ທ່ານ ທຣຳ ປະຕິເສດໃຫ້ຄຳໝັ້ນປ່ຽນຖ່າຍອຳນາດຢ່າງສັນຕິ ຖ້າເສຍໄຊການເລືອກຕັ້ງປະທານາທິບໍດີອາເມລິກາ
ປະທານາທິບໍດີ ໂດນັລ ທຣຳ ຂອງອາເມລິກາ ບໍ່ໃຫ້ຄຳໝັ້ນວ່າຈະປະຕິບັດຕາມຫລັກການພື້ນຖານຂອງລະບອບປະຊາທິປະໄຕອາເມລິກາໃນການປ່ຽນຖ່າຍອຳນາດຢ່າງສັນຕິ ຖ້າເສຍໄຊການເລືອກຕັ້ງປະທານາທິບໍດີທີ່ຈະເກີດຂຶ້ນໃນວັນທີ 3 ພະຈິກນີ້ ຫລັງຖືກສອບຖາມຈາກນັກຂ່າວລະຫວ່າງການຖະແຫລງຂ່າວຢູ່ທຳນຽບຂາວໃນວັນທີ 23 ກັນຍາ.
ໂດຍທ່ານ ທຣຳ ກ່າວວ່າ: ຕ້ອງຖ້າເບິ່ງຕໍ່ໄປວ່າແມ່ນຫຍັງຈະເກີດຂຶ້ນ. ກ່ອງອ້າງຂໍ້ຂັດແຍ່ງບັນຫາໃນການລົງຄະແນນເລືອກຕັ້ງທາງໄປສະນີທີ່ຄາດວ່າຈະເພີ່ມຂຶ້ນຫລາຍຈາກບັນຫາການລະບາດຂອງໂຄວິດ-19 ເຊິ່ງຜ່ານມາ ທ່ານວິຈານວ່າການລົງຄະແນນທາງໄປສະນີເປີດຊ່ອງວ່າງໃຫ້ເກີດການສໍ້ໂກງການເລືອກຕັ້ງໄດ້ງ່າຍ ແລະ ພັກເດໂມແຄຣດໃຊ້ຈຸດອ່ອນນີ້ເພື່ອໂຄ່ນລົ້ມທ່ານ.
ຜ່ານມາ ທ່ານ ທຣຳ ຢືນຢັນປະຕິເສດຈະຍອມຮັບຜົນການເລືອກຕັ້ງປະທານາທິບໍດີ ຖ້າທ່ານເປັນຝ່າຍເສຍໄຊ ແລະ ກ່າວຫາພັກເດໂມແຄຣດທີ່ໃຊ້ການລົງຄະແນນທາງໄປສະນີທີ່ເພີ່ມຂຶ້ນ ເພື່ອເອົາຊະນະທ່ານ.
ເຊິ່ງທ່າທີດັ່ງກ່າວເຮັດໃຫ້ຜູ້ສະໜັບສະໜູນສິດທິໃນການເລືອກຕັ້ງ ແລະ ຜູ້ຊ່ຽວຊານການເມືອງອາເມລິກາ ສະແດງຄວາມກັງວົນຕໍ່ຄວາມລົ້ມເຫລວໃນການເລືອກຕັ້ງ ແລະ ວິກິດການລັດຖະທຳມະນູນ.
ທັງນີ້ ຫລາຍລັດຂອງອາເມລິກາ ມີການປ່ຽນແປງຂະບວນການລົງຄະແນນ ເພື່ອຊ່ວຍໃຫ້ປະຊາຊົນສາມາດໃຊ້ສິດໄດ້ງ່າຍຂຶ້ນ ທ່າມກາງສະຖານະການແຜ່ລະບາດຂອງໂຄວິດ-19 ແລະ ພ້ອມຮັບມືຕໍ່ການລົງຄະແນນທາງໄປສະນີທີ່ເພີ່ມຂຶ້ນ. ຂະນະທີ່ມີການຟ້ອງຮ້ອງໃນຊັ້ນສານຫລາຍຮ້ອຍຄະດີ ກ່ຽວກັບການດຳເນີນການເລືອກຕັ້ງຄັ້ງນີ້ ເຊິ່ງພັກຣີພັບບລິກັນຂອງທ່ານ ທຣຳ ນັ້ນພ້ອມຈ່າຍເງິນຫລາຍສິບລ້ານໂດລາສະຫະລັດ ໃນການໂຄສະນາ ແລະ ດຳເນີນການຟ້ອງຮ້ອງຈົນເຖິງທີ່ສຸດ ເພື່ອຈຳກັດການຂະຫຍາຍການລົງຄະແນນທາງໄປສະນີ.
