ທ່ານ ກິມຈ໋ອງອິນ ສົ່ງຈົດໝາຍຂໍໂທດຊາວ ສ.ເກົາຫລີ ຫລັງເກີດເຫດທະຫານ ສປປ ເກົາຫລີ ຍິງເຈົ້າໜ້າທີ່ ສ.ເກົາຫລີ ເສຍຊີວິດ
ທຳນຽບປະທານາທິບໍດີ ສ.ເກົາຫລີ ເປີດເຜີຍວ່າ: ທ່ານ ກິມຈ໋ອງອິນ ຜູ້ນຳ ສປປ ເກົາຫລີ ສົ່ງຈົດໝາຍສະແດງຄວາມຂໍໂທດຢ່າງເປັນທາງການຕໍ່ຊາວ ສ.ເກົາຫລີ ສຳລັບກໍລະນີທີ່ທະຫານ ສປປ ເກົາຫລີ ຍິງເຈົ້າໜ້າທີ່ຜູ້ຊາຍອາຍຸ 47 ປີ ຂອງກົມປະມົງ ສ.ເກົາຫລີ ເສຍຊີວິດໃນນ່ານນ້ຳ ສປປ ເກົາຫລີ ໃນວັນທີ 22 ກັນຍາຜ່ານມາ ພາຍຫລັງເຮືອລາດຕະເວນຂອງກອງທັບ ສປປ ເກົາຫລີ ພົບລາວໃສ່ເສື້ອຊູຊີບລອຍຢູ່ໃນນ່ານນ້ຳ ສປປ ເກົາຫລີ ແລະ ພະຍາຍາມເຂົ້າກວດສອບ, ແຕ່ລາວປະຕິເສດສະແດງຕົວຕົນ ແລະ ພະຍາຍາມໜີ.
ໂດຍ ສ.ເກົາຫລີ ລາຍງານວ່າ: ພາຍຫລັງຍິງສັງຫານ ທະຫານ ສປປ ເກົາຫລີ ໄດ້ຈູດສົບຂອງລາວກາງທະເລ.
ທ່ານ ຊໍຮຸນ ຜູ້ອຳນວຍການຝ່າຍຄວາມໝັ້ນຄົງແຫ່ງຊາດຂອງບລູເຮົາ ເປີດເຜີຍເນື້ອໃນຂອງຈົດໝາຍວ່າ: ຜູ້ນຳ ສປປ ເກົາຫລີ ສະແດງຄວາມເສຍໃຈຢ່າງສຸດຊຶ້ງ ສຳລັບການສ້າງຄວາມຜິດຫວັງຢ່າງໃຫຍ່ຫລວງຕໍ່ປະທານາທິບໍດີ ມຸນແຈອິນ ແລະ ປະຊາຊົນ ສ.ເກົາຫລີ ຫລັງເກີດກໍລະນີທີ່ບໍ່ໜ້າຍິນດີຂຶ້ນໃນນ່ານນ້ຳຂອງຕົນ.
ຂະນະທີ່ ສ.ເກົາຫລີ ລະບຸວ່າ: ຈົດໝາຍສະແດງຄວາມຂໍໂທດຢ່າງເປັນທາງການຂອງຜູ້ນຳ ສປປ ເກົາຫລີ ນັ້ນ ຖືເປັນເລື່ອງບໍ່ປົກກະຕິ ແລະ ເກີດຂຶ້ນໄດ້ຍາກ.
ກະຊວງປ້ອງກັນປະເທດ ສ.ເກົາຫລີ ເປີດເຜີຍວ່າ: ເຈົ້າໜ້າທີ່ກົມປະມົງຄົນນີ້ຫາຍຕົວໄປໃນວັນທີ 21 ກັນຍາ ລະຫວ່າງອອກລາດຕະເວນທາງເຮືອໃນນ່ານນ້ຳໃກ້ເກາະຢອນພະຢອງ ຫ່າງຈາກຊາຍແດນ ສປປ ເກົາ ປະມານ 10 ກິໂລແມັດ ເຊິ່ງລາວປົດເກີບໄວ້ຢູ່ເຮືອ ກ່ອນຈະຫາຍໄປ ແລະ ຖືກເຮືອລາດຕະເວນ ສປປ ເກົາຫລີ ກວດພົບໃນຕອນບ່າຍວັນທີ 22 ກັນຍາ ໂດຍໃສ່ເສື້ອຊູຊີບລອຍຢູ່ໃນນ່ານນ້ຳ ສປປ ເກົາຫລີ.
ເຊິ່ງທະຫານ ສປປ ເກົາຫລີ ໄດ້ໃສ່ຜ້າປິດປາກປ້ອງກັນແກັສພິດຮ້ອງສອບຖາມລາວຈາກໄລຍະໄກ ຕາມມາດຕະການປ້ອງກັນໂຄວິດ-19, ແຕ່ລາວບໍ່ຍອມເປີດເຜີຍຕົວຕົນ ກ່ອນຜູ້ບັນຊາການລະດັບສູງຂອງ ສປປ ເກົາຫລີ ຈະມີຄຳສັ່ງໃຫ້ຍິງ.
