາແອນຕິເຈນ ຫລື ສານສ້າງພູມຕ້ານທານ ກ່ອນຈະສະແດງຜົນພາຍໃນ 15-30 ນາທີ ໃນລາຄາຊຸດລະ 5 ໂດລາສະຫະລັດ.
ເບື້ອງຕົ້ນໂຄງການນີ້ຄາດຈະໃຊ້ງົບປະມານ 600 ໂດລາສະຫະລັດ ແລະ ຄາດວ່າຈະເລີ່ມຕົ້ນໃນເດືອນຕຸລານີ້. ດ້ານທ່ານ ດຣ. ທີໂດຣສ ອັດຮານອມ ກີບຣີເຢຊຸສ ຜູ້ອຳນວຍການໃຫຍ່ອົງການອະນາໄມໂລກ ຊີ້ວ່າ: ໂຄງການນີ້ຈະຊ່ວຍສົ່ງເສີມການກວດກາການຕິດເຊື້ອໃນປະເທດທີ່ລະບົບສາທາລະນະສຸກອາດຈະຍັງບໍ່ມີປະສິດທິພາບ ແລະ ຫລຸດຊ່ອງວ່າງແຜນຮັບມືພະຍາດລະບາດໃນປະຊາຄົມໂລກ.
ຫລ້າສຸດການແຜ່ລະບາດຜ່ານມາເຖິງ 9 ເດືອນ ທົ່ວໂລກມີຜູ້ຕິດເຊື້ອສະສົມແລ້ວ 33 ລ້ານກວ່າຄົນ, ເສຍຊີວິດແລ້ວເກີນ 1 ລ້ານຄົນ ໂດຍທະວີບອາເມລິກາມີຜູ້ຕິດເຊື້ອສະສົມຫລາຍທີ່ສຸດ (ປະມານ 16,4 ລ້ານຄົນ), ຖັດມາແມ່ນທະວີບອາຊີ (ປະມານ 6,8 ລ້ານຄົນ) ແລະ ເອີຣົບ (ປະມານ 5,7 ລ້ານຄົນ).
