ຄີມຈອງອູນ ຂໍໂທດ ກຸງໂຊລ ທີ່ໄດ້ຍິງເຈົ້າໜ້າທີ່ຂອງເກົາຫຼີໃຕ້ຕາຍ

ແຫຼ່ງຂ່າວຈາກ vietnamnet, ວັນທີ 25 ກັນຍາ ໃຫ້ຮູ້ວ່າ: ປະທານປະເທດຂອງເກົາຫຼີເໜືອ ທ່ານ ຄີມຈອງອູນ ກ່າວວ່າ: “ບໍ່ຄວນຈະເກີດຂຶ້ນ”, ທ່ານໄດ້ກ່າວຂໍໂທດ ເພາະໄດ້ເຮັດໃຫ້ເກົາຫຼີໃຕ້ບໍ່ພໍໃຈ.

ທ່ານ Suh Hoon ຜູ້ຮັບຜິດຊອບຄວາມໝັ້ນຄົງແຫ່ງຊາດໃຫ້ຮູ້ ວັນທີ 25 ກັນຍາວ່າ: “ຜູ້ນຳເກົາຫຼີເໜືອ ທ່ານ ຄີມຈອງອູນ ໄດ້ສະແດງຄວາມເສຍໃຈທີ່ໄດ້ເຮັດໃຫ້ປະທານາທິບໍດີ Moon Jae In ແລະ ເຈົ້າໜ້າທີ່ຄົນອື່ນໆຂອງເກົາຫຼີໃຕ້ ທີ່ໄດ້ສະແດງຄວາມໝົດຫວັງ”.

ເຈົ້າໜ້າທີ່ຂອງເກົາຫຼີໃຕ້ຄົນດັ່ງກ່າວ ອາຍຸ 47 ປີ, ເປັນພະນັກງານສັງກັດຢູ່ກະຊວງມະຫາສະໝຸດ ແລະ ຊາວປະມົງ, ໄດ້ຫາຍສາບສູນໄປເມື່ອວັນທີ 21 ກັນຍາ, ໃນຂະນະທີ່ກຳລັງປະຕິບັດໜ້າທີ່ລາດຕະເວນໃນທະເລໝູ່ເກາະ Yeonpyeong.

ໃນບົດຖະແຫຼງການຂອງເກົາຫຼີໃຕ້ ກ່າວວ່າ: “ເກົາຫຼີເໜືອໄດ້ພົບເຫັນເຈົ້າໜ້າທີ່ຄົນດັ່ງກ່າວຂອງຕົນຢູ່ໃນເຂດທະເລຂອງເກົາຫຼີເໜືອ ແລະ ໄດ້ຍິງເຂົາຕາຍ. ນີ້ແມ່ນຄວາມໃຫ້ການຂອງໜ່ວຍນັກສືບລັບຂອງທະຫານພວກເຮົາ”

BBC ອອກຂ່າວວ່າ: ໃນບົດຖະແຫຼງການດັ່ງກ່າວນັ້ນກໍຍົກໃຫ້ເຫັນວ່າ ທາງເກົາຫຼີເໜືອກໍໄດ້ແຈ້ງໃຫ້ຮູ້ວ່າ: ພວກເຂົາໄດ້ຍິງ 10 ນັດໃສ່ເຈົ້າໜ້ທີ່ຄົນດັ່ງກ່າວຂອງເກົາຫຼີໃຕ້ ທີ່ລ່ວງລະເມີດເຂດແດນຂອງເກົາຫຼີເໜືອ ໃນເມື່ອເຂົາບໍ່ຍອມໃຫ້ຮູ້ຊື່ສຽງຮຽງນາມ ແຕ່ຍັງພະຍາຍາມຫຼົບໜີອີກຕ່າງຫາກ.

ພຽງຢາງໃຫ້ຄຳໝັ້ນສັນຍາວ່າ: ຈະມີຄວາມລະມັດລະວັງໃຫ້ດີກ່ວາເກົ່າ ເພື່ອບໍ່ໃຫ້ເສຍຄວາມໄວ້ວາງໃຈເຊິ່ງກັນ ແລະ ກັນຂອງສອງພາກເກົາຫຼີ ແລະ ທັງຢືນຢັນວ່າ: ຈະບໍ່ໃຫ້ເຫດການເຊັ່ນນີ້ເກີດຂຶ້ນອີກ.

ທ່ານ Suh Hoon ໃຫ້ຮູ້ເພີ່ມເຕີມວ່າ: ພາຍຫຼັງຍິງເຂົາແລ້ວ ບໍ່ເຫັນຊາກສົບຂອງເຂົາ, ພວກຕົນຈຶ່ງໄດ້ເຜົາວັດຖຸອຸປະກອນຂອງເຂົາຖິ້ມ ເພື່ອປ້ອງກັນພະຍາດໂຄວິດ-19 ຕາມຄຳສັ່ງຂອງລັດຖະບານ.