ມະຫາເສດຖີຈີນທີ່ວິຈານລັດຖະບານ ຮັບໂທດຕິດຄຸກ 18 ປີ ຂໍ້ຫາສໍ້ລາດບັງຫລວງ
ທ່ານ Ren Zhiqiang ມະຫາເສດຖີດ້ານອະສັງຫາລິມະຊັບຊາວຈີນ ເຊິ່ງຂຽນບົດຄວາມວິຈານບົດບາດຂອງປະທານປະເທດ ສີຈິ້ນຜິງ ເຖິງການຮັບມືການລະບາດຂອງໂຄວິດ-19 ໃນເດືອນມີນາ ຖືກສານໃນນະຄອນຫລວງປັກກິ່ງຕັດສິນຕິດຄຸກ 18 ປີ ແລະ ຖືກປັບໄໝ 4,2 ລ້ານຢວນ.
ເວັບໄຊໜັງສືພິມ Global Times ຂອງທາງການຈີນ ລະບຸວ່າ: ທ່ານ Ren Zhiqiang ມີພຶດຕິກຳທຸຈະລິດ, ສໍ້ໂກງເງິນກອງທຶນສາທາລະນະ ແລະ ລຸແກ່ອຳນາດ. ນອກຈາກນີ້ ຍັງເວົ້າເຖິງການລະເມີດຂໍ້ບັງຄັບໃນຖານະສະມາຊິກພັກກອມມູນິດຈີນທີ່ຂຽນບົດຄວາມໃສ່ຮ້າຍພັກ ແລະ ປະເທດຈີນຢ່າງຮຸນແຮງ ໂດຍທ່ານ Ren Zhiqiang ຍອມຮັບສາລະພາບ ແລະ ບໍ່ຂໍຍື່ນອຸທອນ.
ເຖິງວ່າໃນຂ່າວຂອງ Global Times ຈະບໍ່ໄດ້ລະບຸລາຍລະອຽດ, ແຕ່ເວັບໄຊ BBC ສື່ອັງກິດເປີດເຜີຍວ່າ: ທ່ານ Ren Zhiqiang ປຽບທຽບປະທານປະເທດ ສີຈິ້ນຜິງ ວ່າເປັນຕົວຕະຫລົກແກ້ເຄື່ອງທີ່ຢາກເປັນຈັກກະພັດຕໍ່ໄປ.
BBC ໃຫ້ຂໍ້ມູນວ່າ: ທ່ານ Ren Zhiqiang ຫາຍຕົວໄປຢ່າງປິດສະໜາ ຫລັງເຜີຍແຜ່ບົດຄວາມດັ່ງກ່າວ ກ່ອນຈະມີຂ່າວວ່າ: ລາວຖືກຂັບໄລ່ອອກຈາກພັກກອມມູນິດຈີນ ແລະ ຖືກດຳເນີນຄະດີໃນຄວາມຜິດທີ່ກ່ຽວຂ້ອງກັບການທຸຈະລິດ.
