ຜູ້ພິພາກສາສະຫະລັດຢັບຢັ້ງຄຳສັ່ງຍຸບ WeChatຂອງ ທຣຳ
ລາຍງານຂ່າວວັນທີ 21 ກັນຍາ ໃຫ້ຮູ້ວ່າ: ຜູ້ພິພາກສາຄົນໜຶ່ງຂອງສະຫະລັດໄດ້ຢັບຢັ້ງຄຳສັ່ງຂອງປະທານາທິບໍດີສະຫະລັດ ທີ່ຮຽກຮ້ອງໃຫ້ Apple Inc ແລະ Alphabet Inc ຂອງ Google ຍຸບແອບຂໍ້ຄວາມWeChat ຂອງຈີນອອກຈາກເຄືອຂ່າຍ.
Reuters ໂດຍອ້າງອີງຄຳຖະແຫຼງຂອງຜູ້ພິພາກສາ Laurel Beeler ໃຫ້ຮູ້ວ່າ: ຄຳສັ່ງຫ້າມ WeChat ຂອງ ທຣຳ ໄດ້ເກີດຄຳຖາມຢ່າງມາກມາຍ ພົວພັນເຖິງການແກ້ໄຂລັດຖະທຳມະນູນຄັ້ງທີໜຶ່ງ ຊຶ່ງຍັງຄົງໄວ້ ສິດເສລີພາບໃນການປາກເວົ້າ.
ທ້າຍອາທິດທີ່ຜ່ານມານີ້, ລັດຖະມົນຕີກະຊວງການຄ້າຂອງສະຫະລັດອອກຄຳສັ່ງຫ້າມ WeChat ທີ່ເປັນກຳມະສິດຂອງ Tencent Holding ຂອງຈີນຢູ່ຕາມຫ້າງຮ້ານ ແອບຂອງສະຫະລັດ ເຄື່ອນໄຫວນັບແຕ່ວັນທີ 20 ກັນຍາເປັນຕົ້ນໄປ ໂດຍອ້າງເຫດຜົນວ່າ: ມີການພົວພັນເຖິງຄວາມໝັ້ນຄົງຂອງຊາດ. ຄຳສັ່ງດ່ງກ່າວກໍເທົ່າກັບວ່າໃຫ້ປິດປະຕູ WeChat ຢູ່ໃນສະຫະລັດ.
ກະຊວງຍຸຕິທຳຂອງສະຫະລັດ ຮຽກຮ້ອງໃຫ້ຜູ້ພິພາກສາ Beelerຢ່າຢັບຢັ້ງຄຳສັ່ງດັ່ງກ່າວຂອງປະທານາທິບໍດີ ທຣຳ ເພາະມັນຈະເປັນການສ້າງຄວາມສັບສົນ ແລະ ແຕະຕ້ອງເຖິງການຕັດສິນໃຈຂອງປະທານາທິບໍດີທີ່ດີ ຊຶ່ງຈະມີຄວາມສ່ຽງຕໍ່ຄວາມໝັ້ນຄົງຂອງຊາດ.
ຜູ້ພິພາກສາຄົນດັ່ງກ່າວໃຫ້ເຫດຜົນວ່າ: ມີຫຼັກຖານຢັ້ງຢືນໃຫ້ເຫັນວ່າ ມີໄພຂົ່ມຂູ່ຕໍ່ຄວາມໝັ້ນຄົງຕໍ່ຈີນຫຼາຍກ່ວາ, ສ່ວນຫຼັກຖານພົວພັນເຖິງ WeChat ນັ້ນ ແມ່ນບໍ່ພໍເທົ່າໃດ.
WeChat ກຳເນີນເກີດຂຶ້ນເມື່ອປີ 2011. ນີ້ເປັນແອບທີ່ມີຄວາມສາມາດຫຼາຍຢ່າງ, ຊຶ່ງຄົນນຳໃຊ້ສາມາດສົ່ງຂໍ້ຄວາມ, ສຳລະເງິນດ້ວຍມືຖື. ເປັນແອບໜຶ່ງທີ່ໄວລຸ່ນໃນຈີນ ແລະ ຊາວອາເມລິກາທີ່ດຳລົງຊີວິດທຳມາຫາກິນຢູ່ໃນຈີນນຳໃຊ້ຫຼາຍທີ່ສຸດ.
