ຍັງໜ້າເປັນຫ່ວງການເລືອກບຸກຄະລາກອນ ເຂົ້າໃນຕຳແໜ່ງການນຳແຕ່ລະຂັ້ນ

ໂດຍ: ລູກເມືອງພວນ

ປີນີ້ເປັນປີດຳເນີນກອງປະຊຸມໃຫ່ຍ 3 ຂັ້ນ(ເມືອງ-ແຂວງ-ສູນກາງ). ຂັ້ນເມືອງໃນທົ່ປະເທດແມ່ນສຳເລັດເສັດສິ້ນໄປເປັນທີ່ຮຽບຮ້ອຍແລ້ວ, ປັດຈຸບັນກຳລັງດຳເນີນຢູ່ຂັ້ນແຂວງຢ່າງຂຸ້ນຂ້ຽວເພື່ອໃຫ້ສຳເລັດໃນທ້າຍປີນີ້, ເມື່ອຢ່າງເຂົ້າປີໃໝ່ປີ 2021 ກໍກະກຽມໃຫ້ກອງປະຊຸມໃຫ່ຍຜູ້ແທນທົ່ວປະເທດຄັ້ງທີ XI ຂອງພັກປະຊາຊົນປະຕິວັດລາວ.

ພໍແຕ່ສຳເລັດຂັ້ນເມືອງກໍພໍສັງເກດເຫັນວ່າ: ການເລືອກເອົາບຸກຄະລາກອນເຂົ້າໃນຕຳແໜ່ງ ການນຳຂັ້ນເມືອງນັ້ນ, ໂດຍພື້ນຖານກໍແມ່ນເຮັດໄດ້ດີ, ມີການເລືອກເຟັ້ນຕາມມາດຕະຖານ ແລະ ເງື່ອນໄຂທີ່ວາງໄວ້ເປັນສ່ວນໃຫ່ຍ. ແຕ່ເບິ່ງເຂົ້າເລິກເຂົ້າໄປແລ້ວ ກໍຍັງບໍ່ມົ້ມ ການເລືອກຄົນເຈົ້າຄົນຂ້ອຍ, ການໄດ້ມາດ້ວຍວິທີການຕ່າງໆ ທີ່ເຫັນວ່າຍັງບໍ່ທັນມີຄວາມໂປ່ງໃສຢ່າງແທ້ຈິງ. ອັນທີ່ສຳຄັນບຸກຄົນທີ່ໄດ້ຮັບເລືອກຕັ້ງເປັນຫົວໜ້າໃນລະດັບຫ້ອງການ,  ອົງການຂັ້ນເມືອງ, ຫົວໜ້າພະແນກການ, ອົງການຕ່າງໆຂັ້ນແຂວງ ແລະ ເຈົ້າເມືອງຈຳນວນໜຶ່ງນັ້ນ ແມ່ນຍັງບໍ່ທັນເຫັນຜົນງານທີ່ເປັນອັນຈະແຈ້ງ ແລະ ພົ້ນເດັ່ນແທ້ ແຕ່ກໍຖືກເລືອກໃຫ້ມາເປັນຫົວໜ້າອີກຄັ້ງໃໝ່ ຈຶ່ງເຫັນວ່າວຽກບໍ່ໄປບໍ່ມາ ແລະ ບໍ່ມີຫຍັງຫັນປ່ຽນໃຫ້ດີຂຶ້ນ.

ຕາມຂ້າພະເຈົ້າຜູ້ຂຽນເຄີຍຢູ່ໃນວົງການການເມືອງມາຍາວນານ ສັງເກດເຫັນວ່າ: ພໍແຕ່ຈະມີກອງປະຊຸມໃຫ່ຍໃກ້ຈະເກີດຂຶ້ນ ກໍມີພະນັກງານຈຳນວນໜຶ່ງເລີ່ມວິ່ງເຕັ້ນຫາຕົ້ນຮົ່ມໂພຄຳ ຫຼື ດ້ວຍວິທີທາງການທີ່ບໍ່ເໝາະບໍ່ສົມ ຫຼື ຝາກໃຫ້ເບິ່ງແຍງລູກຫຼານ, ເພື່ອນສະໜີດມິດສະຫາຍຂອງຕົນ, ທັງໆທີ່ຜູ້ນັ້ນບໍ່ມີຜົນງານໂດດເດັ່ນ ແລະ ບໍ່ມີຫົວຄິດປະດິດສ້າງຫຍັງເລີຍ.

