“ທັດມາຮາວ” ເປີດຮັບນັກທ່ອງທ່ຽວອີກ ຫລັງປິດໜີໂຄວິດ-19 ດົນກວ່າ 6 ເດືອນ
ວັນທີ 21 ກັນຍານີ້, ທັດມາຮາວ ອານຸສອນສະຖານແຫ່ງຄວາມຮັກຂອງອິນເດຍ ກັບມາເປີດໃຫ້ນັກທ່ອງທ່ຽວເຂົ້າໄປທ່ຽວອີກ ຫລັງຈາກປິດຮັບນັກທ່ອງທ່ຽວນັບແຕ່ວັນທີ 17 ມີນາຜ່ານມາ ເນື່ອງຈາກການແຜ່ລະບາດຂອງພະຍາດຕິດເຊື້ອໄວຣັສໂຄໂຣນາສາຍພັນໃໝ່ (ໂຄວິດ-19).
ນອກຈາກນີ້ ປ້ອມອັກຣາ (Agra Fort) ສະຖານທີ່ສຳຄັນອີກແຫ່ງໜຶ່ງໃນເຂດໃກ້ຄຽງ ໄດ້ກັບມາເປີດຮັບນັກທ່ອງທ່ຽວເຊັ່ນກັນ.
ເຈົ້າໜ້າທີ່ອາວຸໂສທ່ານໜຶ່ງລະບຸວ່າ: ປະຊາຊົນຈະຕ້ອງປະຕິບັດຕາມແນວທາງປະຕິບັດດ້ານຄວາມປອດໄພທຸກປະການທີ່ອອກໂດຍກະຊວງສາທາລະນະສຸກລະຫວ່າງການທ່ຽວຊົມທັດມາຮາວ ແລະ ປ້ອມອັກຄຣາເຊັ່ນ: ເວັ້ນໄລຍະຫ່າງທາງສັງຄົມ ແລະ ການລ້າງມືໃຫ້ສະອາດ.
ແນວທາງປະຕິບັດໃໝ່ກຳນົດວ່າ: ແຕ່ລະມື້ທັດມາຮາວຈະເປີດຮັບນັກທ່ອງທ່ຽວພຽງ 5.000 ຄົນ, ແບ່ງເປັນ 2 ຮອບ, ຮອບລະ 2.500 ຄົນ ໂດຍຮອບທີ 2 ຈະເປີດຕອນ 14:00 ໂມງ ຕາມເວລາທ້ອງຖິ່ນ, ສ່ວນປ້ອມອັກຣາຈະເປີດຮັບນັກທ່ອງທ່ຽວເຂົ້າຊົມພຽງ 2.500 ຄົນຕໍ່ມື້.
ທາງການກຳນົດວ່າ: ການທ່ຽວຊົມອານຸສອນສະຖານຕ່າງໆ ນັກທ່ອງທ່ຽວຈະຕ້ອງໃສ່ຜ້າປິດປາກ-ດັງ, ສ່ວນບັດເຂົ້າຊົມທັງໝົດຕ້ອງຊື້ຜ່ານທາງອອນລາຍ ເນື່ອງຈາກຫ້ອງຈຳໜ່າຍບັດຍັງບໍ່ເປີດໃຫ້ບໍລິການ.
ທັງນີ້, ທັດມາຮາວ ມໍລະດົກໂລກຂອງອົງການການສຶກສາ, ວິທະຍາສາດ ແລະ ວັດທະນະທຳແຫ່ງສະຫະປະຊາຊາດ (UNESCO) ຕັ້ງຢູ່ລັດອຸຕໍປະເທດ ທາງຕອນເໜືອຂອງອິນເດຍ ເປັນໜຶ່ງໃນສະຖານທີ່ທ່ອງທ່ຽວທີ່ໄດ້ຮັບຄວາມນິຍົມອັນດັບຕົ້ນໆຂອງໂລກ.
ລາຍງານລະບຸວ່າ: ກ່ອນເກີດການລະບາດຂອງໂຄວິດ-19 ທັດມາຮາວຕ້ອນຮັບນັກທ່ອງທ່ຽວເຖິງ 7 ລ້ານຄົນຕໍ່ປີ ໂດຍມີນັກທ່ອງທ່ຽວຕ່າງປະເທດຈຳນວນຫລາຍ. ຂະນະທີ່ປ້ອມອັກຣາມີນັກທ່ອງທ່ຽວເກືອບ 3 ລ້ານຄົນຕໍ່ປີ ໂດຍລາຍໄດ້ຈາກສະຖານທີ່ທ່ອງທ່ຽວຊື່ດັງສອງແຫ່ງນີ້ຊ່ວຍເພີ່ມລາຍໄດ້ໃຫ້ລັດຖະບານອຸຕໍປະເທດຢ່າງມະຫາສານ.
ການເປີດສະຖານທີ່ສຳຄັນທັງສອງແຫ່ງເປັນສ່ວນໜຶ່ງຂອງຄວາມພະຍາຍາມຂອງລັດຖະບານໃນການເປີດເມືອງ ແລະ ຫລຸດຜ່ອນຂໍ້ຈຳກັດທີ່ໃຊ້ຢັບຢັ້ງພະຍາດລະບາດ ໂດຍອຸຕໍປະເທດເປັນລັດທີ່ໄດ້ຮັບຜົນກະທົບຈາກໂຄວິດ-19 ຮຸນແຮງທີ່ສຸດເປັນອັນດັບ 5 ຂອງອິນເດຍ ມີຜູ້ຕິດເຊື້ອສະສົມ 354.275 ຄົນ ແລະ ເສຍຊີວິດ 5.047 ຄົນ.
ທັງນີ້, ຕົວເລກຮອດວັນທີ 21 ກັນຍາ ອິນເດຍເປັນປະເທດທີ່ໄດ້ຮັບຜົນກະທົບຈາກໂຄວິດ-19 ໜັກທີ່ສຸດເປັນອັນດັບ 2 ຂອງໂລກ. ລາຍງານຈຳນວນຜູ້ຕິດເຊື້ອສະສົມ 5.487.580 ຄົນ ແລະ ເສຍຊີວິດ 87.882 ຄົນ.
