ໂກລົມບີແຊງເປຣູຢູ່ທີ 5 ຕິດໂຄວິດ-19 ຫລາຍສຸດ ກູເວດຕິດໂຄວິດ-19 ຫລັກແສນຄົນ ຕິດເຊື້ອສະສົມ 31,4 ລ້ານຄົນທົ່ວໂລກ
ວັນທີ 23 ກັນຍານີ້, ເຖິງວ່າສະຖານະການການແຜ່ລະບາດຢູ່ອາເມລິກາລາຕິນຈະມີທ່າອ່ຽງດີຂຶ້ນຈາກຫລາຍເດືອນຜ່ານມາ, ແຕ່ຈຳນວນຜູ້ຕິດເຊື້ອໃໝ່ໃນແຕ່ລະມື້ຍັງຖືວ່າສູງ ເມື່ອທຽບໃສ່ປະເທດທີ່ສາມາດຮັບມືໂຄວິດ-19 ໄດ້ ໂດຍທາງການໂກລົມບີຢືນຢັນ ພົບຜູ້ຕິດເຊື້ອໂຄວິດ-19 ໃໝ່ເພີ່ມ 7.100 ກວ່າຄົນ ສົ່ງຜົນໃຫ້ໂກລົມບີແຊງໜ້າເພື່ອນຮ່ວມພາກພື້ນຄືເປຣູ ຢູ່ອັນດັບທີ 5 ປະເທດທີ່ມີຜູ້ຕິດເຊື້ອສະສົມຫລາຍທີ່ສຸດໃນປັດຈຸບັນ. ຂະນະທີ່ກູເວດ ປະເທດນ້ອຍໆຢູ່ຕາເວັນອອກກາງ ກາຍເປັນປະເທດທີ 37 ຂອງໂລກ ທີ່ມີຜູ້ຕິດເຊື້ອສະສົມຢູ່ຫລັກແສນຄົນ.
ຫລ້າສຸດ ການແຜ່ລະບາດຂອງໂຄວິດ-19 ກຳລັງຈະກ້າວເຂົ້າສູ່ເດືອນທີ 9 ທົ່ວໂລກມີຜູ້ຕິດເຊື້ອສະສົມເກີນ 31,4 ລ້ານຄົນແລ້ວ (31.453.048 ຄົນ), ປິ່ນປົວຫາຍ 23 ລ້ານກວ່າຄົນ (23.367.815 ຄົນ) ຫລື 2 ໃນ 3 ຂອງຜູ້ຕິດເຊື້ອທັງໝົດ, ເສຍຊີວິດແລ້ວ 967.347 ຄົນ ອັດຕາການເສຍຊີວິດປະມານ 3% ໂດຍພົບຜູ້ຕິດເຊື້ອເພີ່ມເກີນມື້ລະ 1 ແສນຄົນ ຕິດຕໍ່ກັນເຖິງ 120 ມື້ ນັບແຕ່ວັນທີ 27 ພຶດສະພາຜ່ານມາ.
ອາເມລິກາຍັງເປັນປະເທດທີ່ພົບຜູ້ຕິດເຊື້ອສະສົມຫລາຍທີ່ສຸດໃນໂລກ (6.890.014 ຄົນ), ຂະນະທີ່ອິນເດຍຢູ່ອັນດັບ 2 (5.562.663 ຄົນ), ເບຣຊິນ (4.558.040 ຄົນ), ຣັດເຊຍ (1.111.157 ຄົນ) ແລະ ເປຣູ (777.537 ຄົນ) ພົບຜູ້ຕິດເຊື້ອແລ້ວຢ່າງໜ້ອຍ 181 ຈາກ 193 ປະເທດທົ່ວໂລກ ມີພຽງບຣູໄນ, ຕິມໍເລສເຕ, ເຊນວິນເຊນ ແລະ ເກຣນາດີນ, ມາເກົາ, ເກຣເນດາ ແລະ ນະຄອນລັດວາຕິກັນເທົ່ານັ້ນທີ່ຜູ້ຕິດເຊື້ອໂຄວິດ-19 ທັງໝົດຫາຍດີແລ້ວ ແລະ ຍັງບໍ່ພົບຜູ້ຕິດເຊື້ອໃໝ່.
