ພຶດຕິກຳທຳລາຍປະສິດທິພາບການເຮັດວຽກຂອງສະໝອງ
June 28, 2017 - 10:39 AM
- ຄວາມເຄັ່ງຄຽດ : ຄວນຫລີກເວັ້ນເປັນອັນດັບຕົ້ນຕໍ ເພາະໃນທຸກເວລາທີ່ຫົວສະໝອງຂອງເຮົາຄິດເຖິງບັນຫາ, ວົນວຽນຊ້ຳໄປຊ້ຳມານັ້ນ ຮ່າງກາຍຂອງເຮົາກໍຜະລິດຮໍໂມນເຄັ່ງຄຽດອອກມາຢູ່ເລື້ອຍໆຄືກັນ. ດັ່ງນັ້ນ, ຫາກເຮົາເຄັ່ງຄຽດເປັນປະຈຳ ຫລື ເຄັ່ງຄຽດສະສົມເປັນເວລາດົນໆ ອາການທຳອິດທີ່ຮ່າງກາຍຟ້ອງອອກມາກໍຄື : ຄວາມຈື່ຈຳເຮັດວຽກບໍ່ມີປະສິດທິພາບ ແລະ ສາມາດຮຸນແຮງຂຶ້ນເລື້ອຍໆເຖິງຂັ້ນນຳໄປສູ່ພະຍາດອັລໄຊເມີໄດ້.
- ຄວາມຕຸ້ຍ : ຈາກຜົນການວິໄຈທີ່ຖືກຕີພິມໃນວາລະສານ American Journal of Epidemiology ຄວາມຕຸ້ຍມີຜົນຕໍ່ຄວາມສາມາດໃນການຈື່ຈຳ ແລະ ນຳໄປສູ່ຄວາມສ່ຽງເກີດອາການສະໝອງເສື່ອມໄດ້ໃນທີ່ສຸດ ເພາະຄວາມຕຸ້ຍມີຜົນກະທົບຕໍ່ສະຕິປັນຍາຂອງຄົນໃນໄວໜຸ່ມ ຫລື ໃນໄວຜູ້ໃຫຍ່ ເຮັດໃຫ້ຮ່າງກາຍບໍ່ສົດຊື່ນຫ້າວຫັນ, ເກີດຄວາມເຄັ່ງຄຽດ, ເຊື່ອງຊ້າ, ສະໝອງຈຶ່ງເຮັດວຽກບໍ່ເຕັມປະສິດທິພາບ. ດັ່ງນັ້ນ, ຄວນຮັກສານ້ຳໜັກໂຕໃຫ້ຄົງທີ່ຢູ່ສະເໝີ ບໍ່ຕຸ້ຍຫລາຍເກີນໄປ ແລະ ບໍ່ຈ່ອຍຈົນເກີນໄປຈຶ່ງຈະດີທີ່ສຸດ.
- ຕິດກິນຫວານ : ການກິນນ້ຳຕານໃນປະລິມານຫລາຍທຸກມື້ ເຮັດໃຫ້ຮອບແອວໜາຂຶ້ນ ສ່ຽງເປັນພະຍາດກຸ່ມເສື່ອມ ທັງຍັງສົ່ງຜົນກະທົບຕໍ່ແຊນສະໝອງນຳອີກ ເຫັນໄດ້ຈາກຄົນປ່ວຍທີ່ມີລະດັບນ້ຳຕານໃນເລືອດສູງ ເຊັ່ນ : ຄົນປ່ວຍພະຍາດເບົາຫວານທີ່ອາດມີອາການສະໝອງເສື່ອມໄດ້ໃນເວລາຕໍ່ມາ ຫາກມີການຕິດເຊື້ອໃນກະແສເລືອດ ສົ່ງຜົນໃຫ້ແຊນສະໝອງຖືກທຳລາຍ.
- ເຮັດຫຍັງຫລາຍໆຢ່າງໃນເວລາດຽວກັນ : ການເຮັດຫຍັງຫລາຍຢ່າງໄປພ້ອມໆກັນຖືເປັນການຝຶກສະໝອງກໍແມ່ນ, ແຕ່ກໍບໍ່ແມ່ນວ່າຈະດີຕໍ່ສະໝອງຂອງເຮົາຫລາຍປານໃດ ເພາະເມື່ອສະໝອງຕ້ອງຈື່ຈຳຫຍັງຫລາຍໆເລື່ອງໃນເວລາດຽວກັນ ກໍປຽບ ດັ່ງເປັນການເລັ່ງໃຫ້ສະໝອງຜະລິດຄວາມຄິດ ຫລາຍເທື່ອໄປສະໝອງຂອງເຮົາກໍສັບສົນໄດ້ຄືກັນ ຫາກຄິດພາບບໍ່ອອກລອງຄິດເຖິງຕອນທີ່ເຮົາພະຍາຍາມເປີດໂປຣແກຣມຄອມພິວເຕີໃຊ້ງານຫລາຍໂປຣແກຣມພ້ອມກັນບາດດຽວ ທີ່ສຸດຄອມພິວເຕີກໍຄ້າງໄດ້ຄືກັນ.
- ສືບດົມຄັວນຢາສູບເລື້ອຍໆ : ເຖິງວ່າເຮົາຈະບໍ່ໄດ້ສູບຢາ, ແຕ່ຖ້າເຮົາໄປຢືນຢູ່ໃກ້ໆຄົນສູບຢາ ກໍມີໂອກາດທີ່ສະໝອງຂອງເຮົາຈະຖືກທຳລາຍຄືກັນ ເພາະຄັວນຢາສູບທີ່ລອຍຜ່ານເຂົ້າດັງຂອງເຮົານັ້ນຈະເຂົ້າໄປແທນບ່ອນອົກຊີແຊນທີ່ໄຫລວຽນຢູ່ໃນຮ່າງກາຍຂັດຂວາງການໄຫລວຽນຂອງເລືອດທີ່ໄປລ້ຽງສະໝອງ ແຊນສະໝອງກໍສູນເສຍໄປເທື່ອລະໜ້ອຍ.
- ໂດຍສານເຮືອບິນຫລາຍເທື່ອ : ຜູ້ທີ່ມັກທ່ອງທ່ຽວຄົງບໍ່ຄາດຄິດແນ່ນອນວ່າ ການໂດຍສານເຮືອບິນຫລາຍເທື່ອນັ້ນມີຜົນກະທົບຕໍ່ປະສິດທິພາບການເຮັດວຽກຂອງສະໝອງ ຈາກຜົນການວິໄຈຂອງມະຫາວິທະຍາໄລກາລິຟໍເນຍໃນສະຫະລັດອາເມລິກາ ເປີດເຜີຍວ່າ : ຄວາມກົດອາກາດຢູ່ບ່ອນສູງຈະເຮັດໃຫ້ໂມງຊີວິດຂອງເຮົາຜັນປ່ຽນ ແລະ ຈະເຮັດໃຫ້ເຮົາມີກິດຈະວັດປະຈຳວັນປ່ຽນໄປນຳ ເຊັ່ນ : ການນອນຜິດເວລາ, ການກິນອາຫານ, ຂະບວນການຫລັ່ງຮໍໂມນໃນຮ່າງກາຍ ເປັນຕົ້ນ ເຊິ່ງປັດໄຈເຫລົ່ານີ້ລ້ວນກະທົບເຖິງຂະບວນການຮຽນຮູ້ ແລະ ຈື່ຈຳຂອງສະໝອງໃຫ້ຖົດຖອຍລົງ.
