ສະພາການຄ້າ ແລະ ອຸດສາຫະກຳແຫ່ງຊາດລາວ ວາງແຜນຍຸດທະສາດ2021-2025 ດ້ວຍ 6 ເສົາຄໍ້າ
ໃນວັນທີ 25 ກັນຍານີ້ ສະພາການຄ້າ ແລະ ອຸດສາຫະກຳແຫ່ງຊາດລາວ ຈັດກອງປະຊຸມໃຫຍ່ ຄັ້ງທີ VIII ທີ່ຫໍປະຊຸມແຫ່ງຊາດ ໂດຍການເຂົ້າຮ່ວມຂອງທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ, ທ່ານ ອຸເດດ ສຸວັນນະວົງ ປະທານ ສຄອ ແຫ່ງຊາດລາວ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມໄດ້ສະຫຼຸບຜົນງານການເຄື່ອນໄຫວວຽກງານ ສຄອ ແຫ່ງຊາດລາວ ແຕ່ປີ 2017-2013, ສະຫຼຸບວຽກງານການເງິນ, ວາງທິດທາງແຜນການການເຄື່ອນໄຫວ 3 ຕໍ່ຫນ້າ 2021-2023, ປ່ອນບັດເລືອກຕັ້ງຄະນະບໍລິຫານງານຊຸດທີ VIII.
ພ້ອມນີ້ຍັງໄດ້ວາງແຜນຍຸດທະສາດການພັດທະນາພາກທຸລະກິດປີ 2021-2025 ລວມມີ 6ເສົາຄໍ້າ ປະກອບດ້ວຍ: 1) ເສົາຄໍ້າທີ 1: ການພົບປະລະຫວ່າງລັດ-ທຸລະກິດເພື່ອປັບປຸງແວດລ້ອມການດໍາເນີນທຸລະກິດປະກອບມີ: ການຈັດຕັ້ງປະຕິບັດກອງປະຊຸມລາວ (Lao Business Forum-LBF). 2) ເສົາຄໍ້າທີ 2: ການພັດທະນາສົ່ງເສີມທຸລະກິດຂະຫນາດນ້ອຍ ແລະ ຂະຫນາດກາງ (SME) ໂດຍຜ່ານສູນບໍລິການ SMECSSC). 3) ເສົາຄໍ້າທີ 3: ການສົ່ງເສີມຕະຫຼາດຜະລິດຕະພັນລາວ. 4). ເສົາຄໍ້າທີ 4: ການເຊື່ອມໂຍງເສດຖະກິດພາກພື້ນ ແລະ ການສົ່ງເສີມການລົງທຶນທີ່ຍືນຍົງ. 5). ເສົາຄໍ້າທີ 5: ການພັດທະນາຜູ້ປະກອບການ ແລະ ກິດຈະກໍາຜູ້ໃຊ້ແຮງງານ. 6). ເສົາຄໍ້າທີ 6: ຂໍ້ມູນຂ່າວສານ, ການພົວພັນມວນຊົນ ແລະ ການບໍລິການໃຫ້ແກ່ສະມາຊິກ.
ແລະ ໄດ້ຮັບຟັງການໂອ້ລົມຂອງພະນະທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ. ກອງປະຊຸມໃຫ່ຍ ຂອງ ສຄອ ແຫ່ງຊາດລາວຈະຈັດຂຶ້ນທຸກໆ 3 ປີ ຕາມດໍາລັດວ່າດ້ວຍການຈັດຕັ້ງ ແລະ ການເຄື່ອນໄຫວຂອງ ສຄອ ແຫ່ງຊາດລາວ ເລກທີ 237/ນຍ, ລົງວັນທີ 18 ພຶດສະພາ 2020.