ດ້ານທີສອງພໍສັງເກດເຫັນວ່າ ຜູ້ທີ່ເລືອກໃຫ້ມາເປັນຫົວໜ້າໃນລະດັບຕ່າງໆນັ້ນ ກໍເພື່ອໃຫ້ໄດ້ມີໜ້າມີຕາໃນສັງຄົມ ເພື່ອໃຫ້ໄດ້ຄວາມນັບຖືເກງໃຈຂອງຄົນທົ່ວໄປ ແຕ່ຄຸນນະພາບໃນການບໍລິຫານຮັບໃຊ້ໃຫ້ແກ່ປະເທດຊາດນັ້ນບໍ່ມີຫຍັງທີ່ສະແດງໃຫ້ເຫັນເປັນທີ່ປະຈັກຕາ ແລະ ໂດດເດັ່ນ ເພິ່ງພໍໃຈໃຫ້ແກ່ຄົນທົ່ວໄປ. ຮ້າຍແຮງໄປກ່ວານັ້ນ, ມີບາງຄົນເມື່ອໄດ້ເຂົ້າມາມີສິດໜ້າທີ່ຕຳແໜ່ງແລ້ວ ກໍສວຍໂອກາດໃນອຳນາດຂອງຕົນເພື່ອ ສໍ້ເອົາ, ໂກງເອົາ, ຍັກຍອກເອົາຊັບສິນສ່ວນລວມມາເປັນຂອງຕົນເອງເຊັ້່ນ: ຈັບຈ່ອງດິນ, ຫາວິທີໂລບເອົາເງິນງົບປະມານ, ຮຽກຮ້ອງຄ່າຈ້າງລາງວັນ…

ຕົ້ນປີໃໝ່ 2021 ທີ່ຈະມາເຖິງນີ້ ກໍຈະເປັນກອງປະຊຸມໃຫ່ຍຜູ້ແທນທົ່ວປະເທດຄັ້ງທີ 11 ຂອງພັກປະຊາຊົນລາວອີກຄັ້ງ, ຫວັງຢ່າງຍິ່ງວ່າ: ພັກຈະມີການຫັນປ່ຽນຢ່າງຕັ້ງໜ້າ ແລະ ເດັດຂາດ ເພື່ອເລືອກເອົາຄົນດີຄົນເກັ່ງ, ຄົນມີຄວາມຮູ້ຄວາມສາມາດ ແລະ ມີຄຸນສົມບັດສິນທຳປະຕິວັດເຂົ້າມາຮັບໃຊ້ຮັບປະຊາຊົນ ເພື່ອໃຫ້ປະເທດຊາດມີຄວາມກ້າວໜ້າ, ປະເທດຊາດພົ້ນອອກຈາກສະພາວະດ້ອຍພັດທະນາໂດຍໄວ, ມີມາດຕະການຕ້ານ ແລະ ສະກັດກັ້ນ ການເລືອກເອົາບຸກຄົນທີ່ສໍ້ລາດບັງຫຼວງ, ກິນສິນບົນ ຫຼື ມີເລ່ຫຼ່ຽມກົນອຸບາຍ ຫາສິດຜົນປະໂຫຍດມາໃສ່ຕົນເອງ ອອກຈາກພັກດ້ວຍຄວາມກ້າຫານ, ເພາະເຖິງເວລາແລ້ວ ປະເທດຊາດໄດ້ຮັບຄວາມເຈັບປວດ, ຊໍ້າເຕີມມາເປັນເວລາຍາວນານສົມຄວນແລ້ວ. ເຮັດເໝືອນດັ່ງເຊັ່ນດຽວກັນກັບທີ່ທ່ານ ເລຂາທິການໃຫ່ຍ, ປະທານປະເທດ ຫງວຽນຟູຈ໊ອງ ຂອງຫວຽດນາມ ກ່າວຕັດສິນໃຈ ແລະ ໃຫ້ຄຳໝັ້ນສັນຍາຕໍ່ປະຊາຊົນວ່າກອງປະຊຸມໃຫ່ຍຜູ້ແທນທົ່ວປະເທດຄັ້ງທີ 13 ຂອງຫວຽດນາມທີ່ຈະມາເຖິງນີ້ຈະ “ບໍ່ໃຫ້ມີການແລ່ນຕຳແໜງຢ່າງເດັດຂາດ”.

ເຖິງເວລາແລ້ວທີ່ພວກເຮົາຈະຕ້ອງເຮັດແທ້ທຳຈິງກ່ຽວກັບເລື່ອງນີ້, ຖ້າບໍ່ດັ່ງນັ້ນປະເທດຊາດກໍຈະຢໍ້າເທົ້າຢູ່ບ່ອນເກົ່ ແລະ ກອງປະຊຸມໃຫ່ຍຈັກສິເທື່ອສິທີ ກໍຍັງຄືເກົ່າແມ່ນປະເທດຊາດກໍຈະນັບມື້ທຸກຍາດລົງຊັກໃຊ້. ພວກເຮົາຈົ່ງພ້ອມກັນຕັດສິນໃຈໃຫ້ໄດ້ສົມກັບວ່າພັກ “ພັກສະຫຼາດສ່ອງໃສ”, “ພັກມາຈາກປະຊາຊົນ, ໂດຍປະຊາຊົນ ແລະ ເພື່ອສິດຜົນປະໂຫຍດອັນແທ້ຈິງຂອງປະຊາຊົນ”.