ເຖິງຢ່າງໃດກໍຕາມ, ສື່ທ້ອງຖິ່ນ ສ.ເກົາຫລີ ລາຍງານວ່າ: ເຈົ້າໜ້າທີ່ກົມປະມົງຄົນນີ້ ເຊິ່ງເປັນພໍ່ລູກສອງ ກຳລັງປະສົບບັນຫາດ້ານການເງິນ ແລະ ຫາກໍຢ່າຮ້າງຈາກພັນລະຍາ ແຕ່ບໍ່ແນ່ນອນວ່າການຂ້າມນ່ານນ້ຳໄປ ສປປ ເກົາຫລີ ທີ່ເກີດຂຶ້ນນັ້ນເປັນຄວາມຕັ້ງໃຈ ຫລື ບໍ່.
ຂະນະດຽວກັນ ຝ່າຍ ສປປ ເກົາຫລີ ໄດ້ແຈ້ງຕໍ່ທາງການ ສ.ເກົາຫລີ ເຖິງຜົນສືບສວນເຫດການທີ່ເກີດຂຶ້ນ ໂດຍລະບຸວ່າເຮືອລາດຕະເວນຂອງ ສປປ ເກົາຫລີ ພົບຜູ້ຊາຍບໍ່ຮູ້ທີ່ມາລອຍມາກັບວັດຖຸລອຍນ້ຳ ຂ້າມຊາຍແດນທາງທະເລຕາເວັນຕົກເຂົ້າມາໃນນ່ານນ້ຳ ສປປ ເກົາຫລີ ໂດຍບໍ່ໄດ້ຮັບອະນຸຍາດ ແລະ ບໍ່ຍອມສະແດງຕົວຕົນ ຫລື ຕອບຄຳຖາມ ເພື່ອກວດສອບດ້ານຄວາມໝັ້ນຄົງ ໂດຍລອຍຢູ່ຫ່າງຈາກເຮືອລາດຕະເວນປະມານ 80 ແມັດ.
ເມື່ອເຂົ້າໄປໃກ້ ທະຫານ ສປປ ເກົາຫລີ ໄດ້ຍິງຂູ່ດ້ວຍລູກປືນແບງ 2 ນັດ ເຮັດໃຫ້ລາວພະຍາຍາມໜີ. ຈາກນັ້ນທະຫານ ສປປ ເກົາຫລີ ຈຶ່ງລັ່ນໄກສັງຫານກວ່າ 10 ນັດ ຈາກໄລຍະ 40 ຫາ 50 ແມັດ ເຊິ່ງເປັນໄປຕາມກົດການຜະເຊີນໜ້າ ເພື່ອຄວາມໝັ້ນຄົງໃນຊາຍແດນທາງທະເລ.
ທັງນີ້ ສປປ ເກົາຫລີ ຢືນຢັນວ່າ: ບໍ່ໄດ້ຈູດສົບເຈົ້າໜ້າທີ່ ສ.ເກົາຫລີ ໂດຍຫລັງການສັງຫານ ທະຫານ ສປປ ເກົາຫລີ ໄດ້ເຂົ້າກວດສອບວັດຖຸລອຍນ້ຳດັ່ງກ່າວ, ແຕ່ພົບພຽງເລືອດປະລິມານຫລາຍ ແລະ ບໍ່ພົບສົບ ກ່ອນຈະຈູດວັດຖຸລອຍນ້ຳດັ່ງກ່າວຕາມມາດຕະການປ້ອງກັນໂຄວິດ-19.
ຂະນະທີ່ ສປປ ເກົາຫລີ ລະບຸວ່າ: ທ່ານຜູ້ນຳ ກິມຈ໋ອງອິນ ຄິດວ່າເຫດການດັ່ງກ່າວເປັນເຫດການທີ່ບໍ່ຄວນເກີດຂຶ້ນ ແລະ ສັ່ງໃຫ້ກອງທັບຈັດຕັ້ງລະບົບບັນທຶກຂັ້ນຕອນຄວາມໝັ້ນຄົງທາງທະເລທັງໝົດ ເພື່ອບໍ່ໃຫ້ເກີດຄວາມຜິດພາດ ຫລື ຄວາມເຂົ້າໃຈຜິດ ແລະ ເນັ້ນໃຫ້ຫາທາງປ້ອງກັນບໍ່ໃຫ້ເກີດເຫດການອັນໜ້າເສົ້າດັ່ງກ່າວຂຶ້ນອີກ ເພື່ອບໍ່ໃຫ້ຄວາມເຊື່ອໝັ້ນ ແລະ ການພົວພັນລະຫວ່າງສອງເກົາຫລີລົ້ມສະຫລາຍ.
